ខេត្តកណ្តាល ៖ ព្រោះតែភ្លើងប្រចណ្ឌក្លាយទៅជាទំនាស់ក្នុងគ្រួសារកាន់តែធំឡើង រហូតបានធ្វើឱ្យប្តីចិត្តតិរច្ឆាន ទាញកាំបិតផ្គាក់ កាប់មកលើប្រពន្ធបណ្តាលឱ្យដេកស្លាប់ភ្លាមៗនៅក្នុងថ្លុកឈាមយ៉ាងអាណោចអាធ័ម ។ ហេតុការណ៍នេះបានកើតឡើងកាលពីវេលាម៉ោង១០និង៣០នាទីព្រឹក ថ្ងៃទី២៥ ខែមករា នៅចំណុចក្រោមផ្ទះជនរងគ្រោះ ស្ថិតក្នុងភូមិឃ្លាំងមឿងជើង ឃុំព្រែកអំពិល ស្រុកខ្សាច់កណ្តាល ។
ជនរងគ្រោះឈ្មោះ ហ៊ីង រឿន ភេទស្រី អាយុ៥៣ឆ្នាំ មុខរបរកសិករ មានទីលំនៅភូមិឃុំ កើតហេតុ ជាប្រពន្ធបានដេកស្លាប់ក្នុងថ្លុកឈាម ។ ចំណែកជនល្មើសឈ្មោះ រិត ជ្រឿន ភេទប្រុស អាយុ៥៨ឆ្នាំ មុខរបរកសិករ នៅភូមិឃុំកើតហេតុ ជាប្តី បានរត់គេចខ្លួនបាត់ ។ បើតាមសាក្សីបានឲ្យដឹងថាកន្លងមកជនរងគ្រោះនិងជនល្មើសតែងតែមានទំនាស់ជាមួយគ្នាជាញឹកញាប់ ដោយជនល្មើសជាប្តីតែងតែប្រចណ្ឌប្រពន្ធ ដោយចោទថាមានសាហាយស្មន់ជាមួយប្រុសផ្សេង ។ លុះដល់ថ្ងៃកើតហេតុខាងលើអ្នកទាំងពីរមានទំនាស់និងគ្នាយ៉ាងខ្លាំង នៅខាងក្រោមផ្ទះពេលនោះកូនស្រីឈ្មោះជ្រឿន អូន អាយុ២៤ឆ្នាំ បានចូលមកឃាត់ ដោយស្រែកថា ម៉ែឯង ពុកឯងម៉េចចេះតែឈ្លោះគ្នាអញ្ជឹង តែអ្នកទាំងពីរមិនស្តាប់នោះទេ ហើយក៏បង្កការឈ្លោះគ្នាកាន់តែខ្លាំងឡើងៗ ភ្លាមនោះជនល្មើសជាប្តីបានយកកាំបិទខ្វែវមកកាប់ជនរងគ្រោះជាប្រពន្ធ ត្រូវថ្ពាល់ឆ្វេងដាច់ពីគុម្ពត្រចៀក ដល់បបូលមាត់ បណ្តាលឱ្យជនរងគ្រោះដួលលុតជង្គង់ បន្ទាប់មកជនល្មើសកាប់១កាំបិតទៀតត្រូវចំមុខពីក្បាលរហូតដល់ចង្កា ជំរៅដល់ឆ្អឹងលលាដ៍ បណ្តាល
ឱ្យស្លាប់នៅនិងកន្លែង ពេលនោះជនសង្យ័យបានរត់គេចខ្លួនបាត់ ។
សាក្សីបានបន្តថា បន្ទាប់ពីហេតុការណ៍កើតឡើងប្រជាពលរដ្ឋដែលនៅជិតខាងបានរាយការណ៍ជូនសមត្ថកិច្ច និង ព្យាយាមជួយសង្គ្រោះតែជាអកុសលជនរងគ្រោះបានស្លាប់យ៉ាងអាណោចអាធ័មនៅក្នុងថ្លុកឈាមបាត់ហើយ ។ បច្ចុប្បន្នសមត្ថកិច្ចប៉ូលិសកំពុងធ្វើការស្រាវជ្រាវចាប់ជនដៃដល់ដែលជាប្តីចិត្តតិរច្ឆានយកមកផ្តន្ទាទោសតាមច្បាប់ ។
ចែករំលែកព័តមាននេះ