រាជធានីភ្នំពេញ ៖ មហោស្រពសិល្បៈជនជាតិដើម នៃប្រទេសអាស៊ានទាំង១០ ដែល កម្ពុជាធ្វើជាម្ចាស់ផ្ទះ មានទស្សនិកជនច្រើនកុះករចូលរួមទស្សនាលើសពីការរំពឹងទុក រហូតខ្លះគ្មានកន្លែងអង្គុយទៀតផង ។ ការសម្តែងនេះ កាលពីរាត្រីថ្ងៃទី២១ វិច្ឆិកា ឆ្នាំ២០១៤ នៅសាលសន្និសីទចតុម្មុខ រាជធានីភ្នំពេញ ក្រោមអធិបតីភាពលោកជំទាវភឿង សកុណា រដ្ឋមន្ត្រី ក្រសួងវប្បធម៌និងវិចិត្រសិល្បៈ ។
លោកសំរាំង កម្សាន្ត រដ្ឋលេខាធិការក្រសួង វប្បធម៌និងវិចិត្រសិល្បៈ មានប្រសាសន៍ថា នេះជាការលើកទឹកចិត្តគាំទ្រផ្តល់កម្លាំងចិត្តឱ្យសិល្បករអាស៊ានទាំង១០ ចងបាច់គ្នាជាចង្កោមឱ្យទៅជាកម្លាំងមួយសកម្ម ដើម្បីជួយជំរុញកសាងសហគមន៍អាស៊ានឱ្យបានជោគជ័យនាឆ្នាំ២០១៥ ។ លើសពីនេះទស្សនិកជនចូលរួមគឺពិតជាការលើកស្ទួយសិល្បករខ្មែរ យើង មកពីខេត្តរតនគិរី ជាជនជាតិដើម ដោយបានឱ្យសម្តែងសិល្បៈបញ្ជាក់ពីជនជាតិដើម ។
លោកជំទាវភឿង សកុណា បានថ្លែងថា «ក្នុងន័យថែរក្សាសិល្បៈជនជាតិដើមឱ្យគង់វង្ស យើងក៏រួមគ្នាជួយសិល្បៈជនជាតិឱ្យបានក្លាយ ជាកម្លាំងជួយសង្គមយើងវិញដែរ ។ ក្នុងពេលឥឡូវនេះបញ្ហាទេសចរណ៍កំពុងមានការអភិវឌ្ឍតាមសហគមន៍ ដែលគេចាប់អារម្មណ៍ ដូចនេះបើពួកគាត់ថែបាន អាចទាក់ទាញភ្ញៀវចូលរួមទស្សនាលើផ្នែកវិស័យទេសចរណ៍ នោះកម្រិតជីវភាពក៏ល្អជាងមុនបន្តបន្ទាប់ទៀត ។ ដូចនេះសូមបងប្អូនជនជាតិ ធ្វើយ៉ាងណាជួយថែរក្សាប្រពៃណី ទំនៀមទម្លាប់ជនជាតិឱ្យគង់វង្ស ប្រៀបដូចជាព្រលឹង របស់ពួកគាត់ ហើយពេលនេះយើងពិតជារំភើប បានឃើញពីការសម្តែងនូវភាព ខុសៗគ្នារបស់ ជនជាតិ រៀងៗខ្លួន ។ យើងត្រូវធ្វើយ៉ាងណាកុំឱ្យវប្បធម៌ថ្មីខ្លាំងទំនើបវាយលុកពេក លើ ទំនៀមទំលាប់របស់យើង មានតែការយកចិត្ត ទុកដាក់ រៀងៗខ្លួន ។ លើសពីនេះពឹងផ្អែកទៅលើសហគមន៍ជនជាតិតែប៉ុណ្ណោះ ដែលដឹង ច្បាស់ ព្រោះអ្វីដែលយើងសល់នេះ ពិតជាមាន តម្លៃសម្រាប់សម័យឥឡូវ ។ សម័យឥឡូវមានអ្វីដែល ប្លែកៗច្រើនមែន ប៉ុន្តែឆាប់បាត់ដូចជាភ្លើងចំបើង ។ នេះជាព្រលឹងដែលនៅជាប់យូរតទៅទៀត សូមជួយថែរក្សាបន្តទៀត ។ ព្រឹត្តិការណ៍នេះជាការស្វែងយល់នូវវប្បធម៌គ្នាទៅវិញទៅមករបស់ជនជាតិដើមអាស៊ាន ដែល នេះជាឱកាសមួយកម្របានឃើញ ទើបពេល នេះចាត់ទុកជាពេលយើងរៀនសូត្រ ពីគ្នាទៅវិញទៅមកដោយភាពស្និទ្ធស្នាល ក្នុងនាមប្រជាជាតិអាស៊ានតែមួយ» ។
និស្សិតឆ្នាំទី៤ឈ្មោះសុខ ចាន់នូ រៀននៅសាកលវិទ្យាល័យជាតិគ្រប់គ្រង បាននិយាយថា លោកបានដឹងព័ត៌មានអំពីការសម្តែងសិល្បៈជនជាតិដើមនៃប្រទេសអាស៊ានទាំង១០នេះ តាមហ្វេសប៊ុក និងសារព័ត៌មានមួយចំនួនក៏ចាប់អារម្មណ៍ និងចង់ដឹងថា ជនជាតិដើមនៃប្រទេសអាស៊ាន មានលក្ខណៈវប្បធម៌ប្លែកគ្នាយ៉ាងណាខ្លះ ។ លោកភ្ញាក់ផ្អើលពេលឃើញមហាជនច្រើនគាំទ្រ ព្រឹត្តិការណ៍នេះ ដោយអ្នកខ្លះអត់កន្លែងអង្គុយ ក៏សុខចិត្តឈរញញឹមទះដៃតាមដានការសម្តែង របស់ប្រទេស នីមួយៗ នៃប្រទេសអាស៊ានក្នុងន័យចង់ដឹងថា គេរាំល្អ ប្លែកៗគ្នាប៉ុនណា។ លើសពីនេះការចូលរួមពីទស្សនិកជនគ្រប់វ័យក៏ដូចជាការជួយលើកមុខមាត់ប្រទេសយើង ជាម្ចាស់ផ្ទះឱ្យផុសឡើងបន្ថែមទៀត ។ បើគ្មាន កម្លាំងគាំទ្រនោះទេ អ្នករៀបចំពិតជាសោកស្តាយ និងខកចិត្ត ។
លោកសុខ ចាន់នូ និយាយថា «រូបភាព សប្បាយៗ ទស្សនិកជនចូលមើលច្រើនធ្វើឱ្យបរិយាកាសមានភាពកាន់តែអស្ចារ្យជាមួយក្បាច់រាំ ការតុបតែងកាយ ព្រមជាមួយភ្លើងពណ៌ ការរៀបឆាក និងសមត្ថភាពបញ្ចេញក្បាច់រាំរបស់សិល្បករ ពិតជាពិសេស បើមិនបានមកមើល ពិតជាសោកស្តាយ» ។
របាំសម្តែងជាផ្លូវការក្នុងមហោស្រពនោះមាន របាំស្វាគមន៍ «របាំសែនភូមិ» ។ ប្រទេសព្រុយនេ របាំ « Rumpun Budaya»។ ប្រទេសកម្ពុជារបាំ «សិល្បៈរបាំក្នុងជីវិតជនជាតិ» ។ ប្រទេសឥណ្ឌូណេស៊ី របាំ « Talempong Minangkabau Musical Harmony»។ ប្រទេសឡាវ របាំ «Cotton Weaving Dace»។ ប្រទេសមីយ៉ាន់មា៉ « External Beauty of Myanmar Duet Dance ប្រទេសហ្វ៊ីលីពីន របាំ «Makiling Musical Ensemble» ។ ប្រទេសសិង្ហបុរី របាំ «Azpirasi Dance» ។ ប្រទេសថៃ របាំ «Smile of Thailand» ។ ប្រទេសវៀតណាម របាំ «Hue Dance» និងរបាំបញ្ចប់សិល្បៈអាស៊ាន ៕
ចែករំលែកព័តមាននេះ