ខេត្តស្ទឹងត្រែង ៖ នៅព្រឹកថ្ងៃទី២ សីហា ស្រ្តីម្នាក់ពេលចេញមកពីមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត បាននិយាយរអ៊ូរទាំទាំងសំឡេងរដឺនៗថា ប្រាក់ដែលគាត់បើកពីមន្ទីរសង្គមកិច្ចខេត្តជាប្រាក់ខែប្តីគាត់ដែលបានពលី ដោយសារខ្មែរក្រហមសម្លា.ប់ក្នុងកំឡុងទសវត្សឆ្នាំ១៩៨០
ខេត្តស្ទឹងត្រែង ៖ នៅព្រឹកថ្ងៃទី២ សីហា ស្រ្តីម្នាក់ពេលចេញមកពីមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត បាននិយាយរអ៊ូរទាំទាំងសំឡេងរដឺនៗថា ប្រាក់ដែលគាត់បើកពីមន្ទីរសង្គមកិច្ចខេត្តជាប្រាក់ខែប្តីគាត់ដែលបានពលីដោយសារខ្មែរក្រហមសម្លាប់ក្នុងកំឡុងទសវត្សឆ្នាំ១៩៨០ ទទួលបានតិចតួចបំផុត គឺត្រឹមតែ៧.៥០០រៀលប៉ុណ្ណោះ រយៈពេល៣ខែ។
ស្រ្តីវ័យចំណាស់រូបនេះឈ្មោះអែត ខាំតា អាយុ៦៣ឆ្នាំ រស់នៅភូមិភ្លុក ឃុំភ្លុក ស្រុកសេសាន បាននិយាយថា ប្តីរបស់គាត់ឈ្មោះនូ អន បានចូលកងស្វ័យត្រាណសម័យរដ្ឋកម្ពុជា នៅភូមិភ្លុក ឃុំភ្លុក។ ខណៈកំពុងបំពេញភារកិច្ចចុះយាមល្បាតក្នុងភូមិសាស្រ្តស្រុកសេសាន ក៏ត្រូវខ្មែរក្រហមលបបាញ់សម្លាប់ ហើយឈ្មោះប្តីគាត់ក៏បានកាត់ចូលមកមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត តែគាត់មិនបានដឹងថា ប្រាក់បៀវត្សទាំងនោះមានចំនួនប៉ុន្មានទេ គ្រាន់តែដឹងថា ជារៀងរាល់៣ខែម្តងមន្ទីរសង្គមកិច្ចបានផ្ញើប្រាក់ទាំងនោះតាមរយៈអ្នកភូមិទៅឱ្យគាត់។
ស្រ្តីរូបនេះបានបន្តទៀតថា នៅព្រឹកថ្ងៃទី២ សីហា គាត់បានចូលទៅបើកប្រាក់ខែដោយផ្ទាល់តាមការហៅរបស់មន្ទីរសង្គមកិច្ចបានចំនួន៧.៥០០រៀល បន្ទាប់ពីកាត់ចូលសមាគមរួចមក។ គាត់រអ៊ូថា លុយប៉ុណ្ណេះគាត់ជិះឡានមិនគ្រប់ទេ ព្រោះថ្លៃឡានទៅមកតម្លៃ១៥.០០០រៀលឯណោះ ហើយលទ្ធភាពមកបើកប្រាក់ខែនេះគាត់លក់មាន់មួយក្បាលតម្លៃ២៥.០០០រៀលធ្វើជាសោហ៊ុយ។ គាត់និយាយថា ប្រាក់ខែប៉ុណ្ណេះគាត់មិនអាចមកបើកទៀតទេ ព្រោះបូកសរុបទៅគ្មានបានអ្វីបន្តិចណាសោះ។
ជុំវិញករណីនេះ លោកស៊ា គឹមសែ ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តបានឱ្យដឹងថា ប្រាក់ខែរបស់យុទ្ធជនពលីក្នុងម្នាក់ទទួលបានតែ៦.០០០រៀលទេ ហើយមន្ទីរតម្រូឱ្យគ្រួសារអ្នកពលីបំពេញបែបបទ ជាលិខិតមរណភាពចេញពីអាជ្ញាធរដែនដី ដើម្បីចូលជាសមាជិកសមាគមអតីតយុទ្ធជនកម្ពុជា ដែលមានសម្តេចនាយកជាប្រធាន។
លោកស៊ា គឹមសែ បានឱ្យដឹងទៀតថា ក្នុងប្រាក់ខែម្នាក់៦.០០០រៀលនោះ ត្រូវបានកាត់ចូលក្នុងសមាគមចំនួន៣.៥០០រៀល ហើយនៅសល់ចំនួន២.៥០០រៀលក្នុង១ខែ ដូចនេះមន្ទីរមានគោលការណ៍បើកប្រាក់ខែឱ្យគ្រួសារយុទ្ធជនពលីធ្វើឡើងក្នុង១ត្រីមាសម្តង ដែលក្នុងមួយត្រីមាសនោះ អ្នកដែលបានបំពេញលិខិតមរណភាពចូលជាសមាជិកសមាគម គឺនៅសល់ចំនួន៧.៥០០រៀលគត់។ លោកបញ្ជាក់ទៀតថា គ្រួសារអ្នកពលីដែលបានចូលជាសមាជិករបស់សមាគមហើយនោះពេលមរណភាព គឺសមា គមមានគោលការណ៍ជួយជាថវិកាដល់ក្រុមគ្រួសារចំនួន៤.០០០.០០០រៀល៕
ចែករំលែកព័តមាននេះ