រាជធានីភ្នំពេញ ៖ សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៦ គ្រោងដាក់ជូនអង្គប្រជុំសភាអនុម័តនៅពេលឆាប់ៗខាងមុខ នេះបើតាមការឲ្យដឹងពីលោក ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា
រាជធានីភ្នំពេញ ៖ សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៦ គ្រោងដាក់ជូនអង្គប្រជុំសភាអនុម័តនៅពេលឆាប់ៗខាងមុខ នេះបើតាមការឲ្យដឹងពីលោក ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា ។
លោក ជាម យៀប ថ្លែងប្រាប់អ្នកសារព័ត៌មានបែបនេះ ក្រោយកិច្ចប្រជុំពិភាក្សាជាមួយរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ លោកអូន ព័ន្ធមុនីរ័ត្ន កាលពីព្រឹកថ្ងៃទី២៥ ឧសភា នៅវិមានរដ្ឋសភា ។ លោកថា សេចក្តីព្រាងច្បាប់ហិរញ្ញវត្ថុ ឆ្នាំ២០១៦ ត្រូវបានរាជរដ្ឋាភិបាលផ្តោតសំខាន់ទៅលើក្រសួងចំនួន១០ ប៉ុន្តែលោកមិនបានរៀបរាប់ឱ្យដឹងពីក្រសួងទាំងអស់ទេ គ្រាន់តែប្រាប់ត្រួសៗថាមានក្រសួងអប់រំយុវជន និងកីឡា ក្រសួងសុខាភិបាល ក្រសួង អភិវឌ្ឍន៍ជនបទ ក្រសួងកិច្ចការនារី ក្រសួងរៀបចំដែនដីនគរូបនីយកម្ម និងសំណង់ប៉ុណ្ណោះ ។ ក្នុងនោះ ក្រសួងមហាផ្ទៃ និងក្រសួងការពារជាតិមិនត្រូវបានចាត់ចូលជាក្រសួងអាទិភាពនិងសំខាន់ក្នុងក្រសួងទាំង១០នោះទេ ។
លោក ជាម យៀប លើកឡើងទៀតថា លោកបានពិភាក្សាជាមួយរដ្ឋមន្ត្រីក្រសួងហិរញ្ញវត្ថុ លើការបញ្ចប់សេចក្តីព្រាងច្បាប់សី្តពីការទូទាត់ថវិកាទូទៅរបស់រដ្ឋ សម្រាប់ការគ្រប់គ្រងឆ្នាំ២០១៣ ហើយនឹងដាក់ឲ្យសភាអនុម័តនៅពេលខាងមុខ ។ លោកថា សម្រាប់ក្រសួងដែលមានអាទិភាពចំនួន១០ នឹងត្រូវចំណាយឲ្យស្របតាមផែនការរបស់រាជរដ្ឋាភិបាល ដើម្បីបម្រើពលរដ្ឋតាមតម្រូវការនៅតាមមូលដ្ឋាន ។ ទាក់ទិននឹងចំណូលចំណាយ ថវិកាជាតិទាំងមូល ក៏ដូចជាតាមក្រសួងនានានោះ លោក ជាម យៀប មិនទាន់ឲ្យដឹងនោះទេ ប៉ុន្តែលោកថា សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៦ ត្រូវបានធ្វើសិក្ខាសាលាពិគ្រោះយោបល់គ្នារួចហើយ កាលពីពេលកន្លងមក ។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ធ្លាប់បានឲ្យដឹងថា គម្រោងចំណាយសរុបសម្រាប់ឆ្នាំ២០១៥ ស្មើជាង១៥លានលានរៀល ឬប្រហាក់ប្រហែលជិត៤ពាន់លានដុល្លារអាមេរិក ហើយឆ្នាំ២០១៦ខាងមុខ រាជរដ្ឋាភិបាលគ្រោងចំណាយកើនឡើងរហូតដល់ទៅជាង១១% ។
លោករដ្ឋមន្ត្រីបានឱ្យដឹងដែរថា ក្របខ័ណ្ឌម៉ាក្រូសេដ្ឋកិច្ចសម្រាប់ឆ្នាំ២០១៦ នឹងរក្សាបានកំណើនក្នុងរង្វង់៧% ក្នុងនោះវិស័យកសិកម្មអាចនឹងសម្រេចបានកំណើនប្រមាណ៤,៣% វិស័យឧស្សាហកម្មប្រមាណ៩,៦% និងវិស័យទេសចរណ៍ និងសេវាកម្មប្រមាណ៦,៥% ៕
ចែករំលែកព័តមាននេះ