ខេត្តមណ្ឌលគិរី ៖ លោក អេង ប៊ុនហ៊ាង អភិបាលខេត្តមណ្ឌលគិរី និងមន្ត្រីរាជការជុំវិញខេត្តបាននាំយកទៀនព្រះវស្សា និងទេយ្យទានរបស់ខេត្តមកប្រគេនដល់វត្តចំនួន២២នៅទូទាំងក្រុង/ស្រុកទាំង៥ របស់ខេត្ត ពិធីនេះឡើងនៅក្នុងវត្តសែនមនោរម្យ ស្ថិតនៅក្រុងសែនមនោរម្យ កាលពីព្រឹកថ្ងៃទី២៩ កក្កដានេះ។
លោក អេង ប៊ុនហ៊ាង បានមានប្រសាសន៍ថា វិស័យព្រះពុទ្ធសាសនាបច្ចុប្បន្ននេះមានការរីកចម្រើនគួរឲ្យកត់សំគាល់ដើម្បីរួមចំណែកក្នុងវិស័យពុទ្ធសាសនាជាមួយរាជរដ្ឋាភិបាល។ ជារៀងរាល់ឆ្នាំ និងមន្ត្រីរាជការក្នុងខេត្តតែងតែនាំទេយ្យវត្ថុ និងទៀនវស្សាប្រគេនជូនព្រះសង្ឃដែលកំពុងគង់ចាំព្រះវស្សាក្នុងវត្តនីមួយៗក្នុងទូទាំងខេត្តមណ្ឌលគិរីដែលស្របទៅតាមជំនឿប្រពៃណីរបស់ប្រជាជនខ្មែរ ដែលជាអ្នកកាន់ព្រះពុទ្ធសាសនាតាំងពីដើមរៀងមក។
លោកបានបន្តទៀតថា ពាក់ព័ន្ធទៅនឹងប្រពៃណីដ៏ល្អរបស់ប្រជាជាតិខ្មែរ ដែលជានិច្ចកាលតែងផ្សារភ្ជាប់ជាមួយនឹងព្រះពុទ្ធសាសនានៅក្នុងរដូវចូលព្រះវស្សានេះ ព្រះសង្ឃត្រូវគង់ចាំព្រះវស្សានៅក្នុងវត្ត ហើយមិនអាចចេញទៅបិណ្ឌបាត្រនៅក្រៅវត្តបានទេ ដូច្នេះពុទ្ធបរិស័ទត្រូវយកចង្ហាន់ និងសម្ភារនានា មកប្រគេនព្រះសង្ឃក្នុងរយៈពេលនេះ។
ទេយ្យទានដែលបានយកមកប្រគេននាឱកាសនោះ ក្នុងមួយវត្តៗ ទទួលបានបច្ច័យ២០ម៉ឺនរៀល ទៀនព្រះវស្សា១គូ អង្ករ១បាវ ស្ករស ទឹកដោះគោ ទឹកក្រូច ទឹកបរិសុទ្ធ២កេស និងមី១កេស ទឹកត្រី១យូរ និង ទឹកស៊ីអ៊ីវ១យូរ និងបានប្រគេនបច្ច័យដល់យាយជី តាជី ក្នុងម្នាក់ៗទទួលបាន១ម៉ឺនរៀលផងដែរ៕
ចែករំលែកព័តមាននេះ