រាជធានីភ្នំពេញ ៖ យានយន្តគ្រប់ប្រភេទបានកកស្ទះណែនណាន់តាន់តាប់ តាំងពីព្រឹកព្រលឹមចាប់ពីស្តុបលូ៥ រហូតដល់បញ្ជរបង់ប្រាក់ ។ អ្វីដែលបង្កឱ្យមានការកកស្ទះយានយន្តនោះ គឺការអនុវត្តតម្រូវឱ្យរថយន្តទេសចរណ៍តូច (រថយន្តគ្រួសារ) ត្រូវបង់លុយឆ្លងកាត់ក្នុងតម្លៃ១១០០រៀល ។ ការតម្រូវឱ្យមានការបង់ប្រាក់នេះ បានធ្វើឱ្យមានការភ្ញាក់ផ្អើលជាខ្លាំង ព្រោះកន្លងមក បញ្ជរបង់ប្រាក់នេះ យកលុយតែរថយន្តធំៗ និងរថយន្តដឹកជញ្ជូនធ្វើអាជីវកម្មតែប៉ុណ្ណោះ ។
មតិមហាជនដែលថ្លែងដោយការក្តៅក្រហាយក្នុងចិត្តនោះបាននិយាយថា ការតម្រូវឱ្យមានការបង់ថ្លៃរថយន្តឆ្លងកាត់នេះ គ្មាននរណាម្នាក់ បានដឹងមុននោះ តែអ្នកលក់សំបុត្របាននិយាយថា សាលារាជធានីបានអនុញ្ញាតឱ្យយកចាប់ពីថ្ងៃទី១ ធ្នូ នេះតទៅ ។ មតិមហាជនបាននិយាយថា បញ្ហានេះកំពុងដើរបញ្ច្រាសទិសនយោបាយដឹកនាំដោយសម្តេចតេជោ ហើយដែលកន្លងមកនេះ បញ្ជរបង់ប្រាក់លើកំណាត់ផ្លូវ២០០៤ ត្រូវបានលុបចោលហើយ បញ្ឈរបង់ប្រាក់នោះ ក៏គ្មានទៀតដែរ ។ សម្រាប់ផ្លូវវេងស្រេង (ផ្លូវ ចោមចៅ) ដែលត្រូវបានស្ថាបនាប៉ុន្មានឆ្នាំមកហើយ មិនទាន់ចប់រួចរាល់នោះ បានធ្វើឱ្យប្រជាពលរដ្ឋសប្បាយចិត្តជាពន់ពេក ហើយបើដឹងថា ការស្ថាបនាផ្លូវនោះ ដើម្បីយកលុយបែបនេះ បើកុំធ្វើល្អជាង ។
សាធារណមតិបានលើកឡើងថា ការយកលុយពីរថយន្តគ្រួសារដែលបើកបរឆ្លងកាត់នេះ កំពុងបន្ថែមបន្ទុកធ្ងន់ធ្ងរមួយជាន់ទៀតទៅលើជីវភាពរស់នៅរបស់ប្រជាពលរដ្ឋ ព្រោះអ្នកមានលំនៅឋានតាមបណ្តោយផ្លូវនេះ បានប្រើប្រាស់ឆ្លងកាត់ច្រើនដង តើក្នុង១ថ្ងៃត្រូវបង់លុយឱ្យបញ្ជរនេះរាប់ពាន់រៀលរាល់ថ្ងៃ ឬបែបណា?
ការតម្រូវឱ្យបង់លុយដល់បញ្ជរបង់ប្រាក់លើផ្លូវវេងស្រេងនេះ កំពុងតែធ្វើឱ្យនយោបាយរាជរដ្ឋាភិបាល ត្រូវប្រឈមមុខនឹងការរិះគន់ហើយ តើគប្បីគិតតែលុយ ឬគប្បីគិតគូរធ្វើឱ្យជីវភាពសង្គមកាន់តែធូរស្រាលបានទេ ។ សួរថា តើផ្លូវវេងស្រេងនេះ ជាផ្លូវរបស់ក្រុមហ៊ុនឯកជន ឬបែបណា?
ចែករំលែកព័តមាននេះ