ខេត្តប៉ៃលិន ៖ បុរសប្រមឹកអនាថាម្នាក់មានជម្ងឺធ្ងន់ធ្ងរត្រូវគេប្រទះឃើញដេកសន្លប់ស្តូកស្តឹងនៅលើគ្រែមុខផ្ទះរបស់ប្រជាពលរដ្ឋ ត្រូវប្រជាពលរដ្ឋរាយការណ៍ទៅសមត្ថកិច្ចឱ្យប្រញាប់ទៅដឹកយកទៅសង្គ្រោះ
ខេត្តប៉ៃលិន ៖ បុរសប្រមឹកអនាថាម្នាក់មានជម្ងឺធ្ងន់ធ្ងរត្រូវគេប្រទះឃើញដេកសន្លប់ស្តូកស្តឹងនៅលើគ្រែមុខផ្ទះរបស់ប្រជាពលរដ្ឋ ត្រូវប្រជាពលរដ្ឋរាយការណ៍ទៅសមត្ថកិច្ចឱ្យប្រញាប់ទៅដឹកយកទៅសង្គ្រោះនៅមន្ទីរពេទ្យបង្អែកខេត្តប៉ៃលិនទាន់ពេល ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៧ និង៤០នាទីយប់ ថ្ងៃទី២៧ កក្កដា ២០១៥ ស្ថិតនៅក្បែរផ្សារប៉ាងរលឹម សង្កាត់អូរតាវ៉ៅ ក្រុងប៉ៃលិន ។
ប្រភពព័ត៌មានបានឱ្យដឹងថា ជនអនាថារងគ្រោះមានឈ្មោះ ម៉ៅ ភេទប្រុស អាយុ៤៥ឆ្នាំ មានលំនៅមិនពិតប្រាកដ ដើរដេកតាមតូបមុខផ្ទះប្រជាពលរដ្ឋក្នុងភូមិខាងលើ ។
បើតាមប្រជាពលរដ្ឋបានឱ្យដឹងថា មុនពេលកើតហេតុគេឃើញបុរសខាងលើធ្វើដំណើរពីខេត្តបាត់ដំបងមកប៉ៃលិន ដោយសុំរថយន្តគេជិះមកចុះនៅខាងមុខផ្សារប៉ាងរលឹម រួចក៏ចាប់ផ្តើមដើរសុំថវិកាអ្នកភូមិដើម្បីទិញបាយហូប ។
ប្រភពបន្តទៀតថា នៅពេលសួរនាំជនរងគ្រោះមិនបានប្រាប់ថា រូបគេមកពីខេត្តណានោះឡើយ គ្រាន់តែប្រាប់ថា អត់មានឪពុកម្តាយបងប្អូនឡើយ រូបគេបានទៅធ្វើការងារនៅប្រទេសថៃ ហើយត្រូវថៅកែបោកលុយ កាក់មិនព្រមបើកប្រាក់ខែឱ្យនោះឡើយ ។
រហូតដល់ប៉ុន្មានថ្ងៃមុនរូបគេត្រូវតម្រួតថៃចាប់បញ្ជូនតាមរថយន្តចូលមកតាមច្រកឡែមខេត្តបាត់ដំបង ហើយដោយរូបគេគ្មានគោលដៅច្បាស់លាស់ទើបសុំដោយសាររថយន្តគេមកខេត្តប៉ៃលិន ដើម្បីរកការងារធ្វើ បានប្រាក់ទិញអាហារទទួលទាន ។ ប៉ុន្តែដោយសាររូបគេមានជម្ងឺរលាកក្រពះ ពោះវៀន និងជម្ងឺស្ពឹកដៃជើង ព្រោះខ្វះជីវជាតិ ទើបធ្វើការអ្វីមិនកើតក៏ដេកសន្លប់នៅលើគ្រែអ្នកភូមិបង្កឱ្យមានការភ្ញាក់ផ្អើលទាំងយប់ តែម្តងទៅ ។
លោកគ្រូពេទ្យបញ្ជាក់ថា បច្ចុប្បន្នជនរងគ្រោះកំពុងសម្រាកព្យាបាលនៅមន្ទីរពេទ្យបង្អែក ដោយអត់មានញាតិសណ្តានណាម្នាក់ចាំមើលថែរក្សារូបគេនោះឡើយ ដោយបានគ្រូពេទ្យនៅទីនោះហុចបាយ និងមើលថែរាល់ថ្ងៃ ។ ទោះបីជាយ៉ាងណា ក៏មិនដូចឪពុកម្តាយរបស់ខ្លួនដែរ ហើយបើសិនជាមាននរណាម្នាក់បាត់សាច់ញាតិដែលមានឈ្មោះដូចខាងលើអាចធ្វើដំណើរទៅរកនៅក្នុងមន្ទីរពេទ្យបង្អែកខេត្តប៉ៃលិន ៕
ចែករំលែកព័តមាននេះ