រាជធានីភ្នំពេញ ៖ រថយន្តឡិចស៊ីស RX330 បត់ឆ្វេងបុករថយន្តកាមរីហើមនៅចំណុចផ្លូវលេខ261 កែងផ្លូវលេខ218 សង្កាត់ទឹកល្អក់3 ខណ្ឌទួលគោក ហើយរថយន្តបង្កព្យាយាមបើករត់ទៅដល់កន្លែងផ្ញើរថយន្តនៅចំណុចផ្លូវលេខ123កែងផ្លូវលេខ420 សង្កាត់បឹងត្របែក ខណ្ឌចំការមន កាលពីវេលាម៉ោង១០និង៣០នាទីយប់ថ្ងៃទី២ កញ្ញា ២០១៥ ។
ប្រភពព័ត៌មានបានឲ្យដឹងថា មុនពេលកើតហេតុ រថយន្តបង្កម៉ាកឡិចស៊ីស RX330 ពណ៌ស ពាក់ស្លាកលេខភ្នំពេញ 2AF-2386 បើកបរតាមផ្លូវលេខ261 ពីជើងទៅត្បូង ក្នុងស្ថានភាពស្រវឹង ចំណែករថយន្តកាមរីហើម ពណ៌ស ពាក់ស្លាកលេខឆ8251-ភព1 បើកតាមផ្លូវលេខ២១៨ ពីកើតទៅលិច លុះមកដល់ចំណុចកើតហេតុ ស្រាប់តែរថយន្តបង្កបត់ឆ្វេងឆ្លងផ្លូវទៅបុករថយន្តកាមរីខូចខាងមុខធ្លាក់កាង និងដាច់រ៉ូទីលទៅមុខលែងរួច ចំណែករថយន្តឡិចស៊ីសសើយថ្ពាល់ខាងឆ្វេង ។
ក្រោយពេលកើតហេតុ រថយន្តបង្កព្យាយាមបើករត់គេច ត្រូវម្ចាស់រថយន្តដែលរងការខូចខាតជិះម៉ូតូឌុបដេញតាមពីក្រោយរហូតដល់កន្លែងផ្ញើរថយន្តផ្លូវលេខ123កែងផ្លូវលេខ420 សង្កាត់បឹងត្របែក ខណ្ឌចំការមន បើករថយន្តយកទៅផ្ញើហើយចេញទៅបាត់ ត្រូវបានជនរងគ្រោះទូរស័ព្ទហៅសមត្ថកិច្ចចុះមកដល់ ទើបអ្នកទទួលផ្ញើរថយន្តបានទូរស័ព្ទហៅម្ចាស់រថយន្តមកនិយាយចរចាគ្នាមិនត្រូវ ដោយសារតែរថយន្តបង្កអាងមានក្រុមហ៊ុនធានារ៉ាប់រង ទើបសមត្ថកិច្ចយករថយន្តបង្កទៅដោះស្រាយនៅអធិការដ្ឋាននគរបាលខណ្ឌទួលគោកវិញ ៕
ចែករំលែកព័តមាននេះ