រាជធានីភ្នំពេញ ៖ ស្ត្រីម្នាក់ឈ្មោះ កុយ កឹមឡង អាយុ៣៩ឆ្នាំ មានទីលំនៅក្នុងភូមិកោះនរា សង្កាត់និរោធិ៍ ខណ្ឌច្បារអំពៅ បានរងនូវការបណ្តេញចេញពីផ្ទះ ពីសំណាក់បងប្អូនខាងប្តី បន្ទាប់ពីប្តីរបស់នាង និងឪពុកកូនស្រីតូចទទួលមរណភាព កាលពីថ្ងៃទី១១ វិច្ឆិកា ២០១០ កន្លងមក ។ ករណីនេះត្រូវបានអាជ្ញាធរមូលដ្ឋានដឹកនាំដោយលោក ណុប ផា អភិបាលរងខណ្ឌច្បារអំពៅចុះសម្របសម្រួលបើកសោទ្វារផ្ទះឲ្យស្ត្រី និងកូនស្រីរូបនេះបានចូលស្នាក់នៅវិញ នាព្រឹកថ្ងៃទី២៦ វិច្ឆិកា ២០១៤ ។
តាមប្រភពទាក់ទិននឹងរឿងខាងលើនេះបានឲ្យដឹងថា ស្ត្រីឈ្មោះ កុយ កឹមឡង បានស្រឡាញ់គ្នាជាមួយឈ្មោះ ស៊ុំ សុផៃ តាំងពីឆ្នាំ២០០៧មកម្ល៉េះ ដោយមានលិខិតបញ្ជាក់ដឹកឮពីភូមិសង្កាត់ត្រឹមត្រូវ ប៉ុន្តែមិនបានចុះសំបុត្រអាពាហ៍ពិពាហ៍ជាមួយគ្នាឡើយ ។ ក្រោយការរស់នៅជាមួយគ្នា ភាគីទាំងពីរបានបន្សល់ទុកចំណងអនុស្សារីយ៍ កូនស្រីមួយឈ្មោះ ផៃ សុចិន្តា អាយុ៦ឆ្នាំ រស់នៅក្នុងលំនៅឋានមួយកន្លែង លើដីឡូតិ៍ខាងប្តី ហើយបច្ចុប្បន្ន ឈ្មោះ ស៊ុំ សុផៃ ជាប្តីបានទទួលមរណភាពបាត់ ជាហេតុធ្វើឲ្យបងប្អូនបង្កើតរបស់ឈ្មោះ ស៊ុំ សុផៃ នាំគ្នាប្តឹងទៅអាជ្ញាធរធ្វើការបណ្តេញនាងកុយ កឹមឡង និងកូនស្រីចេញពីផ្ទះ ដោយសំអាងទៅលើប័ណ្ណសុំកាន់កាប់ដី ដែលសពឈ្មោះ ស៊ុំ សុផៃ និងលោកស្រីកុយ កឹមឡង ស្នាក់នៅជុំគ្នាកន្លងមកនោះ ជាកម្មសិទ្ធិរបស់ឪពុកឈ្មោះ ស៊ុំ សុផៃ ។
តាមរយៈរឿងរ៉ាវខាងលើនេះ ស្ត្រីឈ្មោះ កុយ កឹមឡង បានប្តឹងទាមទារសុំរស់នៅលើផ្ទះដែលធ្លាប់រស់នៅជាមួយប្តីនោះតាំងពីក្រោយប្តីគាត់ស្លាប់មកម្ល៉េះ ប៉ុន្តែអាជ្ញាធរមូលដ្ឋានមិនសម្របសម្រួលឲ្យគាត់បានដូចបំណងឡើយ ដោយសំអាងថា ប្លង់ដីខាងលើនេះ មិនមែនជាកម្មសិទ្ធិរបស់នាងកុយ កឹមឡង ។ មិនតែប៉ុណ្ណោះ អាជ្ញាធរខណ្ឌច្បារអំពៅបានចាក់សោទ្វារផ្ទះមិនឲ្យឈ្មោះ កុយ កឹមឡង និងកូនស្រីបានចូលនៅក្នុងលំនៅឋានខាងលើឡើយ ។ តែដោយសារលោកស្រីកុយ កឹមឡង បានពឹងពាក់លោកមេធាវី អ៊ូ វុធ ជួយសម្របសម្រួលបញ្ហានេះ ទើបនៅវេលាខាងលើ អាជ្ញាធរមូលដ្ឋានបានចុះបើកទ្វារឲ្យនាងចេញចូលក្នុងលំនៅឋាន ទាំងការភ័យខ្លាចសាច់ញាតិខាងប្តី និងកូនប្រពន្ធដើម ។
បើតាមប្រភពពីឈ្មោះ ស៊ុំ សំអាត អនុប្រធានការិយាល័យភូមិបាល និងសំណង់ស្រុកកៀនស្វាយ ដែលជាដើមបណ្តឹងក្នុងសាច់រឿងនេះ បាននិយាយថា ខ្លួនមិនទទួលស្គាល់ឈ្មោះ កុយ កឹមឡង ជាប្រពន្ធសពបងប្រុសរបស់ខ្លួន ឈ្មោះ ស៊ុំ សុផៃឡើយ ហើយករណីនេះ លោកត្រូវតែប្តឹងទាមទារយកដីរបស់លោកដែលមានឈ្មោះឪពុកលោកជាម្ចាស់កម្មសិទ្ធិ ដើម្បីទុកចែកបងប្អូនបង្កើតរបស់លោក ។
យោងតាមច្បាប់ទាយាទបានឲ្យដឹងថា កុមារីឈ្មោះ ផៃ សុចិន្តា និងស្ត្រីឈ្មោះ កុយ កឹមឡង ត្រូវតែមានចំណែកទទួលបានកេរ្តិ៍មរតក ពីសពឈ្មោះ ស៊ុំ សុផៃ ។ ប៉ុន្តែករណីនេះចាំមើលអាជ្ញាធរមូលដ្ឋាន និងតុលាការសាលាដំបូងរាជធានីភ្នំពេញ វិនិច្ឆ័យលើរឿងរដ្ឋប្បវេណីនេះ ស្ត្រីមេម៉ាយមានកូនស្រីតូចក្នុងបន្ទុក ក្នុងសាច់រឿងនោះបានសមស្របក្នុងកម្រិតណា ? ។ ប៉ុន្តែបើបណ្តោយទុកនៅដោះស្រាយត្រឹមថ្នាក់មូលដ្ឋាន អាជ្ញាធរមូលដ្ឋាន ហាក់បីដូចជាមានការលំអៀងទៅលើឈ្មោះ ស៊ុំ សំអាត ដោយសារឈ្មោះ ស៊ុំ សំអាត ជាប្អូនប្រុស របស់លោកស៊ុំ សុខន អតីតប្រធានផ្សារក្បាលថ្នល់ និងជាក្រុមការងារនៅខណ្ឌមានជ័យ ៕
ចែករំលែកព័តមាននេះ