រាជធានីភ្នំពេញ ៖ ប្រធានសមាគមគ្រូបង្រៀនកម្ពុជាឯករាជ្យលោក រ៉ុង ឈុន ហៅការសម្រេចរបស់សាលាដំបូងរាជធានីភ្នំពេញដែលបានដាក់រូបលោកឱ្យស្ថិតនៅក្រោមការត្រួតពិនិត្យរបស់តុលាការនិងហាមឃាត់រូបលោកមិនឱ្យចូលរួមសកម្មភាពតវ៉ានានានោះថា គឺជាការឃុំខ្លួនលោកដោយគុកឥតជញ្ជាំង ។
លោកថ្លែងបែបនេះបន្ទាប់ពីចេញពីការចូលខ្លួនបំភ្លឺក្នុងសាលាដំបូងរាជធានីភ្នំពេញអស់រយៈពេលជិត២ម៉ោងនៅព្រឹកថ្ងៃទី៣១ តុលា នេះ ។ ថ្លែងទៅកាន់អ្នកសារព័ត៌មាននៅមុខតុលាការនៅរសៀលថ្ងៃដែលលោក រ៉ុង ឈុន ថា ចៅក្រមនឹងចេញដីកាសម្រេចសេរីភាពរូបលោកមិនឱ្យចូលរួមក្នុងសកម្មភាពតវ៉ាផ្សេងៗ ។
លោក រ៉ុង ឈុន ក៏ចាត់ទុកការកោះហៅរូបលោកមកសាកសួរនៅពេលនេះ ក៏ជាផ្នែកមួយនៃការគំរាមកំហែងនិងរារាំង ក្នុងដំណើរការចរចាការទាមទារការដំឡើងប្រាក់សខែកម្មករផងដែរ ។ បានកត់សម្គាល់ថា នៅពេលដែលលោក រ៉ុង ឈុន ទៅសាលាដំបូង ក៏ឃើញមានអ្នកគាំទ្រប្រមាណពី៣០ទៅ៤០នាក់បានឈរនៅមុខសាលាដំបូងដែរ ដោយរង់ចាំស្ដាប់លទ្ធផលតើលោក រ៉ុង ឈុន ត្រូវឃុំខ្លួន ឬអត់ ?
នៅរសៀលថ្ងៃដដែលនេះដែរ ប្រធានសហជីពមួយរូបគឺលោកស្រី យ៉ាង សុភ័ណ្ឌ ប្រធានសហព័ន្ធសហជីពកម្ពុជានឹងត្រូវចូលខ្លួន
បំភ្លឺនៅសាលាដំបូងរាជធានីភ្នំពេញផងដែរ ។ ការកោះហៅប្រធានសហជីពទាំងពីរឱ្យចូលមកបំភ្លឺនៅថ្ងៃនេះ ធ្វើឡើងតាមពាក្យបណ្ដឹងរបស់សមាគមរោងចក្រកាត់ដេរកម្ពុជា(GMAC)ដោយចោទពីបទហិង្សាដោយចេតនា មានស្ថានទម្ងន់ទោស ធ្វើឱ្យខូចខាតដោយចេតនាមានស្ថានទម្ងន់ទោស គំរាមកំហែងថានឹងធ្វើឱ្យខូចខាតដែលភ្ជាប់នូវបញ្ហាអ្វីមួយ និងប្រើមធ្យោបាយដើម្បីជាឧបសគ្គដល់ចរាចរណ៍សាធារណៈដែលប្រព្រឹត្តនៅចំណុចមុខសួនឧស្សាហកម្មកាណាឌីយ៉ា ផ្លូវវេងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ កាលពីថ្ងៃទី២៥ ខែធ្នូ ឆ្នាំ២០១៣ រហុតដល់ថ្ងៃទី៣ មករា ឆ្នាំ២០១៤ ដែលបានធ្វើឱ្យមានអ្នកស្លាប់និងរបួសជាច្រើននាក់ ។ ស្ថានភាពនាពេលនោះត្រូវបានចាត់ថាជាភាពខ្មៅងងឹតមួយជុំវិញការទាមទារប្រាក់ខែគោលរបស់កម្មករ៕
ចែករំលែកព័តមាននេះ