រាជធានីភ្នំពេញ ៖ យោងតាមសេចក្តីជូនដំណឹងរបស់ក្រុមប្រឹក្សាជាតិប្រឆាំងអំពើពុករលួយ បានឲ្យដឹងថា ក្នុងខែតុលា ២០១៤នេះ មានមន្ត្រីចំនួន១៣៧រូប ចូលប្រកាសទ្រព្យសម្បត្តិនិងបំណុល ក្នុងនោះមន្ត្រី៩២រូបប្រកាសទ្រព្យសម្បត្តិនិងបំណុល ដោយទើបតែងតាំងថ្មី និង៤៥រូបប្រកាសទ្រព្យសម្បត្តិ និងបំណុល ដោយលាឈប់និងចប់អាណត្តិ ។
ទាក់ទងក្រុមប្រឹក្សាជាតិប្រឆាំងអំពើពុករលួយនេះផងដែរ នារសៀលថ្ងៃទី៣០ តុលា ២០១៤ អង្គភាពមួយនេះក៏បានបើកកិច្ចប្រជុំលើកទី៤៦ ក្រោមវត្តមានលោក តុប សំ ប្រធានក្រុមប្រឹក្សាជាតិប្រឆាំងអំពើពុករលួយ ។ ក្នុងកិច្ចប្រជុំនោះក្រុមប្រឹក្សាជាតិប្រឆាំងអំពើពុករលួយបានបោះឆ្នោត ជាឯកច្ឆ័ន្ទជ្រើសរើសលោក ស៊ុយ ម៉ុងលាង ជាអនុប្រធានក្រុមប្រឹក្សាជាតិប្រឆាំងអំពើពុករលួយជំនួស លោក ប្រាក់ សុខ ដែលបានទទួលមរណភាព ។
នាឱកាសកិច្ចប្រជុំនោះដែរ ក្រុមប្រឹក្សាជាតិប្រឆាំងអំពើពុករលួយក៏បានពិនិត្យនិងអនុម័តកំណត់ហេតុកិច្ចប្រជុំលើកទី៤៥រួមទាំងស្តាប់របាយការណ៍នៃចំណុចសំខាន់ៗមួយចំនួននៃសកម្មភាពអង្គភាពប្រឆាំងអំពើពុករលួយសម្រាប់ខែតុលា ឆ្នាំ២០១៤ផងដែរ ៕
ចែករំលែកព័តមាននេះ