រាជធានីភ្នំពេញ ៖ ក្នុងកិច្ចប្រជុំរវាងក្រសួងពាណិជ្ជកម្ម ក្រសួងសេដ្ឋកិច្ច និងហិរញ្ញវត្ថុ និងតំណាងអ្នកចែកចាយប្រេងឥន្ធនៈធំៗ ដែលធ្វើប្រតិបត្តិការនៅកម្ពុជា កាលពីពេលថ្មីៗនៅទីស្តីការក្រសួងពាណិជ្ជកម្ម លោកទេសរដ្ឋមន្ត្រីស៊ុន ចាន់ថុល បានស្នើរឲ្យមា្ចស់ស្ថានីយប្រេងឥន្ធនៈធំៗទាំងឡាយ និងអ្នកចែកចាយ ប្រេងឥន្ធនៈទាំងអស់ពិនិត្យលទ្ធភាពបញ្ចុះថ្លៃលក់រាយរបស់ខ្លួនឲ្យស្របនឹងតម្លៃប្រេងនៅលើទីផ្សារពិភពលោក ដើម្បីភាពសម្បូររុងរឿង របស់ប្រទេស ។
លទ្ធផលនៃកិច្ចប្រជុំ បានឯកភាពឲ្យតំណាងក្រុមហ៊ុនចែកចាយប្រេងឥន្ធនៈ ក្រសួងពាណិជ្ជកម្ម ក្រសួងសេដ្ឋកិច្ចនិងហិរញ្ញវត្ថុ ធ្វើការរួមគ្នាយ៉ាងជិតស្និទ្ធលើបញ្ហានេះនិងភាពប្រឈមដទៃទៀតដែលបានជួបប្រទះ ។ បន្ថែមពីលើនេះ អង្គប្រជុំបានយល់ព្រមឲ្យមានការប្រជុំពិនិត្យមើលថ្លៃប្រេងឥន្ធនៈបែបនេះ ដោយធ្វើឡើងរៀងរាល់១០ថ្ងៃម្តងនៅទីស្តីការក្រសួងពាណិជ្ជកម្ម ហើយលទ្ធផលនៃកិច្ចប្រជុំនឹងត្រូវផ្សព្វផ្សាយជាសាធារណៈតាមរយៈទូរទស្សន៍ វិទ្យុ សារព័ត៌មាន និងបណ្តាញសង្គម ដើម្បីឲ្យសាធារណជនបានដឹង ។
ពាក់ព័ន្ធនឹងបញ្ហានេះ លោក កែន រដ្ឋា អ្នកនាំពាក្យក្រសួងពាណិជ្ជកម្ម មានប្រសាសន៍ថា ការប្រជុំពិភាក្សាអំពីថ្លៃប្រេងសាំងនេះ មានតំណាងក្រុមហ៊ុនប្រេងឥន្ធនៈធំៗចូលរួមដូចជា សូគីម៉ិច ភីធីធី កាល់តិច តូតាល់ សាវវីម៉ិច ជាដើម។ ក្រុមហ៊ុនទាំងនេះអះអាងថា បើតម្លៃប្រេងសាំងនៅលើពិភពលោកនៅតែបន្តធ្លាក់ចុះ នោះក្រុមហ៊ុនរបស់ពួកគាត់នឹងបញ្ចុះតម្លៃប្រេងទៅតាមទីផ្សារអន្តរជាតិដែរ ។
លោកបន្តថា ជាទូទៅតម្លៃប្រេងសាំងរបស់ពួកគាត់បែងចែកជាពីរគឺតម្លៃបោះដុំ និងតម្លៃលក់រាយ ហើយបច្ចុប្បន្នតម្លៃបោះដុំនេះពួកគាត់ប្រាប់នៅក្នុងកិច្ចប្រជុំថាបានបញ្ចុះទៅតាមតម្លៃប្រេងនៅលើពិភពលោកហើយ ដើម្បីប្រកួតប្រជែងទីផ្សារក្នុងស្រុក តែដោយឡែកសម្រាប់តម្លៃលក់រាយវិញគឺបានបញ្ចុះដែរ តែមិនទាន់មានលក្ខណៈជាទូទៅដូចទីផ្សារអន្តរជាតិទេ ដោយអះអាងថា ពួកគាត់មានការលំបាកមួយចំនួនទាក់ទងនិងការរក្សាប្រេងក្នុងស្តុក ខណៈតម្លៃប្រេងនៅលើពិភពលោកកំពុងមានការប្រែប្រួល ។ ទាក់ទងនឹងការបញ្ចុះតម្លៃប្រេងនៅកម្ពុជា លោក កែន រដ្ឋា បានលើកឡើងថា ការបញ្ចុះតម្លៃប្រេងនេះវាផ្តល់អត្ថប្រយោជន៍ច្រើន គឺជួយសម្រួលដល់ជីវភាពរបស់ប្រជាពលរដ្ឋ និងជួយជំរុញទៅដល់ខ្សែសង្វាក់ផលិតកម្មរបស់វិស័យឯកជន និងក្រុមហ៊ុនផលិតនៅផលិតផលជាច្រើនផ្សេងទៀត។
គួរបញ្ជាក់ថា តម្លៃប្រេងសាំងនៅស្ថានីយប្រេងឥន្ធនៈចំនួន៣ គិតត្រឹមថ្ងៃទី១៤ មករា នៅស្ថានីយតូតាល់ ប្រេងសាំង អិុចសែលលៀម(៩៥) ថ្លៃ៤.៤៥០រៀល សាំងធម្មតាថ្លៃ៤.២៥០រៀល និងប្រេងម៉ាស៊ូតថ្លៃ៤.១០០រៀល ក្នុង១លីត្រ ។ ស្ថានីយប្រេងប្រេងឥន្ធនៈតេលា ប្រេងម៉ាស៊ូត ថ្លៃ៣.៨០០រៀល សាំង(៩២)ថ្លៃ៤.០០០រៀល និងស៊ុបពែរ(៩៥)ថ្លៃ៤.២០០រៀលក្នុង១លីត្រ ។ ដោយឡែកស្ថានីយប្រេងឥន្ធនៈភីធីធី(ptt)ប្រេងម៉ាស៊ូតថ្លៃ៤.១០០រៀល សាំងធម្មតាថ្លៃ៤.២៥០រៀល និងសាំងស៊ុបពែរថ្លៃ៤.៤៥០រៀល ក្នុង១លីត្រ ៕
ចែករំលែកព័តមាននេះ