រាជធានីភ្នំពេញ ៖ ការលួចចម្លងស៊ីឌី (CD) និងវីស៊ីឌី (VCD) នៅតែជាកង្វល់សម្រាប់បណ្តាផលិតកម្មក្នុងស្រុក ព្រោះគ្រាន់តែចេញឌីស្កដើម មិនបានមួយថ្ងៃផង ឌីស្កចម្លងដាក់លក់ព្រោងព្រាតនៅលើទីផ្សារ ។
រាជធានីភ្នំពេញ ៖ ការលួចចម្លងស៊ីឌី (CD) និងវីស៊ីឌី (VCD) នៅតែជាកង្វល់សម្រាប់បណ្តាផលិតកម្មក្នុងស្រុក ព្រោះគ្រាន់តែចេញឌីស្កដើម មិនបានមួយថ្ងៃផង ឌីស្កចម្លងដាក់លក់ព្រោងព្រាតនៅលើទីផ្សារ ។ ដើម្បីទប់ទល់នឹងការលួចចម្លងនេះ ផលិតកម្មសាន់ដេដែលជាផលិតកម្មលេចធ្លោមួយដែរនៅក្នុងស្រុក បានប្រើវិធីសាស្ត្រថ្មីលក់ឌីស្កដើមតម្លៃរហូតដល់២ពាន់រៀល គឺប្រហាក់ប្រហែលនឹងឌីស្កចម្លងដែលកំពុងដាក់លក់យ៉ាងសេរីនៅលើទីផ្សារ ។
លោកឡាយ សុកហុក ចាងហ្វាងផលិតកម្ម សាន់ដេ បញ្ជាក់ក្នុងកម្មវិធីថតបទចម្រៀងសម្រាប់ពិធីបុណ្យចូលឆ្នាំថ្មីប្រពៃណីជាតិខ្មែរនៅខេត្តកំពង់ស្ពឺ កាលពីពេល ថ្មីៗនេះថា ការលក់បញ្ចុះតម្លៃឌីស្កកាន់តែទាបមិនមែនមានន័យថា ដោយសារគុណភាពបទចម្រៀងរបស់ផលិតកម្មអន់ ឬខ្សោយជាងមុនទេ វាគឺជាយុទ្ធសាស្ត្រថ្មីសម្រាប់ទាក់ទាញអតិថិជនឱ្យគាំទ្រកាន់តែច្រើនសម្រាប់ផលិតកម្ម ពិសេសទាញអារម្មណ៍ឱ្យទស្សនិកជនជួយទិញផលិតផលរបស់ក្រុម ហ៊ុន ។ វាក៏ជាវិធីសាស្ត្រវាយប្រហារទីផ្សារលក់ឌីស្កចម្លងខុសច្បាប់ព្រោះតែវាមានតម្លៃប្រហាក់ប្រហែលគ្នា បើទោះបីជាយុទ្ធសាស្ត្រនេះធ្វើឱ្យចំណូលចំណេញពីការលក់ឌីស្កមានកម្រិតតិចជាងមុនក្តី ។
លោកឡាយ សុខហុក ថ្លែងថា វាដល់ពេលដែលប្រជាជនខ្មែរគួរនាំគ្នាជួយគាំទ្រផលិតផលដើមរបស់ក្រុមហ៊ុនដែលខិតខំផលិតស្ទើររកពេលសម្រាកគ្មាននោះហើយ ។ ក្រុមហ៊ុនបានបោះដុំឱ្យអាជីវករនូវតម្លៃថោកសមរម្យគឺប្រមាណពី១.៣០០ទៅ១.៤០០រៀលក្នុងមួយឌីស្ក ដូចនេះពួកគាត់អាចមានលទ្ធភាពស្វែងរកប្រាក់ចំណេញពីការលក់បានប្រមាណ៦០០ទៅ៧០០រៀលក្នុងមួយឌីស្ត ។ មិនមែនជាការកាច់កុងជាមួយការលក់របស់ផលិតកម្មក្នុងស្រុកទេ គឺវាជាយុទ្ធសាស្ត្រក្រុមហ៊ុន ហើយការប្រកួតប្រជែងលើតម្លៃគឺជាសេរីភាពរបស់ក្រុមហ៊ុន នីមួយៗ ។
លោកឡាយ សុខហុក មិនបានលើកឡើងអំពីចំនួននៃការផលិតឌីស្កក្នុងមួយ វ៉ុលៗដាក់លក់នៅលើទីផ្សារទេ ប៉ុន្តែក្នុងរយៈពេល ថ្មីៗនេះក្រុមហ៊ុនលោកបានសាកល្បងលក់ឌីស្កដើមក្នុងតម្លៃ២.០០០រៀល ហើយទទួលបានលទ្ធផលល្អប្រសើរ គឺធ្វើឱ្យកំណើននៃការលក់កើនឡើងរហូតដល់៥០ភាគរយ ។
អ្នកចាត់ការទូទៅផលិតកម្មសាន់ដេ លោក ឡាយ សុកចំរើន និយាយថា វាគឺជាយុទ្ធសាស្ត្រមួយតបទៅនឹងការស្នើសុំពីមហាជនខ្មែរមួយចំនួនធំមិនមានលទ្ធភាពទិញឌីស្កចម្រៀងក្នុងតម្លៃពី២ដុល្លារទៅ៣ដុល្លារ ។ ម្យ៉ាងទៀតការធ្វើបែបនេះក្នុងន័យឱ្យបទចម្រៀងសាន់ដេដល់ដៃមហាជនក្នុងប្រទេសកម្ពុជា ។ បើទោះជាបញ្ចុះតម្លៃលក់ចម្រៀងមកនៅត្រឹមកម្រិតទាបមិនធ្លាប់មានពីមុនក្ដី តែគុណភាពគឺនៅដដែលដូចជាឆ្នាំ មុនៗដែរ សម្រាប់បទចម្រៀងចូលឆ្នាំថ្មីប្រពៃណីជាតិ ។ នៅក្នុងឆ្នាំថ្មីនេះ ផលិតកម្មសាន់ដេនឹងផលិតបទចម្រៀងថ្មីសុទ្ធទាំងបទភ្លេង និងទំនុកចម្រៀង ប្រមាណពី៧០ទៅ៨០ភាគរយ ដោយមានចំនួន៥អាល់ប៊ុម ហើយក្នុងនោះតារាចម្រៀងស្រី-ប្រុសជាង២០ នាក់ នឹងមានវត្តមានក្នុងបទចម្រៀងទាំងអស់គ្នា ។
តាមរយៈការលក់ CD និង VCD ដើមបញ្ចុះតម្លៃមកនៅត្រឹម២ពាន់រៀល លោកឡាយ សុកចំរើន ជឿជាក់ថា ផលិតកម្មសាន់ដេនឹងអាចបំបែកកំណត់ត្រានៃការលក់បទចម្រៀងនៅក្នុងប្រទេសកម្ពុជានាពេលខាងមុខ ។ មិនត្រឹមតែទីផ្សារក្នុងស្រុកទេ នៅតាមបណ្ដាប្រទេសមួយចំនួនលើពិភពលោកក៏អាចលក់ក្នុងតម្លៃនេះដែរ ដូចជាសហរដ្ឋអាមេរិក កាណាដា ជប៉ុន អូស្ត្រាលី បារាំង ចិន ជាដើម ។
តារាសម្តែងនាងនី មុនីនាថ និងកញ្ញាសុខ ពិសី តារាចម្រៀងប្រចាំផលិតកម្មសាន់ដេ បានថ្លែងស្រដៀងគ្នាថា វិធីសាស្ត្រដែលផលិតកម្មសាន់ដេរៀបចំនេះ គឺជាវិធីមួយល្អដើម្បីដេញជើងអ្នកដែលចូលចិត្ត អង្គុយចាំតែលួចចម្លង ។ ឌីស្កមានគុណភាពល្អ តម្លៃត្រឹមតែពីរឬបីពាន់រៀល ទស្សនិកជនគួរតែជួយទិញឌីស្កតម្លៃពិសេសនេះឱ្យបានគ្រប់គ្នាដើម្បីគាំទ្រអ្នកផលិត។ ផ្ទុយទៅវិញ បើទិញឌីស្កចម្រៀងក្លែងក្លាយ តម្លៃប្រហែលគ្នា តែគុណភាពអន់ជាង ដូច្នេះគួរតែងាកមកទិញរបស់ពិតវិញ ៕
ចែករំលែកព័តមាននេះ