រាជធានីភ្នំពេញ ៖ កំណើនសេដ្ឋកិច្ចកម្ពុជានឹងថយចុះបន្តិចនៅត្រឹម៦,៩ភាគរយក្នុងឆ្នាំ២០១៥ ពី៧,១ភាគរយនៅឆ្នាំ២០១៤ ។ ទោះបីយ៉ាងណា កម្លាំងសេដ្ឋកិច្ចកម្ពុជានៅតែខ្លាំងក្លានៅឡើយ ។ នេះបើយោងតាមរបាយការណ៍
រាជធានីភ្នំពេញ ៖ កំណើនសេដ្ឋកិច្ចកម្ពុជានឹងថយចុះបន្តិចនៅត្រឹម៦,៩ភាគរយក្នុងឆ្នាំ២០១៥ ពី៧,១ភាគរយនៅឆ្នាំ២០១៤ ។ ទោះបីយ៉ាងណា កម្លាំងសេដ្ឋកិច្ចកម្ពុជានៅតែខ្លាំងក្លានៅឡើយ ។ នេះបើយោងតាមរបាយការណ៍របស់ធនាគារពិភពលោកដែលបានចេញផ្សាយនៅថ្ងៃទី៥ តុលា ម្សិលមិញនេះ ។
កំណើនសេដ្ឋកិច្ចកម្ពុជា នៅតែត្រូវបាននាំមុខដោយវិស័យ៤រួមមាន វិស័យសំណង់ ការនាំចេញសម្លៀកបំពាក់ វិស័យទេសចរណ៍ និងកសិកម្ម ដែលវិស័យសំណង់បានក្លាយជាក្បាលម៉ាស៊ីនដ៏សំខាន់បំផុតនៃកំណើនសេដ្ឋកិច្ច ។ ក៏ប៉ុន្តែ វាមានសញ្ញាមួយចំនួនធ្លាក់ចុះ ជាពិសេស លើវិស័យទេសចរណ៍ និងវិស័យកសិកម្ម ដែលផ្អែកទៅលើតម្រូវការពីខាងក្រៅ និងតម្លៃផលិតផលអន្តរជាតិ ។
លោក សូដេត អ្នកសេដ្ឋកិច្ចរបស់ធនាគារពិភពលោកប្រចាំកម្ពុជាមានប្រសាសន៍ថា សេដ្ឋ កិច្ចកម្ពុជានៅតែមានកម្លាំងរឹងមាំដដែល ទោះបីកំណើនសេដ្ឋកិច្ចធ្លាក់ចុះបន្តិចបន្តួចពី៧,១ភាគ រយនៅឆ្នាំ២០១៤និង៦,៩ភាគរយនៅឆ្នាំ២០១៥ក៏ដោយ ។ សេដ្ឋកិច្ចរបស់កម្ពុជានៅតែខ្លាំង តែសេដ្ឋកិច្ចកម្ពុជាមានបញ្ហាទាក់ទងនឹងការនាំចេញ ទេសចរណ៍ និងកសិកម្ម ។
លោក សូដេត មានប្រសាសន៍យ៉ាងដូច្នេះថា ៖ « កំណើននៃការនាំចេញសម្លៀកបំពាក់បាន ថយចុះក្នុងអំឡុងពេលឆមាសទីមួយនៃឆ្នាំ២០១៥ ដូច្នេះកាកែខៃអត្ថប្រយោជន៍ប្រកួតប្រជែងរបស់កម្ពុជាគឺជាអាទិភាព » ។
លោកបានបន្តថា នៅពេលណាដែលសេដ្ឋកិច្ចរបស់កម្ពុជាមានបញ្ហាប្រឈមកាន់តែច្រើន គឺមានការប្រកួតប្រជែងជាមួយប្រទេសជិតខាងដូចជាការប្រកួតប្រជែងជាមួយប្រទេសមីយ៉ាន់ម៉ា ដែលទើបតែបើកទីផ្សារ និងមានកម្លាំងពលកម្មថោក ។ ពីមុន កម្ពុជាមានកម្លាំងពលកម្មថោក តែប្រទេសដទៃមានកម្លាំងពលកម្មថ្លៃ ។
ចំពោះវិស័យទេសចរណ៍ ក៏មានធ្លាក់ចុះ ដោយសារប្រទេសជិតខាងមានបញ្ហា ដែលធ្វើឲ្យមានភ្ញៀវទេសចរធ្លាក់ចុះដែរ ពិសេសការធ្លាក់ចុះនៃចំនួនទេសចរពីការហោះហើរ ពី១២,៧ភាគរយក្នុងឆ្នាំ២០១៤ មក៧,៣ភាគរយក្នុង២០១៥ ព្រមទាំងការចំណាយរបស់អ្នកទេសចរ ធ្លាក់ចុះពី១២០,៧ដុល្លារមក៩៣,៤ដុល្លារក្នុងមួយថ្ងៃ ។ ក្នុងវិស័យកសិកម្មក៏មានការថម ថយ ដោយសារកម្ពុជានៅតែពឹងលើទឹកភ្លៀវច្រើន ហើយនៅពេលដែលភ្លៀងមិនទៀងទាត់ វាធ្វើឲ្យ ផលិតផលកសិកម្ម ពិសេសគឺស្រូវ មានទិន្នផលធ្លាក់ចុះ និងការដាំដុះមានការលំបាក ។
លោក អាកសែល វ៉ាន់ ត្រុតសេនប៊ើគ អនុប្រធានធនាគារពិភពលោកប្រចាំតំបន់អាស៊ី បូព៌៌ា និងប៉ាស៊ីហ្វិក បានមានប្រសាសន៍ថា កំណើនសេដ្ឋកិច្ចនៅក្នុងបណ្តាប្រទេសកំពុង អភិវឌ្ឍន៍ក្នុងតំបន់ អាស៊ីបូព៌ានិងប៉ាស៊ីហ្វិក នៅតែបន្តមានភាពរឹងមាំ ប៉ុន្តែនិន្នាការនៃការថយចុះនេះប្រាប់ដល់អ្នកតាក់តែងគោលនយោបាយនានានៅក្នុងតំបន់នេះឲ្យបន្តផ្តោត ការយកចិត្តទុកដាក់លើការធ្វើកំណែទម្រង់រចនាសម្ព័ន្ធដែលជាមូលគ្រឹះសម្រាប់កំណើនសេដ្ឋកិច្ចរយៈពេលវែង និងលើគ្រប់វិស័យប្រកបដោយចីរភាព ។
« កំណែទម្រង់ទាំងនេះរួមមាន ការកែលម្អលិខិតបទដ្ឋានលើផ្នែកហិរញ្ញវត្ថុ ទីផ្សារការងារ និងផលិតផល ព្រមទាំងវិធានការនានាដែលលើកកម្ពស់តម្លាភាព និងគណនេយ្យភាព ដែលវានឹងជួយកសាងទំនុកចិត្តដល់អ្នកវិនិយោគ និងគាំទ្រដល់ទីផ្សារ ហើយនឹងជួយទ្រទ្រង់ដល់កំណើនសេដ្ឋកិច្ចដែលអាចជួយប្រជាពលរដ្ឋឲ្យរួចចាកពីភាពក្រីក្របាន » ។ នេះបើតាមប្រសាសន៍លោក អាកសែលវ៉ាន់ ត្រុតសេនប៊ើគ អនុប្រធានធនាគារពិភពលោកប្រចាំតំបន់អាស៊ីបូព៌៌ា និងប៉ាស៊ីហ្វិក បានលើកឡើង ៕
ចែករំលែកព័តមាននេះ