ខេត្តមណ្ឌលគិរី ៖ ប្រធានប៉ុស្តិ៍នគរបាលឃុំក្រង់តេះ ត្រូវប្រជាសហគមន៍នៅឃុំក្រង់តេះចំនួន១០០គ្រួសារ នាំគ្នាផ្តិតមេដៃប្ដឹងឱ្យចុះចេញពីតំណែងដោយចោទប្រកាន់ថា ជាប់ពាក់ព័ន្ធបទល្មើសព្រៃឈើកាប់បំផ្លាញព្រៃក្នុងសហគមន៍ពួកគាត់ ។
ប្រភពបានឱ្យដឹងថា តំណាងប្រជាសហគមន៍ក្នុងឃុំក្រង់តេះបានយកពាក្យបណ្តឹង និងស្នាមមេដៃជាង១០០គ្រួសារ ដើម្បីប្តឹងលោកយឹម បាន មេប៉ុស្តិ៍រដ្ឋបាលឃុំក្រង់តេះ កាលពីព្រឹកថ្ងៃទី២៩ តុលា ឆ្នាំ២០១៤ ដោយចោទប្រកាន់ពីបទបានប្រព្រឹត្តបទល្មើសកាប់បំផ្លាញព្រៃឈើយ៉ាងអនាធិបតេយ្យក្នុងដីសហគមន៍នៅចំណុចអូរនិល ខាងកើតភូមិក្រង់តេះ ហើយបានកាត់ច្រៀកជ្រលង់ម្រេចរាប់ពាន់ដើម កាលពីថ្ងៃទី៩ តុលា ឆ្នាំ២០១៤ថ្មីៗនេះ ។
ប្រភពបន្តថា គោលបំណងរបស់ប្រជាសហគមន៍រស់នៅឃុំក្រង់តេះ ទាមទារផ្លាស់ប្តូរលោកនាយប៉ុស្គិ៍រដ្ឋបាលក្រង់តេះចោល ព្រោះនាពេលកន្លងមក ពួកគាត់អះអាងថា លោកមេប៉ុស្តិ៍ធ្លាប់មានប្រវត្តិពាក់ព័ន្ធបទល្មើសព្រៃឈើជាច្រើនករណី និងជាមេឈ្មួញរកស៊ីឈើប្រណីតផងដែរ ។
ជុំវិញព័ត៌មានខាងលើ លោកត្រេក ស៊ីផុន មេឃុំក្រង់តេះបានបញ្ជាក់ថា លោកទទួលបានពាក្យបណ្តឹងពីប្រជាសហគមន៍មែន កាលពីថ្ងៃទី៣០ តុលា ២០១៤ គាត់សុំធ្វើការសម្របសម្រួលគ្នាថ្នាក់មូលដ្ឋានដែរ តែក្រុមប្រជាពលរដ្ឋមិនព្រម លោកក៏បញ្ជូនពាក្យបណ្ដឹងទៅស្រុកពេជ្រាដា ដើម្បីធ្វើការដោះស្រាយបន្ត ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ