រាជធានីភ្នំពេញ ៖ រឿងហេតុគួរឱ្យហួសចិត្តមួយបានកើតឡើងដោយសារតែរថយន្តស្ទូច១គ្រឿងបើកៗធ្លាក់ដែក១ដុំទម្ងន់ប្រហែល៥-៦តោន មានទទឹងប្រហែល១ម៉ែត្រ បណ្តោយប្រហែល២ម៉ែត្រ លាន់ដូចរន្ទះ និងបណ្តាលឱ្យស្រុតផ្លូវថ្នល់អស់១ដុំធំ ។ ហេតុការណ៍នេះកើតឡើងកាលពីវេលាម៉ោង១០យប់ ថ្ងៃទី៣១ សីហា ២០១៥ នៅតាមបណ្តោយមហាវិថីព្រះមុនីវង្ស កែងផ្លូវ២៤២ ស្ថិតក្នុងសង្កាត់បឹងព្រលិត ខណ្ឌ៧មករា ។
ប្រភពដែលបានឃើញហេតុការណ៍បានឱ្យដឹងថា មុនពេលកើតហេតុ គេឃើញរថយន្តស្ទូច១គ្រឿង ពណ៌ស ពាក់ស្លាកលេខ ភ្នំពេញ 3B-4765 ដឹកដុំដែក២ដុំ បើកតាមបណ្តោយមហាវិថីព្រះមុនីវង្ស ក្នុងទិសដៅពីជើងទៅត្បូង ស្រាប់តែមកដល់កន្លែងកើតហេតុក៏ធ្លាក់ដែក១ដុំមកខាងស្តាំលាន់ដូចរន្ទះ បង្កឱ្យមានការភ្ញាក់ផ្អើលដល់ប្រជាពលរដ្ឋដែលនៅម្តុំនោះ ហើយបានបណ្តាលឱ្យស្រុតថ្នល់(ដូចក្នុងរូបភាព) អស់១ដុំធំទៀតផង ។
ក្រោយពេលកើតហេតុរថយន្តស្ទូចនោះក៏បានស្ទូចដែកនោះដាក់លើឡានវិញហើយបើកទៅមុខបន្តទៀត ធ្វើដូចធម្មតា មិនមានរំខានពីសមត្ថកិច្ចណាឡើយ ។
ប្រភពនៅកន្លែងកើតហេតុបានបន្តទៀតថា សំណាងណាស់ដែលគ្មានម៉ូតូ ឬឡានបើកក្បែរនោះ ព្រោះដែកមានទម្ងន់ធ្ងន់បែបនេះបើធ្លាក់ត្រូវម៉ូតូ ឬឡានវិញ មិនដឹងជាយ៉ាងណានោះទេ ។ តែទោះជាយ៉ាងណាហេតុការណ៍នេះមិនបណ្តាលឱ្យមានគ្រោះថ្នាក់ដល់អាយុជិវិត ឬរងរបួសឡើយ ព្រមទាំងមិនរំខានដល់សមត្ថកិច្ចណាម្នាក់ទៀតផង ។
ប្រជាពលរដ្ឋនៅម្តុំកន្លែងកើតហេតុ ក៏ដូចជាប្រជាពលរដ្ឋទាំងអស់បានសំណូមពរតាមរយៈ «កោះសន្តិភាព»ថា សូមអស់លោកដែលបើករថយន្តដឹករបស់ធ្ងន់ៗបែបនេះ ពិសេសរថយន្តស្ទូច និងរថយន្តកុងតឺន័រ សូមមេត្តាមានការប្រុងប្រយ័ត្នផង កុំមានការធ្វេសប្រហែសដូចរថយន្តស្ទូចខាងលើនេះអី ព្រោះថាបើធ្លាក់របស់ធ្ងន់ៗបែបនេះវាអាចបង្កគ្រោះថ្នាក់ដល់អាយុជីវិតរបស់អ្នកដទៃដែលធ្វើដំណើរតាមដងផ្លូវជាយថាហេតុបាន និងសំណូមពរដល់សាលារាជធានីភ្នំពេញ ដែលជាអាជ្ញាធរដែនដី សូមពិនិត្យ និងមានវិធានការឱ្យបានតឹងរឹងចំពោះរថយន្តដែលដឹកធ្ងន់ៗឱ្យមានការប្រុងប្រយ័ត្ន កុំឱ្យមានការធ្វេសប្រហែល ដែលអាចបង្កគ្រោះថ្នាក់ដល់អាយុជីវិតជាយថាហេតុបាន ៕
ចែករំលែកព័តមាននេះ