ខេត្តស្វាយរៀង ៖ ស្ត្រីម្នាក់គិតខ្លីយកថ្នាំវីតាមីនលេបប៉ងសម្លាប់ខ្លួន ហើយចោទថា ប្តីលបលួចនិយាយទូរស័ព្ទទាក់ទងជាមួយប្រពន្ធដើមដែលលែងលះគ្នាជាង២០ឆ្នាំមកហើយ តែត្រូវបុរសជាប្តីបដិសេធថា នេះជាលេសដោះស្រាយជាមួយគ្រូពេទ្យទេ ការពិតគឺជារឿងចាញ់ល្បែងកន្ទុយលេខរហូតយកប្លង់ផ្ទះទៅបញ្ចាំនៅធានាគារ ពេលប្តីស្តីបន្ទោសផ្ទុះកំហឹងកើតជម្លោះយកថ្នាំវីតាមីនលេបសម្លាប់ខ្លួន។
ករណីនេះបានកើតឡើងកាលពីវេលាម៉ោង១២ថ្ងៃត្រង់ ថ្ងៃទី២៤ ឧសភា ២០១៥ នៅភូមិមេភ្លើង សង្កាត់ស្វាយរៀង ក្រុងស្វាយរៀង។ បើតាមបុរសជាប្តីឈ្មោះកឹម សែម អាយុ៦០ឆ្នាំ មុខរបរជាងជួសជុលម៉ាស៊ីនភ្លើងនៅភូមិកើតហេតុខាងលើបានឲ្យដឹងថា ប្រពន្ធរបស់គាត់ឈ្មោះសួន សាមិន ហៅសម្ផស្ស អាយុ៤២ឆ្នាំ មានកូននៅក្នុងបន្ទុក៦នាក់។
បុរសជាប្តីបន្តទៀតថា រូបគាត់បានលែងលះប្រពន្ធដើម និងបានមករួមរស់ជាមួយប្រពន្ធក្រោយនេះជាង២០ឆ្នាំមកហើយ គឺរស់នៅជាមួយគ្នាផ្អែមល្ហែមណាស់ តែប៉ុន្មានឆ្នាំចុងក្រោយនេះប្រពន្ធគាត់ចេះលេងល្បែងចាក់កន្ទុយលេខ ហើយចាញ់ដល់ថ្នាក់យកប្លង់ផ្ទះទៅបញ្ចាំនៅធានាគារដោយប្រាប់ថា យកប្រាក់មកធ្វើដើមទុនរកស៊ីដឹងអីមិនរាងចាលនៅលួចទៅចាក់កន្ទុយលេខដដែល ហើយពេលគាត់តាមទាន់ស្តីបន្ទោសបន្តិបន្តួចង៉ក់ងរត់ទៅភ្នំពេញ។
ក្រោយមកប្រមាណជាង១០ថ្ងៃកូនស្រីពៅមានជម្ងឺធ្ងន់ក៏យកទៅព្យាបាលនៅភ្នំពេញ កូនចង់ជួបម្តាយបុរសជាប្តីក៏ហៅមកឲ្យជួបកូន ហើយបានអង្វរឲ្យប្រពន្ធត្រឡប់មកផ្ទះវិញកូនៗត្រូវការម្តាយ និងបាននិយាយឈប់ឲ្យប្រពន្ធលេងល្បែងទៀត ពីព្រោះល្បែងវាគ្មានកំណើតទេ ហើយប្រពន្ធក៏យល់ព្រម និងបានស្បថស្បែរថា ឈប់លេងល្បែងចាក់កន្ទុយលេខទៀតហើយ។
កន្លងមកបានតែ១ឆ្នាំខ្មោចល្បែងចូលម្តងទៀត ស្រាប់តែប្រព្រឹត្តចាក់កន្ទុយលេខលើសដើម ហើយនៅថ្ងៃកើតហេតុគាត់ទៅទាន់ចាក់កន្ទុយលេខបញ្ចាំអត្តសញ្ញាណប័ណ្ណទើបស្តីបន្ទោសក៏ផ្ទុះជម្លោះ ក្រោយមកប្រពន្ធគាត់គិតខ្លីក៏យកថ្នាំវីតាមីនប្រមាណ៧គ្រាប់លេបប៉ុនប៉ងសម្លាប់ខ្លួនតែម្តង។
ចំណែកស្ត្រីគិតខ្លីនិយាយទាំងទឹកភ្នែកថា មូលហេតុគាត់លេបថ្នាំសម្លាប់ខ្លួនដោយសារតែប្តីគាត់លួចនិយាយទូរស័ព្ទទាក់ទងទៅប្រពន្ធដើមនិយាយមិនស្តាប់ទើបខឹងលែងចង់រស់ ។ អ្វីដែលធ្វើឱ្យគេកាន់តែហួសចិត្តនោះពេលបញ្ជូនទៅដល់មន្ទីរពេទ្យហើយមិនព្រមឲ្យគ្រូពេទ្យជួយសង្គ្រោះទេ នៅឈ្លោះជាមួយប្តីទារយកស៊ីមទូរស័ព្ទកាច់ចោលទើបយល់ព្រមព្យាបាល៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ