ខេត្ត ប៉ៃលិន ៖ ពាក់ព័ន្ធទៅនឹងបញ្ហាប្រជាពលរដ្ឋរិះគន់ថា ក្រុមអាជីវករមួយចំនួនបានយកថ្នល់កៅស៊ូធ្វើជាកន្លែងលក់ដូរយ៉ាងអាណាធិបតេយ្យបង្កឲ្យមានការកកស្ទះចរាចរមិនអាចឲ្យអ្នកធ្វើដំណើរបាននោះទេដែលស្ថិតនៅខាងជើងផ្សារសាមគ្គីប៉ាហ៊ី
ខេត្ត ប៉ៃលិន ៖ ពាក់ព័ន្ធទៅនឹងបញ្ហាប្រជាពលរដ្ឋរិះគន់ថា ក្រុមអាជីវករមួយចំនួនបានយកថ្នល់កៅស៊ូធ្វើជាកន្លែងលក់ដូរយ៉ាងអាណាធិបតេយ្យបង្កឲ្យមានការកកស្ទះចរាចរមិនអាចឲ្យអ្នកធ្វើដំណើរបាននោះទេដែលស្ថិតនៅខាងជើងផ្សារសាមគ្គីប៉ាហ៊ី ស្ថិតនៅក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ឥឡូវអាជ្ញាធរក្រុងប៉ៃលិនថានឹងចាត់វិធានការក្នុងពេលឆាប់ៗខាងមុខនេះ ។
ប្រភពព័ត៌មានពីលោក ឡូ លុយ អភិបាលរងក្រុងប៉ៃលិនបានប្រាប់តាមទូរស័ព្ទនាព្រឹកថ្ងៃទី២៥ វិច្ឆិកានេះថា ខាងអាជ្ញាធរក្រុង បានពិភាក្សាគ្នារួចរាល់អំពីបញ្ហានេះហើយខាងអាជ្ញាធរ និងហៅខាងអាជីវករលក់លើថ្នល់មកណែនាំ និងហៅម្ចាស់ផ្សារដែលទើបនឹងសង់ថ្មីនៅខាងត្បូងផ្លូវមកពិភាក្សាគ្នាដើម្បីដោះស្រាយចំពោះបញ្ហានេះ ។ ម្យ៉ាងវិញទៀត ខាងអាជ្ញាធរក៏មិនទាន់បានចុះទៅពិនិត្យទីតាំងផ្សារសង់ថ្មីនោះទេ តែលោកអភិបាលរងបានបញ្ជាក់ថា នឹងចាត់ការក្នុងពេលឆាប់ៗខាងមុខនេះ ។
ចំណែកប្រភពព័ត៌មានពីអាជីវករលក់នៅលើផ្លូវថ្នល់បានឱ្យដឹងថា គាត់លក់លើផ្លូវបែបនេះព្រោះគ្មានតូបលក់ដូរនៅផ្សារហើយគាត់ត្រូវបង្ខំចិត្តមកលក់នៅទីនេះ ដោយជួលពីម្ចាស់ផ្ទះគេ២ម៉ែត្របួនជ្រុងតំលៃ២០ម៉ឺនរៀលក្នុង១ខែ ជួលឆត្រគេតំលៃក្នុងមួយថ្ងៃ១៥០០រៀល និងថ្លៃភាស៊ី៣០០រៀលសំរាប់អនាម័យ ក្រៅពីនេះមិនអស់អីទៀតទេ ។ ប្រភពបន្តបានទៀតថា បើនៅផ្សារថ្មីដែលទើបសង់នោះគេយកតំលៃថោកខាងអាជីវករ នឹងទៅលក់ដូរនៅទីនោះទាំងអស់គ្នាតែម្តង ។
ចំណែម្ចាស់ផ្សារទើបសង់ថ្មីបានប្រាប់ឱ្យដឹងថា បើមានអាជីវករមកលក់នៅទីនោះ គឺគាត់យកតំលៃក្នុង១ថ្ងៃ២០០០រៀល ក្នុង១គ្រែ ។ តែនៅពេលឥឡូវនេះ គាត់ឱ្យអាជីវករលក់ដោយមិនយកលុយថ្លៃតូបនោះទេ ។ លោកបញ្ជាក់ទៀតថា កន្លែងលោកមានទីធ្លាធំទូលាយ មិនមានការកកស្ទះចរាចរណ៍ និងមានអនាម័យល្អថែមទៀតផង ។ ចំណែកប្រជាពលរដ្ឋរស់នៅក្នុងភូមិខាងលើ បានឱ្យដឹងថា បើសិនជាក្រុមអាជីវករដែលលក់ដូរនៅលើ ផ្លូវថ្នល់ប្តូរទៅលក់ដូរនៅឯផ្សារថ្មីវិញ សោភ័ណភាពផ្សារនឹងមានការល្អប្រសើរ ហើយចរាចរណ៍ផ្លូវចេញចូលផ្សារធំក៏មានភាពងាយស្រួលដែរ ។ ម្យ៉ាងវិញទៀត បើមានហេតុការណ៍ភ្លើងឆេះផ្ទះកន្លែងណាមួយនៅក្នុងផ្សាររថយន្តពន្លត់អគ្គិភ័យក៏អាចចូលទៅជួយពន្លត់ទាន់ពេលវេលាដែរ ។
ចែករំលែកព័តមាននេះ