ទោះបីជាកាណាដាមិនទាន់មានឯកអគ្គរដ្ឋទូតប្រចាំនៅកម្ពុជា ប៉ុន្តែដល់ពេលនេះទំនាក់ទំនងទ្វេភាគីរវាងកម្ពុជា និងកាណាដា បានបោះជំហានទៅមុខលើវិស័យការទូត និងសេដ្ឋកិច្ចពាណិជ្ជកម្ម រួមទាំងវិស័យផ្សេងទៀត។ ដំណើរទៅមុខ និងរឹងមាំនៃទំនាក់ទំនងរវាងប្រទេសទាំងពីរត្រូវបានបង្ហាញឡើងនៅជំនួបពិភាក្សាការងារមួយរវាងលោកអ៊ុច បូររិទ្ធ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និងលោក Peter Mac Arthur អគ្គនាយកទទួលបន្ទុកកិច្ចការអាស៊ីខាងត្បូង អាស៊ីអាគ្នេយ៍ និងអូសេអានី នៃក្រសួងការបរទេស ពាណិជ្ជកម្ម និងការអភិវឌ្ឍន៍កាណាដា កាលពីល្ងាចថ្ងៃទី២៦ កុម្ភៈ ២០១៥ នៅទីស្តីការក្រសួងការបរទេស។
លោក អ៊ុច បូររិទ្ធ បានមានប្រសាសន៍ ប្រាប់អ្នកកាសែត បន្ទាប់ពីជំនួបចប់ថា នៅក្នុងជំនួបនោះ ភាគីទាំងពីរបានពិភាក្សាទៅលើការពង្រឹងពង្រីក កិច្ចសហប្រតិបត្តិការទ្វេភាគី រវាងកម្ពុជា និងកាណាដា ជាពិសេសក្នុងវិស័យការទូតពាណិជ្ជកម្ម និងសេដ្ឋកិច្ច។ ហើយភាគីកាណាដា ចង់ពិភាក្សាជាមួយភាគីកម្ពុជា ដើម្បីធ្វើការវិនិយោគខាងវិស័យអគ្គិសនីតូចៗ និងបាននិយាយអំពីបញ្ហាថាមពល ដូចជា ការប្រើប្រាស់កាំរស្មីព្រះអាទិត្យ ដែលយកធ្វើជាអគ្គិសនី និងការប្រើប្រាស់ថាមពលផ្សេងៗទៀត ដែលមិនធ្វើឲ្យប៉ះពាល់ដល់បរិស្ថាន។ នៅក្នុងជំនួបនោះ លោកក៏បានជម្រាបលោក Peter MacArthur អំពីការរីកចំរើននៅក្នុងប្រទេសកម្ពុជា ដូចជានយោបាយសេដ្ឋកិច្ចផងដែរ។
ពាក់ព័ន្ធការពង្រឹងពង្រីកកិច្ចសហប្រតិបត្តិការទ្វេភាគីលោករដ្ឋលេខាធិការបានបញ្ជាក់ថា ដោយសារតែកាណាដា មិនទាន់មានតំណាងបេសកកម្ម ប្រចាំនៅកម្ពុជា ហើយកាណាដានឹងពិចារណាចាត់តាំងអ្នកការទូតម្នាក់របស់កាណាដាមកបំពេញបេសកកម្មជាអចិន្ត្រៃយ៍នៅកម្ពុជា ដើម្បីធ្វើជាស្ពានចម្លងពីភ្នំពេញទៅអគ្គរដ្ឋទូតបាងកក ហើយក៏ដូចជាជំរុញកិច្ចសហប្រតិបត្តិការទ្វេភាគីរវាងកាណាដា និងកម្ពុជា។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ