រាជធានីភ្នំពេញ ៖ គណៈបញ្ជាការឯកភាពខណ្ឌប្ញស្សីកែវ នៅព្រឹកថ្ងៃទី២ មេសា នេះ បានជួបប្រជុំមន្ត្រីរាជការជុំវិញសាលាខណ្ឌដើម្បីដាក់ផែនការ និងណែនាំឱ្យអាជ្ញាធរមូលដ្ឋានយកចិត្តទុកដាក់ ការពារសន្តិសុខ សណ្តាប់ធ្នាប់ក្នុងឱកាសបុណ្យចូលឆ្នាំប្រពៃណីជាតិខ្មែរខាងមុខនេះ ធ្វើយ៉ាងណាបង្កលក្ខណៈឱ្យប្រជាពលរដ្ឋធ្វើដំណើរកម្សាន្តប្រកបដោយសុវត្ថិភាព និងសប្បាយរីករាយ។
អង្គប្រជុំនេះធ្វើឡើងក្រោយអធិបតីភាពលោកកូប ស្លេះ អភិបាលរងខណ្ឌ និងជាតំណាងលោកធុយ សុខន អភិបាលខណ្ឌប្ញស្សីកែវ។ ក្នុងអង្គប្រជុំនេះ លោកកូប ស្លេះ បានណែនាំឱ្យកងកម្លាំងសមត្ថកិច្ច ក៏ដូចជាអាជ្ញាធរមូលដ្ឋានយកចិត្តទុកដាក់ការពារ និងពង្រឹងសន្តិសុខជូនពលរដ្ឋឱ្យបានល្អ។
លោកក៏បានណែនាំដល់មេប៉ុស្តិ៍ត្រូវយកចិត្តទុកដាក់ពេលប្រជាពលរដ្ឋរាយការណ៍តាមទូរស័ព្ទ ឬមកប្តឹង ជៀសវាងអាជ្ញាធរ ឬសមត្ថកិច្ចដែលប្រចាំការឆ្លើយថាជាប់រវល់ ត្រូវមានវិធានការជាបន្ទាន់ដើម្បីជួយដល់ពួកគាត់ ជាពិសេសលោកបានណែនាំឱ្យអាជ្ញាធរ និងសមត្ថកិច្ចយកចិត្តទុកដាក់ចំពោះអគ្គិភ័យ ចោរគាស់ផ្ទះ ល្បែងស៊ីសងជាដើម ព្រមទាំងបំផុសឱ្យពលរដ្ឋតុបតែងលំអ និងដាក់ទង់ជាតិដើម្បីឱ្យមានសោភ័ណភាពក្នុងមូលដ្ឋានផងដែរ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ