ខេត្តបន្ទាយមានជ័យ ៖ ដើម្បីឲ្យភូមិ/ឃុំមានសុវត្ថិភាព ពិសេសការលុបបំបាត់នូវគ្រឿងញៀន លោកឧត្តមសេនីយ៍ត្រី អាត់ ខែម ស្នងការនគរបាលខេត្តតែងតែក្រើនរំឭកដល់ការិយាល័យនគរបាលប្រឆាំងគ្រឿងញៀន ត្រូវតែចុះបង្ក្រាបឲ្យដូចជាភ្លៀងរលឹម ចំពោះបញ្ហាគ្រឿងញៀន ។
ជាលទ្ធផលនៅវេលាម៉ោង១២និង២០នាទីថ្ងៃត្រង់ថ្ងៃទី២៦ សីហា ២០១៥ កម្លាំងនគរបាលការិយាល័យប្រឆាំងគ្រឿងញៀនចាប់ឃាត់ខ្លួនជនសង្ស័យជួញដូរ និងប្រើប្រាស់គ្រឿងញៀនបានចំនួន១៣នាក់ រួមទាំងវត្ថុតាងមួយចំនួនទៀត នៅចំណុចរ៉ារថភ្លើង ស្ថិតក្នុងភូមិសែសិន សង្កាត់អូរអំបិល ក្រុងសិរីសោភ័ណ ។
លោកវរសេនីយ៍ទោ ធិន ស៊ិនដេត នាយការិយាល័យនគរបាល បានឲ្យដឹងថា ក្នុងកិច្ចប្រតិបត្តិការបង្ក្រាបគ្រឿងញៀននេះ កម្លាំងបានចាប់ឃាត់ខ្លួនស្ត្រីម្នាក់ជាអ្នកជួញដូរគ្រឿងញៀន ឈ្មោះ ឡាយ ញ៉ា អាយុ២៦ឆ្នាំ ទីលំនៅមិនពិតប្រាកដ និងអ្នកប្រើប្រាសថ្នាំញៀនសរុបចំនួន១២នាក់ទៀត ជាមួយគ្នានោះដែរ សមត្ថកិច្ចដកហូតបានវត្ថុតាងមានថ្នាំញៀនប្រភេទមេតំហ្វេតាមីនគ្រាប់ពណ៌ក្រហមចំនួន៨គ្រាប់ រថយន្ត១គ្រឿង ម៉ូតូចំនួន៧គ្រឿង និងសម្ភារសម្រាប់ជក់មួយចំនួនទៀត ។
ជនសង្ស័យទាំង១៣នាក់ខាងលើ រួមនឹងវត្ថុតាង ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្ត នៅព្រឹកថ្ងៃទី២៧ សីហា២០១៥ ៕
ចែករំលែកព័តមាននេះ