ខេត្តមណ្ឌលគិរី ៖ មនុស្សចំនួន៦នាក់ ត្រូវបានសមត្ថកិច្ចប្រចាំនៅអភិរក្សជីវចម្រុះសីមាធ្វើការឃាត់ខ្លួន បន្ទាប់ពីពួកគេបាននាំគ្នាលួចចូលទៅកាប់ទន្ទ្រានដីព្រៃដោយខុសច្បាប់ កាលពីរសៀលថ្ងៃទី២៦ មីនា ២០១៥ ស្ថិតនៅចំណុចត្រពាំងទូក ភូមិអូរចារ ឃុំស្រែព្រះ ស្រុកកែវសីមា ។
សេចក្តីរាយការណ៍ឱ្យដឹងថា នៅពេលក្រុមប្រជាសហគមន៍ការពារព្រៃឈើឃុំស្រែព្រះ កំពុងដើរល្បាតក្នុងព្រៃអភិរក្ស ក៏បានប្រទះឃើញក្រុមមនុស្សខាងលើ កំពុងកាប់ឆ្ការព្រៃដែលមានទំហំប្រមាណជាង៤ហិកតា ។ ប្រភពបន្តថា នៅពេលភ្លាមៗនោះ កម្លាំងរបស់ប្រជាសហគមន៍បានទំនាក់ទំនងសុំអន្តរាគមន៍ពីមន្ត្រីអភិរក្ស ដើម្បីបន្ថែមកម្លាំងបង្ក្រាបចំពោះអ្នកកាប់រានដីព្រៃខុសច្បាប់ ។
មន្ត្រីជំនាញរដ្ឋបាលព្រៃឈើប្រចាំនៅស្នាក់ការអភិរក្សជីវចម្រុះសីមាបានឱ្យដឹងថា ជនសង្ស័យដែលបានលួចកាប់ទន្ទ្រានដីព្រៃខុសច្បាប់ខាងលើ ១-ឈ្មោះស៊ីង ដុះ ភេទប្រុស អាយុ៣៣ឆ្នាំ ជនជាតិខ្មែរ រស់នៅក្នុងភូមិជាំអំពិល ឃុំជាំ ស្រុកមេមត់ ខេត្តកំពង់ចាម ២-ឈ្មោះសេង ដុំ ភេទប្រុស អាយុ២៨ឆ្នាំ ជនជាតិខ្មែរ រស់នៅភូមិជាំអំពិល ឃុំជាំ ស្រុកមេម៉ត់ ខេត្តកំពង់ចាម (ត្បូងឃ្មុំ) ៣-ឈ្មោះឡេះ សាក់ ភេទប្រុស អាយុ១៧ឆ្នាំ ជនជាតិចាម រស់នៅភូមិក្ងោក ឃុំក្ងោក ស្រុកមេម៉ត់ ខេត្តកំពង់ចាម (ត្បូងឃ្មុំ) ៤-ឈ្មោះទិត្យ សិទ្ធិ ភេទប្រុស អាយុ២៥ឆ្នាំ ជនជាតិខ្មែរ រស់នៅភូមិប្រឹក្ស ឃុំក្រែក ស្រុកពញាក្រែក ខេត្តកំពង់ចាម (ត្បូងឃ្មុំ) ៥-ឃុន គាហ៊ុន ភេទប្រុស អាយុ៣៧ឆ្នាំ ជនជាតិខ្មែរ រស់នៅក្នុងភូមិជាំអំពិល ឃុំជាំ ស្រុកមេម៉ត់ ខេត្តកំពង់ចាម (ត្បូងឃ្មុំ) ។ជនទាំង៦នាក់នេះ សមត្ថកិច្ចកំពុងធ្វើការសួរនាំបន្ថែម ដើម្បីកសាងសំណុំរឿងបញ្ជូនទៅកាន់សាលាដំបូងខេត្ត ចាត់ការតាមផ្លូវច្បាប់។
ប្រភពមួយចំនួនបានបង្ហើបថា អ្នកដែលត្រូវសមត្ថកិច្ចចាប់បង្ក្រាបនេះ មិនមែនកាប់រានដីព្រៃយកជាសិទ្ធិខ្លួនឯងទេ អាចមានអ្នកនៅពីក្រោយខ្នង ដោយសារពួកគេសុទ្ធតែមកពីស្រុកឆ្ងាយមិនស្គាល់ភូមិសាស្ត្រស្រុកនេះទេ ។ ហើយគេតែងសង្កេតឃើញថា កន្លងមកដីនៅតំបន់អភិរក្សជីវចម្រុះសីមា ត្រូវបានអ្នកមានអំណាចប្រើប្រាស់គ្រប់មធ្យោបាយ ដើម្បីបានសិទ្ធិកាន់កាប់ដីនៅតំបន់នោះ។
បើតាមប្រជាសហគមន៍បានរាយការណ៍ថា «ដីព្រៃរាប់សិបហិកតា គេកាប់អស់ហើយ… សុទ្ធតែអ្នកធំ…គេកាប់រាល់ថ្ងៃហ្នឹង កាប់ផង… ដុតផង… អស់ហើយសត្វក៏មិនសល់ដែរ….» ។ បើកាប់យ៉ាងនេះ តើព្រៃឈើនៅស្រុកខ្មែរសេសសល់បានយូរប៉ុណ្ណា?
ចែករំលែកព័តមាននេះ