ខេត្តសៀមរាប ៖ អ្នកនេសាទខ្មែរប្រមាណ១៥នាក់ បានរងរបួសធ្ងន់-ស្រាល ដោយសារតែក្រុមជនជាតិវៀតណាមចំនួន៥០នាក់ ជិះកាណូត២គ្រឿងមកព្រួតគ្នាវាយប្រហារនៅក្នុងបឹងទន្លេសាប កាលពីយប់ថ្ងៃទី១៤ ធ្នូ ២០១៥ ស្ថិតនៅចំណុចឃុំកំពង់ភ្លុក ស្រុកប្រាសាទបាគង ខេត្តសៀមរាប ។
ប្រភពបានឱ្យដឹងថា ក្រុមអ្នកនេសាទខ្មែរទាំងនោះ ខ្លះរងរបួសបែកក្បាល ត្រូវបានគ្រូពេទ្យដេរជាច្រើនថ្នេរ និងខ្លះទៀតកំពុងគ្រាំដោយត្រូវគ្រូពេទ្យបន្តោងសេរ៉ូមជំនួយសុខភាពនៅឡើយ បន្ទាប់ពីត្រូវក្រុមជនជាតិវៀតណាមប្រើឧបករណ៍ដែក និងពូថៅវាយសំពងលើពួកគេ ដោយមិនដឹងមូលហេតុ ។
ប្រភពពីយុវជនម្នាក់ឈ្មោះលុយ នង រស់នៅភូមិត្នោតកំបុត ឃុំកំពង់ភ្លុក ក្នុងចំណោមអ្នករងគ្រោះ១៤នាក់ ឱ្យដឹងថា កាលពីយប់ថ្ងៃកើតហេតុ រូបគាត់និងអ្នកភូមិ១៤នាក់ទៀត (ជាអ្នកនេសាទ) បាននាំគ្នាចេញទៅដាក់មងនៅក្នុងអតីតតំបន់ឡូត៍លេខ៤នៃបឹងទន្លេសាប ។ ក្នុងយប់នោះ ពួកគាត់ប្រទះឃើញកាណូតរបស់ជនជាតិវៀតណាម២គ្រឿងធំៗ មកពីតំបន់ចុងឃ្នៀស ក្រុងសៀមរាប ប្រើយ៉ាំងកាវ ចាប់ផ្ដើមអូសយកត្រីខុសច្បាប់មកដល់ ក្នុងតំបន់ហាមឃាត់នេះ ។
ដូច្នេះក្រុមរបស់គាត់ ក៏ហាមមិនឱ្យជនជាតិវៀតណាមទាំងនោះអូសទៅតំបន់ដែលពួកគាត់កំពុងដាក់មង ក៏ប៉ុន្តែជនជាតិវៀតណាមទាំងនោះមិនស្ដាប់ទេ គឺអូសទៅបំផ្លាញមង ហើយក៏ប្រើអំពើហិង្សាមកលើពួកគាត់តែម្ដង ។ ទៅដល់ឃើញជាប់មង ពួកខ្ញុំហៅមេវាមកសួរ តែមេវាមិនមក បើកកាណូតទៅ ហើយទូរស័ព្ទហៅគ្នាវាមកថែមទៀត ពេលនោះគ្នាវាមកដល់ ក៏នាំគ្នាមកវាយពួកខ្ញុំតែម្តង។
ជុំវិញករណីខាងលើ លោកមិន ចន្ថា អធិការនគរបាលស្រុកប្រាសាទបាគង បានឱ្យកោះសន្តិភាពដឹងថា ករណីហិង្សានេះ ដែលបង្កដោយជនជាតិវៀតណាមទាំងនោះ គឺកើតឡើងនៅកណ្ដាលបឹងទន្លេសាប ដោយមិនមានសមត្ថកិច្ចណាបានឃើញផ្ទាល់ភ្នែកនោះទេ ។
លោកបន្តថា ការប្រើហិង្សាមកលើអ្នកនេសាទខ្មែរនេះ គឺចាត់ទុកជនជាតិវៀតណាមទាំងនោះថា បានប្រើអំពើហិង្សាដោយខុសច្បាប់ ហើយកម្លាំងប៉ូលិសកំពុងស្រាវជ្រាវស្វែងរកមុខជនដៃដល់យកមកផ្តន្ទាទោសតាមច្បាប់ ។
ចែករំលែកព័តមាននេះ