រាជធានីភ្នំពេញ ៖ កម្ពុជា និងខេត្តក្វាងទុង ប្រទេសចិនមានទំនាក់ទំនងពាណិជ្ជកម្មកាន់តែខ្លាំងឡើងៗពីមួយឆ្នាំទៅមួយឆ្នាំ ដោយភាគីទាំងពីរបានធ្វើសកម្មភាពទាក់ទងនឹងពាណិជ្ជកម្មជាច្រើនដូចជា
រាជធានីភ្នំពេញ ៖ កម្ពុជា និងខេត្តក្វាងទុង ប្រទេសចិនមានទំនាក់ទំនងពាណិជ្ជកម្មកាន់តែខ្លាំងឡើងៗពីមួយឆ្នាំទៅមួយឆ្នាំ ដោយភាគីទាំងពីរបានធ្វើសកម្មភាពទាក់ទងនឹងពាណិជ្ជកម្មជាច្រើនដូចជា ជួបពិភាក្សា និងការរៀបចំតាំងពិព័រណ៍បង្ហាញពីផលិតផលជាដើម ។ ដោយសារទំនាក់ទំនងរវាងកម្ពុជា និងចិនមានភាពជិតស្និទ្ធជាយូរមកហើយ ជាពិសេសទំនាក់ទំនងរវាងកម្ពុជា និងតាមបណ្ដាខេត្តសក្ដានុពលនៃប្រទេសចិនមួយចំនួន ធ្វើឲ្យទំហំពាណិជ្ជកម្មភាគីទាំងពីរកើនឡើងគួរឲ្យគត់សម្គាល់ ។ ជាក់ស្ដែងទំនាក់ទំនងពាណិជ្ជកម្មរវាងកម្ពុជា និងខេត្តក្វាងទុង ប្រទេសចិន ក្នុងមួយឆ្នាំ បើគិតជាទឹកប្រាក់មានប្រមាណ៧៨០លានដុល្លារ ក្នុងនោះទំនិញនាំចេញពីខេត្តក្វាងទុងមកកាន់កម្ពុជាមានប្រមាណ៦៩០លានដុល្លារសហរដ្ឋអាមេរិក ។ នេះជាប្រសាសន៍លោក លី ស៊ាវជា អគ្គលេខាធិការរងនៃខេត្តក្វាងទុង ដែលបានដឹកនាំគណៈប្រតិភូមកផ្សព្វផ្សាយ និងពិភាក្សាជាមួយពាណិជ្ជករកម្ពុជា ស្តីពីការរៀបចំពិព័រណ៍អន្តរជាតិផ្លូវសូត្រសមុទ្រ សតវត្សរ៍ទី២១ ដែលនឹងប្រព្រឹត្តនៅខេត្តក្វាងទុង ។
លោកបន្តថា កន្លងមកផលិតផលរបស់ខេត្តក្វាងទុង ដែលនាំចូលមកកាន់កម្ពុជា គឺទទួលបានជោគជ័យរួមមាន ផលិតផលគ្រឿងចក្រកសិកម្ម ផលិតផលសំណង់ និងផលិតផលប្រើប្រាស់ជាច្រើនទៀត ។ មិនតែប៉ុណ្ណោះ ខេត្តក្វាងទុងក៏ចង់ឲ្យផលិតផលរបស់កម្ពុជា មានឈ្មោះល្បីនៅលើឆាកអន្តរជាតិផងដែរ ដោយរាល់ពេលមានព្រឹត្តិការណ៍ប្រចាំឆ្នាំរបស់ខេត្តក្វាងទុងដូចជា ព្រឹត្តិការណ៍តាំងបង្ហាញផលិតផលអន្តរជាតិ ភាគីចិនតែងតែផ្សព្វផ្សាយដល់ពាណិជ្ជករកម្ពុជា ដើម្បីនាំយកផលិតផលរបស់ខ្លួនទៅបង្ហាញនៅលើឆាកអន្តរជាតិ និងស្វែងរកដៃគូនាំចេញនាំចូលជាដើម ។
គួរបញ្ជាក់ថា ខេត្តក្វាងទុងគឺជាខេត្តនាំមុខចាប់តាំងពីប្រទេសចិនចាប់ផ្ដើមធ្វើកំណែទម្រង់និងបានអនុវត្តគោលនយោបាយបើកចំហ ហើយក៏បានដើរតួនាទីជាស្ពាននាំមុខសម្រាប់ប្រទេសចិនក្នុងការអភិវឌ្ឍវិនិយោគនិងពាណិជ្ជកម្មជាមួយបណ្ដាប្រទេសផ្សេងៗជាច្រើននៅក្នុងពិភពលោក ។
ក្នុងអំឡុងពេល៣០ឆ្នាំកន្លងទៅ ខេត្តក្វាងទុងបានចូលរួមយ៉ាងសកម្មក្នុងកិច្ចសហប្រតិបត្តិការសេដ្ឋកិច្ចអន្តរជាតិ និងការប្រកួតប្រជែង រួមទាំងបានបង្កើតទំនាក់ទំនងពាណិជ្ជកម្មរឹងមាំរយៈពេលយូរជាមួយប្រទេសនិងដៃគូក្នុងតំបន់ជាង២០០ ជាមួយនឹងការអភិវឌ្ឍសេដ្ឋកិច្ច ប្រកបដោយនិរន្តរភាព និងយ៉ាងឆាប់រហ័ស ។ ម្យ៉ាងអត្រាកំណើននៃផលិតផលក្នុងស្រុកសរុបរបស់ខេត្តក្វាងទុង បានស្ថិតនៅលំដាប់លេខ១ នាំមុខគេក្នុងប្រទេសចិនអស់រយៈពេល២៥ឆ្នាំមកហើយ៕
ចែករំលែកព័តមាននេះ