រាជធានីភ្នំពេញ ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា នាវេលាព្រឹកថ្ងៃទី២៧ មីនា ២០១៥ នេះ បានអញ្ជើញដឹកនាំគណៈប្រតិភូចូលរួមក្នុងកិច្ចប្រជុំសន្និបាតសហភាពអន្តរសភាលើកទី១៣២ នៅទីក្រុងហាណូយ ប្រទេសវៀតណាម ដែលនឹងចាប់ផ្តើមឡើងចាប់ពីថ្ងៃទី២៨ មីនា រហូតដល់ថ្ងៃទី០១ មេសា ២០១៥ ។
ប្រភពបានឱ្យដឹងថា ក្នុងមហាសន្និបាតនេះ នឹងលើកយកប្រធានបទជាច្រើន ក្នុងនោះមានកិច្ចប្រជុំអាស៊ានបូក៣, កិច្ចប្រជុំក្រុមអាស៊ីប៉ាស៊ីហ្វិក និងកិច្ចប្រជុំក្រុមប្រឹក្សាភិបាលលើកទី១៩៦ … ។ល។
ប្រភពបន្តថា ក្រៅពីកិច្ចប្រជុំនេះ សម្តេចហេង សំរិន ក៏ដូចជាគណៈប្រតិភូទាំងអស់ នឹងជួបពិភាក្សាការងារជាមួយបណ្តាប្រទេសជាច្រើនទៀត ។ សូមបញ្ជាក់ថា សហភាពអន្តរសភាហៅកាត់ថា IPU ត្រូវបានបង្កើតឡើងតាំងពីឆ្នាំ១៨៨៩មកម្ល៉េះ ដែលបច្ចុប្បន្នមានសមាជិកចំនួន១៦៤ប្រទេស និងសមាជិកបំរុងចំនួន១០ប្រទេសផងដែរ ។
ក្នុងឱកាសនោះ លោកកឹម សុខា បានអញ្ជើញចូលរួួមជូនដំណើរសម្តេចអគ្គមហាពញាចក្រី ហេង សំរិន ផងដែរ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ