រាជធានីភ្នំពេញ ៖ ទារក និងទារិកាភ្លោះបីនាក់របស់សម្តេចតេជោបានចាប់កំណើតក្នុងគ្រួសារក្រីក្រនៅខេត្តពោធិ៍សាត់ត្រូវបានក្រុមគ្រួសារបញ្ជូនមកសង្គ្រោះនៅមន្ទីរពេទ្យកុមារជាតិឯរាជធានីភ្នំពេញ
រាជធានីភ្នំពេញ ៖ ទារក និងទារិកាភ្លោះបីនាក់របស់សម្តេចតេជោបានចាប់កំណើតក្នុងគ្រួសារក្រីក្រនៅខេត្តពោធិ៍សាត់ត្រូវបានក្រុមគ្រួសារបញ្ជូនមកសង្គ្រោះនៅមន្ទីរពេទ្យកុមារជាតិឯរាជធានីភ្នំពេញកាលពីថ្ងៃទី២២ ឧសភា ២០១៥ ដោយសារទារក និងទារិកាទាំង៣កើតមកអត់គ្រប់គីឡូ។
ប្រភពបានឱ្យដឹងថា ឪពុកទារក និងទារិកាភ្លោះទាំង៣មានឈ្មោះហ៊ុន វាសនា អាយុ២៨ឆ្នាំ ជាកម្មករសំណង់ និងម្តាយឈ្មោះជា ណារី អាយុ៣០ឆ្នាំ មានទីលំនៅភូមិស្តុកស្វាយ ឃុំស្នាមព្រះ ស្រុកបាកាន ខេត្តពោធិ៍សាត់។
តាមឪពុកកូនភ្លោះទាំង៣បានឱ្យដឹងថា កូនភ្លោះរបស់គាត់បានចាប់កំណើតតាំងពីថ្ងៃទី២១ ឧសភា វេលាម៉ោង១១យប់ នៅមន្ទីរពេទ្យខេត្តពោធិ៍សាត់ តែដោយសារពួកគេកើតមកអត់គ្រប់គីឡូ ដែលកូនបងភេទស្រីទម្ងន់១គីឡូក្រាម រីឯកូនទី២ និងទី៣ ភេទប្រុស ទម្ងន់១គីឡូ៣ខាំ ទើបគ្រូពេទ្យខេត្តបានចាត់ចែងបញ្ជូនមកពេទ្យកុមារជាតិនៅវេលាម៉ោង១២ និង៣០នាទីថ្ងៃត្រង់ ថ្ងៃទី២២ ឧសភា ដើម្បីសង្គ្រោះ។
ឪពុកទារកភ្លោះខាងលើបានប្រាប់ឱ្យដឹងទៀតថា នេះជាកូនលើកទី៣ហើយ បន្ទាប់ពីកូនទី១ ប្រុស អាយុ១២ឆ្នាំ កូនទី២ ប្រុសដែរ អាយុ៤ឆ្នាំ ។
ប្រភពបានឱ្យដឹងថា នៅព្រឹកថ្ងៃទី២៦ ឧសភា នេះទារក និងទារិកាភ្លោះទាំង៣នាក់កំពុងស្ថិតក្នុងបន្ទប់សង្គ្រោះបន្ទាន់នៅឡើយ ក្នុងចំណោមពួកគេទាំង៣នាក់ កូនទី២ មានអាការធ្ងន់ធ្ងរជាងគេ៕
ព័ត៌មានលម្អិតសូមរង់ចាំអាននៅលើទំព័រកាសែតកោះសន្តិភាព
ចែករំលែកព័តមាននេះ