រាជធានីភ្នំពេញ ៖ ក្រសួងទេសចរណ៍នឹងរៀបចំតំបន់អន្លង់វែង ដែលជាទីតាំងចុងក្រោយរបស់ពួកខ្មែរក្រហមឱ្យក្លាយជាតំបន់រមណីយដ្ឋានទេសចរណ៍ប្រវត្តិសាស្ត្រនាពេលឆាប់ៗខាងមុខនេះ ។
តាមគម្រោងអភិវឌ្ឍតំបន់ទេសចរណ៍ប្រវត្តិសាស្ត្រអន្លង់វែងនោះ គឺរួមមាន២តំបន់ និង១៤ចំណុច ស្ថិតនៅលើផ្ទៃដីសរុបជាង១២៤ពាន់ហិកតា ស្ថិតក្នុងស្រុកអន្លង់វែង ខេត្តឧត្តរមានជ័យ ក្នុងនោះមានកន្លែងដុតខ្មោចប៉ុល ពត, កន្លែងកាត់ទោសប៉ុល ពត, ផ្ទះតាម៉ុក, កន្លែងកែច្នៃគ្រាប់កាំភ្លើងលើភ្នំ២០០, ផ្ទះប៉ុល ពត់ និងខៀវ សំផន, ឃ្លាំងដាក់សម្ភារជើងភ្នំ, កន្លែងដុតខ្មោចសុន សេន, តំបន់ស្រែ
គំរូ, ទីតាំងដឹកជញ្ជូនតាម៉ុក, បឹងអន្លង់វែង, ផ្ទះតាម៉ុក និងសារមន្ទីរតាម៉ុក, មន្ទីរពេទ្យតាម៉ុក, និងសាលារៀនតាម៉ុកជាដើម ។
លោកថោង ខុន រដ្ឋមន្ត្រីក្រសួងទេសចរណ៍បានមានប្រសាសន៍ក្នុងកិច្ចប្រជុំនៅទីស្តីការក្រសួងទេសចរណ៍កាលពីថ្ងៃទី១៧ ធ្នូ ២០១៤នេះថា លោកនឹងជម្រុញឱ្យគណៈកម្មការទាំងអស់ ត្រូវយកចិត្តទុកដាក់ថែរក្សាការពារតំបន់ទេសចរណ៍ប្រវត្តិសាស្ត្រ ក្នុងស្រុកអន្លង់វែងឱ្យបានគង់វង្ស ដើម្បីជាឯកសារជាក់ស្តែងសម្រាប់ក្មេងជំនាន់ក្រោយ ។
លោកបញ្ជាក់ថា រដ្ឋាភិបាលកម្ពុជាបានបង្កើតគណៈកម្មការមួយ ដើម្បីរៀបចំតំបន់ទេសចរណ៍ប្រវត្តិសាស្ត្រនេះឡើងសំដៅថែរក្សាតំបន់នេះខ្លាចក្រែងបាត់បង់ដោយការរំលោភពីសំណាក់ក្រុមហ៊ុនឯកជន ឬប្រជាពលរដ្ឋដែលចង់យកធ្វើជាកម្មសិទ្ធិផ្ទាល់ខ្លួន ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ