ខេត្តបន្ទាយមានជ័យ ៖ មន្ត្រីជាន់ខ្ពស់ក្រសួងមហាផ្ទៃជំរុញឱ្យមន្ត្រីនគរបាលធ្វើអត្តសញ្ញាណប័ណ្ណសញ្ជាតិខ្មែរគំរូថ្មីក្នុងមួយថ្ងៃឱ្យបាន១.០០០ប័ណ្ណ ដែលលើកឡើងក្នុងកិច្ចប្រជុំផ្សព្វផ្សាយនៅថ្ងៃទី៤ កញ្ញា ២០១៥ នៅសាលប្រជុំសាលាខេត្ត ។
លោកវរសេនីយ៍ទោ អ៊ុន សំអន ស្នងការនគបាលរងខេត្ត បានមានប្រសាសន៍ថា កិច្ចដំណើរការផ្តល់ជូនសរុបចំនួន៥០៤.០៥៦នាក់ ប្រជាពលរដ្ឋដែលមានអាយុ១៥ឆ្នាំដល់១៧ឆ្នាំ មានអត្តសញ្ញាណប័ណ្ណគំរូថ្មីចំនួន២៨.៣៨២នាក់ ប្រជាពលរដ្ឋមានអាយុ១៨ឆ្នាំ មានអត្តសញ្ញាណប័ណ្ណចំនួន២០០.៦៣៨នាក់ សន្ទទស្សន៍ត្រូវផ្តល់អត្តសញ្ញាណប័ណ្ណសញ្ញាតិខ្មែរគំរូថ្មីបន្តលើចំនួន២៧៥.០៣៦នាក់ ។
លោកឧត្តមសេនីយ៍ឯក សុខ ធី អគ្គស្នងការនគរបាលរង ទទួលផែនអត្តសញ្ញាណកម្មបានអានសម្រេចស្តីពីការកែសម្រួលសមាសភាពគណៈកម្មការតាមដាន និងដឹកនាំការអនុវត្តការងារអត្តសញ្ញាណប័ណ្ណសញ្ជាតិខ្មែរ សម្រេចតែងតាំង លោក គោស៊ុំ សារឿត អភិបាលខេត្ត ជាប្រធាន លោក សួន បវរ អភិបាលរងខេត្ត ជាអនុប្រធានលោកឧត្តមសេនីយ៍ត្រី អាត់ ខែម ស្នងការនគរបាលខេត្ត ជាអនុប្រធាន និងមានសមាជិកចំនួន៦រូបទៀត ។
លោក លេង វី អនុរដ្ឋលេខាធិការក្រសួងមហាផ្ទៃ បានមានប្រសាសន៍ជំរុញឱ្យមន្ត្រីនគរបាលធ្វើអត្ថសញ្ញាណប័ណ្ណត្រូវអនុវត្តន៍១ថ្ងៃឱ្យបានចំនួន១.០០០ប័ណ្ណ ទើបទាន់ការងារជូនប្រជាពលរដ្ឋ ដើម្បីឱ្យពួកគាត់ចូលរួមបោះឆ្នោតនៅអាណត្តិក្រោយនេះ ដើម្បីបំពេញកាតព្វកិច្ចជាពលរដ្ឋខ្មែរ ។ ហើយការអនុវត្តធ្វើអត្តសញ្ញាណកម្មត្រូវត្រួតពិនិត្យ និងវាយតម្លៃជាក់ស្តែងលើប្រជាពលរដ្ឋដែលត្រូវផ្តល់អត្តសញ្ញាណប័ណ្ណសញ្ជាតិខ្មែរ ដើម្បីចៀសវាងការផ្តល់ខុសលក្ខខណ្ឌជំនាញដល់ជនមានសមាសភាពមិនប្រក្រតី ៕
ចែករំលែកព័តមាននេះ