ខេត្តកណ្តាល ៖ កម្លាំងសមត្ថកិច្ចចម្រុះមួយក្រុម រួមមានមន្ត្រីសាលាស្រុកអង្គស្នួល ប៉ូលិស ប៉េអឹម ព្រមទាំងអាជ្ញាធរឃុំ-ភូមិ ដែលដឹកនាំដោយលោក ទេព មុនិន្ទ ព្រះរាជអាជ្ញារងអមសាលាដំបូងខេត្ត បានចុះទៅអនុវត្តដីកាសម្រេចការពារដីមួយកន្លែង កាលពីថ្ងៃទី២២ តុលា នៅក្នុងភូមិព្រៃខ្លា ឃុំក្រាំងម្កាក់ ស្រុកអង្គស្នួល ។
ទាក់ទិននឹងការចុះអនុវត្តដីកានេះ ត្រូវបានប្រជាពលរដ្ឋសម្ដែងការហួសចិត្តគ្រប់ៗគ្នា និងមិននឹកស្មានថាមានរឿងបែបនេះកើតឡើង ។ ពួកគាត់ឱ្យដឹងថា កាលពីដើមឡើយ មានក្រុមគ្រួសារមួយមានដីធ្វើផ្ទះនៅដោយសារតែម្ដាយមីងចែកឱ្យ១ឡូត៍ ថែមទាំងឱ្យខ្ចីដីចម្ការមួយកន្លែងដាំដុះបង្កបង្កើនផលថែមទៀត ហើយកាលម្ដាយបង្កើតរបស់ខ្លួននៅរស់ គឺមានភាពផ្អែមល្ហែមជាមួយម្ដាយមីងណាស់ ។
លុះក្រោយពេលម្ដាយរបស់ខ្លួនស្លាប់ទៅ កូនមិនបានប្រគល់ដីចម្ការទៅឱ្យម្ដាយមីងវិញទេ ផ្ទុយទៅវិញបែរជាបែកគំនិតដាក់ពាក្យប្ដឹងទៅតុលាការ ទាមទារយកដីចម្ការមួយកន្លែងនោះពីម្ដាយមីងថែមទៀត ដោយអះអាងថាដីនោះជារបស់ម្ដាយខ្លួន ។ ប៉ុន្តែដីចម្ការខាងលើមិនទាន់មានប្លង់នៅឡើយ ចំណែកឯការប្ដឹងនោះ បានក្លាយជាចំណេះជិះកឯង ព្រោះនៅក្នុងពាក្យបណ្តឹង ក្រុមគ្រួសារមួយនោះបានទាមទារយកដីចម្ការមែន តែបែរជាយកលេខប្លង់ដីផ្ទះខ្លួនឯងទៅប្រាប់តុលាការ ប្រុងបន្លំទៅវិញ ទើបតុលាការចេញដីកាសម្រេចរក្សាការពារលើដី ដែលមានប្លង់កម្មសិទ្ធិ នៅក្នុងពាក្យបណ្ដឹងនោះ ។
លុះដល់ពេលចុះអនុវត្ត គឺបានវាស់វែងនៅលើដីលំនៅឋានរបស់ដើមបណ្ដឹងនោះទៅវិញ ។ ព្រោះប្លង់នៅក្នុងពាក្យបណ្ដឹងនោះគឺជាប្លង់ដីលំនៅឋាន មិនមែនដីចម្ការដែលខ្លួនចង់ទាមទារឡើយ ដែលនេះជារឿងគួរឱ្យអស់សំណើចមួយ មិនខុសពីការប្ដឹងទាមទារដីផ្ទះខ្លួនឯងដែលគ្មានរឿងនោះឡើយ ។ នៅក្នុងដីកាសម្រេចរក្សាការពារលេខ០៦០ដសរកព របស់សាលាដំបូងខេត្តកណ្ដាល គឺមានឈ្មោះ ឡន សុភាព ភេទស្រី អាយុ៥០ឆ្នាំ និងប្ដីឈ្មោះ ឡាញ់ សំអុល អាយុ៥៥ឆ្នាំ រស់នៅក្នុងភូមិព្រៃខ្លា ឃុំក្រាំងម្កាក់ ស្រុកអង្គស្នួល បានប្ដឹងស្ត្រីចំណាស់ម្នាក់ឈ្មោះ ម៉ាន់ វ៉ាន មានទីលំនៅក្នុងភូមិជាមួយគ្នា និងត្រូវជាម្ដាយមីងទៀតផង ។ ពាក្យបណ្ដឹងខាងលើ បានស្នើសុំឱ្យតុលាការចេញដីកាសម្រេចរក្សាការពារដីលេខA-5- 0197 ចុះថ្ងៃទី៣ មិថុនា ឆ្នាំ១៩៩២ និងឱ្យស្ត្រីឈ្មោះ ម៉ាន់ វ៉ាន រុះរើរបងចេញពីដីខាងលើ ។ ហេតុនេះហើយ ទើបពេលចុះអនុវត្ត កម្លាំងសមត្ថកិច្ចចម្រុះធ្វើទៅតាមដីកាសម្រេចរក្សាការពារនោះ ទោះចំដីផ្ទះឬដីចម្ការ សមត្ថកិច្ចមិនដឹងឡើយ ។ ចំណែកដើមបណ្ដឹង មានការខកចិត្តយ៉ាងខ្លាំងនៅពេលដែលកម្លាំងចម្រុះចុះអនុវត្តលើដីលំនៅឋានខ្លួនឯងបែបនេះ ។
ឈ្មោះ ឡន សុភាព បានអះអាងថា ដីកំពុងមានទំនាស់នោះ គឺជាដីកេរដំណែលខ្មោចម្ដាយរបស់ខ្លួនឈ្មោះ ពុយ ធុក ដែលបានកាន់កាប់តាំងពីឆ្នាំ១៩៨៦ ដល់ឆ្នាំ១៩៩២ និងបានធ្វើប្លង់កម្មសិទ្ធិលេខ A-5- 0197 នេះ រហូតមកដល់ឆ្នាំ២០១២ ម្ដាយខ្លួនក៏បានស្លាប់ទៅ ។ ពេលនេះស្រាប់តែឈ្មោះ ម៉ាន់ វ៉ាន បានទៅជីកដីបម្រុងដាំដុះ ថែមទាំងបានធ្វើរបងព័ទ្ធយកដីនោះទៀត ទើបខ្លួនប្ដឹងទៅតុលាការតែម្ដង ។
ដោយឡែក ស្ត្រីឈ្មោះ ម៉ាន់ វ៉ាន បានអះអាងថា ដីចម្ការដែលឈ្មោះ ឡន សុភាព ប្ដឹងទាមទារយកនោះ គឺជាដីដែលគាត់កាន់កាប់ តាំងពីឆ្នាំ១៩៨៣មកម្លេ៉ះ លុះដល់ឆ្នាំ១៩៨៦ ឈ្មោះ ពុយ ធុក ត្រូវជាម្ដាយរបស់ដើមបណ្ដឹងបានទៅសុំគាត់ និងអាជ្ញាធរភូមិ ដើម្បីស្នាក់នៅ ។ ពេលនោះដោយយល់ថាជាបងប្អូន គាត់ក៏ឱ្យនៅ និងថែមទាំងឱ្យខ្ចីដីចម្ការមួយកន្លែងទៀតដែលស្ថិតនៅជាប់ដីផ្ទះនោះ សម្រាប់បង្កបង្កើនផលទៀតផង ដែលកាលណោះប្តីប្រពន្ធឈ្មោះ ឡន សុភាព និងឈ្មោះ ឡាញ់ សំអុល មិនបាននៅទីនោះទេ គឺនៅឯភ្នំពេញឯណោះ ។
លុះដល់ឆ្នាំ២០១២ ក្រោយពេលដែលឈ្មោះ ពុយ ធុក ស្លាប់ទៅ ស្រាប់តែកូនមកប្ដឹងគាត់ទាមទារយកដីចម្ការទៅវិញ ។ មិនតែប៉ុណ្ណោះ ការជីករណ្ដៅនៅក្នុងដីចម្ការនោះ គឺគាត់មានសិទ្ធិជីកគ្រប់បែបយ៉ាង ព្រោះជាដីរបស់គាត់ ហើយដើមបណ្ដឹងនេះជាអ្នកទិញអាចម៍ដីនោះពីគាត់ថែមទៀតផង ហេតុអីបែរជាប្ដឹងទាមទារថាដីនោះជារបស់ខ្លួនទៅវិញ ។ ប៉ុន្តែពេលនេះ គាត់អរគុណតុលាការហើយដែលបានផ្ដល់យុត្តិធម៌ដល់គាត់ និងបានចេញដីកាសម្រេច និងអនុវត្តត្រឹមត្រូវ ៕
ចែករំលែកព័តមាននេះ