ខេត្តសៀមរាប ៖ បើទោះបីជាប្រមុខរាជរដ្ឋាភិបាលកម្ពុជាធ្លាប់បានចេញនូវសារាចរដើម្បីបញ្ចប់ការកាប់ឈើគ្រញូងទាំងនៅក្នុងទឹកដីកម្ពុជា ទាំងនៅក្នុងទឹកដីប្រទេសជិតខាងក្តី រហូតមកទល់ពេលនេះក្រុមឧក្រិដ្ឋជនព្រៃឈើនៅតែបន្តសកម្មភាពដឹកជញ្ជូនឈើប្រភេទជិតផុតពូជនេះតាមគ្រប់រូបភាពដដែល ។
សកម្មភាពដឹកជញ្ជូនឈើគ្រញូងពីតំបន់ខេត្តភាគឧត្តរជាប់ព្រំដែនខ្មែរ-ថៃ ត្រូវបានគេមើលឃើញថា បានបន្តកើតឡើងគ្រប់រូបភាពចាប់តាំងពីឆ្នាំ ២០០៨ រហូតមកតាមរថយន្តតូចធំ និងតាមបែបបន្លំភ្នែក ដូចជាបង្កប់ក្រោមរថយន្តដឹកទំនិញផ្សេងៗ ឬក៏ហ៊ានរហូតដល់ថ្នាក់ក្លែងបន្លំដឹកតាមរថយន្តពេទ្យ, រថយន្តអង្គភាពកាកបាទក្រហម, រថយន្តក្រុមហ៊ុនសាំង, រថយន្តស្រាបៀរ, និងរថយន្តអង្គការក្រៅរដ្ឋាភិបាល ជាដើម។ ប៉ុន្តែយូៗម្តងក៏ត្រូវបានសមត្ថកិច្ចបង្គ្រាបបានម្តងម្កាលដែរ ជាក់ស្តែងនៅព្រឹកថ្ងៃទី០១ មេសា ២០១៥ នេះ សមត្ថកិច្ចចំរុះមួយក្រុមបានស្ទាក់ចាប់រថយន្តធុនតូចមួយគ្រឿង ដែលមានបំពាក់ស្លាកលេខ(OI )ដែលគេស្គាល់ថា ជាប្រភេទស្លាកលេខអង្គការក្រៅរដ្ឋាភិបាល ដោយមានផ្ទុកកំណាត់ឈើគ្រញូងចំនួន១៩ដុំនៅក្នុងនោះ។
ជុំវិញការស្ទាក់ចាប់រថយន្តបំពាក់ស្លាកលេខអង្គការខាងលើ មេប៉ូលិសប្រឆាំងបទល្មើសសេដ្ឋកិច្ច នៃក្រសួងមហាផ្ទៃ លោកវរសេនីយ៍ត្រី ឡុង សំអឿន បានថ្លែងប្រាប់នៅព្រឹកថ្ងៃទី ០១ មេសា នេះថា ប្រតិបត្តិការបង្គ្រាបនេះធ្វើឡើងនៅវេលា ម៉ោង៩ និង៣០នាទីព្រឹកមិញនេះ នៅចំណុចភូមិសាស្ត្រព្រៃស្ងាត់មួយកន្លែង ក្នុងភូមិត្រពាំងទឹម ឃុំតាមសៀម ស្រុកស្វាយលើ ភាគខាងជើង ឈៀងខាងកើត ចម្ងាយប្រមាណជាង៧០គីឡូម៉ែត្រពីទីប្រជុំខេត្តសៀមរាប។
លោកបន្តថា ប្រតិបត្តិការនេះធ្វើឡើងរួមគ្នារវាងកម្លាំងរបស់លោកជាមួយកម្លាំងកងរាជអាវុធហត្ថស្រុកស្វាយលើ និងកម្លាំងជំនាញរដ្ឋបាលព្រៃឈើសង្កាត់ស្វាយលើផងដែរ។ ទោះជាយ៉ាងនេះក្តីពុំមានជនពាក់ពន្ធ័ណាម្នាក់ត្រូវបានចាប់ខ្លួននៅក្នុងប្រតិបត្តិការនោះទេ ដោយសមត្ថកិច្ចអះអាងថា អ្នកបើកបររថយន្តបានបើកទ្វាររត់ចូលព្រៃបាត់ស្រមោលភ្លាមៗក្រោយពីគេឃើញសមត្ថកិច្ចចុះទៅដល់។
លោកឡុង សំអឿន បានបន្តទៀតថា រថយន្តដែលបង្គ្រាបបាននោះមានម៉ាក ហ្វត (ford ) ពណ៏ទឹកប៊ិច ពាក់ស្លាកលេខ OI-6514 ដែលជាស្លាកលេខអង្គការក្រៅរដ្ឋាភិបាល និងមានផ្ទុកកំណាត់ឈើគ្រញូងចំនួន១៩ដុំ ទម្ងន់ ២១៧ គីឡូក្រាម។ លោកថា បច្ចុប្បន្នទាំងរថយន្ត ទាំងវត្ថុតាងឈើគ្រញូង ត្រូវបានយកទៅរក្សាទុកនៅស្នាក់ការសង្កាត់រដ្ឋបាលព្រៃឈើស្វាយលើដើម្បីកសាងសំណុំរឿងបញ្ជូនទៅតុលាការចាត់ការតាមនិតិវិធីស្តីពីព្រៃឈើ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ