រាជធានីភ្នំពេញ ៖ កាលពីរាត្រីថ្ងៃទី២៥ ខែតុលា ឆ្នាំ២០១៤ នៅសាលសន្និសីទចតុម្មុខ លោកហ៊ុន ម៉ាណែត នាយរងសេនាធិការចម្រុះនៃកងយោធពលខេមរភូមិន្ទ បានប្រកាសបើកការសម្តែងផ្ទាំងទស្សនីយភាពល្ខោនសហសម័យរឿង «អរុណរះនៃកម្ពុជា» ក្នុងបំណងរៃអង្គាស ប្រាក់ជួយដល់កុមារកំព្រានៅកម្ពុជា ។ ក្នុងឱកាសនោះមានភ្ញៀវជាតិ និងអន្តរជាតិចូលទស្សនាប្រហែលជាង៥០០នាក់ ។
រាជធានីភ្នំពេញ ៖ កាលពីរាត្រីថ្ងៃទី២៥ ខែតុលា ឆ្នាំ២០១៤ នៅសាលសន្និសីទចតុម្មុខ លោកហ៊ុន ម៉ាណែត នាយរងសេនាធិការចម្រុះនៃកងយោធពលខេមរភូមិន្ទ បានប្រកាសបើកការសម្តែងផ្ទាំងទស្សនីយភាពល្ខោនសហសម័យរឿង «អរុណរះនៃកម្ពុជា» ក្នុងបំណងរៃអង្គាស ប្រាក់ជួយដល់កុមារកំព្រានៅកម្ពុជា ។ ក្នុងឱកាសនោះមានភ្ញៀវជាតិ និងអន្តរជាតិចូលទស្សនាប្រហែលជាង៥០០នាក់ ។
«អរុណរះនៃកម្ពុជា» បង្កើតឡើងខណៈដែលកុមារចំនួន១២០នាក់ មានចំណាប់អារម្មណ៍ចង់រៀនរាំចង្វាក់ hip-hop និងនៅពេលដែលនាយិកាសាលមហោស្រព ទីក្រុង Adelaide និងគ្រូរបាំ Ninian Donald បានសង្កេតឃើញពីជំនាញសម្តែងរបាំ និងលេងភ្លេងបុរាណខ្មែររបស់ពួកគេ ។
នៅក្នុងឱកាសនោះលោកស្រី Geraldine Cox នាយិកាប្រចាំប្រទេស និងជាប្រធានមូលនិធិអូស្ត្រាលី-កម្ពុជា ឱ្យដឹងថា ផ្ទាំងទស្សនីយភាពរឿង «អរុណរះនៃកម្ពុជា» នឹងធ្វើឱ្យអ្នកទស្សនាសើចសប្បាយផង និងយំផង មានគ្រប់រសជាតិ ដែលបានឆ្លុះបញ្ចាំងអំពីជីវិត និងជីវភាពប្រចាំថ្ងៃរបស់ប្រជាជនកម្ពុជានៅក្នុងសម័យអង្គរ ក៏ដូចជាមុននឹងមានសង្គ្រាម ។
លោកស្រី Geraldine Cox ថ្លែងថា យើងមិនអាចបង្ហាញជូនលោកអ្នកនូវប្រវត្តិសាស្ត្ររបស់កម្ពុជាបានល្អទេ បើមិនបានបង្ហាញជូនពីរបបប្រល័យពូជសាសន៍ ប៉ុល ពត ហើយក្នុងនោះ យើងក៏បង្ហាញជូនអំពីកម្ពុជាក្នុង សម័យបច្ចុប្បន្នដែរ ។ ការសម្តែងថ្ងៃនេះ គឺជាការសម្តែងដោយកុមារនៅក្នុងភូមិអរុណរះ ដែលទាក់ទងនឹងវប្បធម៌ទូទៅ និងរបាំ ផ្សេងៗ ។ កុមារា-កុមារីដែលជាអ្នកសម្តែងនៅក្នុងកម្មវិធីនេះ គឺជាកុមារដែលធ្លាប់រងបញ្ហាលំបាកជាច្រើននៅក្នុងជីវិតរបស់ពួកគេ ។
លោកហ៊ុន ម៉ាណែត បានសម្តែងការគោរព និងថ្លែងអំណរគុណចំពោះលោកស្រី Geraldine Cox ដែលបានចំណាយពេលវេលាជាច្រើន ឬស្ទើរតែមួយឆាកជីវិតរបស់លោកស្រី រស់នៅលើទឹកដីកម្ពុជា ជាមួយនឹងកិច្ចខំប្រឹងប្រែងស្ថាបនាភូមិកុមារអរុណរះ ចាប់តាំងពីឆ្នាំ១៩៩៣ ក្នុងបេសកកម្មផ្តល់ការថែទាំ ការការពារ ការអប់រំ ការអភិវឌ្ឍទាំងរាងកាយ និងស្មារតីដល់កុមារកម្ពុជា ដែលកំព្រាឪពុកម្តាយ កុមារដែលគេបោះបង់ចោល កុមារដែលត្រូវបានគេជួញដូរ និងរំលោភបំពាន ។
លោកហ៊ុន ម៉ាណែត ថ្លែងថា «លោកស្រីគឺពិតជាអ្នកម្តាយមួយរូបបានផ្តល់នូវក្តីស្រឡាញ់ ក្នុងព្រហ្មវិហារធម៌ទាំងបួនដល់កុមារកម្ពុជារាប់រយនាក់ ខណៈដែលពួកគេបានបាត់បង់ក្តីសង្ឃឹម និងភាពកក់ក្តៅពីមុនមក» ។
លោកហ៊ុន មា៉ណែត លើកឡើងថា បន្ទាប់ពីភ្លើងសង្គ្រាម សម័យប្រល័យពូជសាសន៍ត្រូវបានបញ្ចប់ សង្គ្រាមផ្ទៃក្នុងប្រទេសត្រូវបានរលំរលាយ ស្ថិរភាពនយោបាយត្រូវបានរក្សា កត្តាសន្តិភាពនៅពេញផ្ទៃប្រទេសបានផ្តល់លទ្ធភាពឱ្យរាជរដ្ឋាភិបាលដាក់ចេញនូវវិធានការជាច្រើន ក្នុងការលើកម្ពស់ការអនុវត្ត
សិទ្ធិជាមូលដ្ឋាទាំងបួនរបស់កុមារ ស្របតាមអនុសញ្ញានៃអង្គការសហប្រជាជាតិ ស្តីពីសិទ្ធិកុមារ ។ ជាក់ស្តែងការអភិវឌ្ឍវិស័យកុមារនៅកម្ពុជា ត្រូវបានកំណត់យ៉ាងច្បាស់នៅក្នុងមុំទី៤នៃយុទ្ធសាស្ត្រចតុកោណដែលរាជរដ្ឋាភិបាលបានកំណត់ថា កុមារគឺជាអនាគតរបស់ប្រទេសជាតិ ។ ការបំពេញបេសកកម្ម និងភារកិច្ចរបស់ភូមិកុមារអរុណរះនាពេលកន្លងមក បច្ចុប្បន្ន និងពេលអនាគត គឺជាផ្នែកមួយនៃការខំប្រឹងប្រែងក្នុងចំណោមកិច្ចខំប្រឹងប្រែងជាច្រើនក្នុងស្ថាប័នរដ្ឋ អង្គការក្រៅរដ្ឋាភិបាល និងវិស័យឯកជន ដែលរាជរដ្ឋាភិបាលបានជំរុញ យកចិត្តទុកដាក់ជាប់ជាប្រចាំ ព្រោះការអភិវឌ្ឍប្រទេសជាតិ គឺជាកូនសោគន្លឹះសម្រេចភារកិច្ចកាត់បន្ថភាពក្រីក្រ និងការអភិវឌ្ឍប្រកបដោយចីរភាព គឺការវិនិយោគលើវិស័យសុខុមាលភាពរបស់កុមារ ដើម្បីពួកគេក្លាយជាសសរទ្រូងដ៏រឹងមាំរបស់ប្រទេសជាតិទៅថ្ងៃក្រោយ ។
នៅមុនពេលសម្តែង ផ្ទាំងទស្សនីយភាព ល្ខោនសហសម័យរឿង «អរុណរះនៃកម្ពុជា»លោកហ៊ុន ម៉ាណែត បានជូនប្រាក់មួយចំនួនរបស់សម្តេចតេជោហ៊ុន សែន និងសម្តេចកិត្តិព្រឹទ្ធបណ្ឌិតប៊ុន រា៉នី ហ៊ុន សែន ដល់លោកស្រី Geraldine Cox នាយិកាប្រចាំប្រទេស និងជាប្រធានមូលនិធិអូស្ត្រាលី-កម្ពុជា ក្នុងបំណងរួមចំណែកជួយដល់កុមារកំព្រានៅកម្ពុជាផងដែរ ៕
ចែករំលែកព័តមាននេះ