ខេត្តកំពង់ឆ្នាំង ៖ ប្រាសាទ «ស្រីលក្ខណ៍» ឬប្រាសាទគោកខ្វិត គឺជាប្រាសាទបុរាណអាយុជាង៩០០ឆ្នាំ ។ ប្រាសាទនេះស្ថិតលើទីទួលដែលទើបកសាងវត្តថ្មីមួយ ក្នុងភូមិខ្វិត ឃុំតាំងក្រសាំង ស្រុកបាធាយ ជាប់ព្រំប្រទល់ឃុំព្រៃគ្រី ស្រុកជលគីរី ខេត្តកំពង់ឆ្នាំង។
លោក ចក់ សុគង់ ប្រធានការិយាល័យវប្បធម៌ និងវិចិត្រសិល្បៈស្រុកបាធាយ បានរៀបរាប់ថា តាមការស្រាវជ្រាវរបស់ក្រសួងវប្ប
ខេត្តកំពង់ឆ្នាំង ៖ ប្រាសាទ «ស្រីលក្ខណ៍» ឬប្រាសាទគោកខ្វិត គឺជាប្រាសាទបុរាណអាយុជាង៩០០ឆ្នាំ ។ ប្រាសាទនេះស្ថិតលើទីទួលដែលទើបកសាងវត្តថ្មីមួយ ក្នុងភូមិខ្វិត ឃុំតាំងក្រសាំង ស្រុកបាធាយ ជាប់ព្រំប្រទល់ឃុំព្រៃគ្រី ស្រុកជលគីរី ខេត្តកំពង់ឆ្នាំង។
លោក ចក់ សុគង់ ប្រធានការិយាល័យវប្បធម៌ និងវិចិត្រសិល្បៈស្រុកបាធាយ បានរៀបរាប់ថា តាមការស្រាវជ្រាវរបស់ក្រសួងវប្បធម៌ និងវិចិត្រសិល្បៈ ប្រាសាទនោះឈ្មោះពិតគឺ «ប្រាសាទគោកខ្វិត» ចំណែកឈ្មោះប្រាសាទស្រីលក្ខណ៍ គឺជាឈ្មោះដែលតាអាចារ្យវត្តហៅប៉ុណ្ណោះ ។ ប្រាសាទនេះធ្វើពីថ្មបាយក្រៀមក្នុងចន្លោះសតវត្សទី១១និង១២ ។ តួប្រាសាទធ្វើពីថ្មបាយក្រៀម និងខ្លោងទ្វារបែរទៅទិសខាងកើត ធ្វើពីថ្មភក់ ។ ចំណែកសសរពេជ្រ និងចម្លាក់ផ្តែនៅពីលើខ្លោងទ្វារក៏ធ្វើពីថ្មភក់ដែរ ។
លោក ចក់ សុគង់ ឱ្យដឹងថា ដើមឡើយ ប្រាសាទគោកខ្វិតគឺស្ថិតនៅឯកា ដោយពុំសូវមាននរណាស្គាល់ និងចាប់អារម្មណ៍ឡើយ គឺមានតែដូនជីតាជី សង់ខ្ទមសំណាក់ធម៌ប៉ុណ្ណោះ។ មន្ទីរវប្បធម៌ និងវិចិត្រសិល្បៈខេត្តបានពិគ្រោះយោបល់ជាមួយគ្នាថា តើគួរឱ្យតាជីយាយជីចេញពីបរិវេណប្រាសាទឬយ៉ាងណា ព្រោះវានឹងអាចធ្វើឱ្យប៉ះពាល់ដល់ប្រាសាទ ។ តាមការពិគ្រោះយល់ថា បើឱ្យតាជីយាយជីទាំងនោះចេញមិនសមទេ តែបើឱ្យពួកគាត់ទិញដីនៅជាប់បរិវេណប្រាសាទយកទៅធ្វើជាវត្តអារាម ទើបប្រសើរ ។
ពេលមានវត្តនឹងមានមនុស្សទៅទស្សនាកម្សាន្ត ប្រាសាទមានអ្នកថែរក្សា មានអ្នកកសាងវត្ត និងមានការកសាងផ្លូវចូលប្រាសាទ ។
ដូនជី តាជីដែលសំណាក់ធម៌នៅទីនោះបានឯកភាពគ្នា ហើយខិតខំរៃអង្គាសបច្ច័យរហូតបានប្រាក់ទិញដីជាប់ព្រំដីប្រាសាទ ហើយបានចាប់ផ្តើមកសាងវត្តក្នុងអំឡុងឆ្នាំ២០១០ ដោយដាក់ឈ្មោះថា «វត្តប្រាសាទស្រីលក្ខណ៍» ។ ក្រោយពីកសាងវត្តមក មានពុទ្ធបរិស័ទជាច្រើនទៅគោរពបូជា និងទស្សនាប្រាសាទគោកខ្វិត ដែលគ្មានអ្នកណាចាប់អារម្មណ៍ពីមុនមកនោះ ដូចការគ្រោងទុកមែន។
លោកប្រធានការិយាល័យវប្បធម៌បញ្ជាក់ថា ក្នុងរបបខ្មែរក្រហមប្រាសាទនេះមានរូបសំណាកតោមួយគូ ធ្វើអំពីថ្មភក់ តែក្រោយមកក៏បាត់មិនដឹងទៅណាទេ ។ព្រះសង្ឃនាម អុន ឌឿន មានថេរដីកាថា មុនពេលកកើតវត្ត ព្រះអង្គក៏ជាអ្នកសំណាក់ធម៌នៅជើងប្រាសាទដែរ ។ ក្រោយពីមន្ទីរធម្មការណែនាំ ក៏ផ្តួចផ្តើមគំនិតគ្នាកសាងវត្តនេះឡើង ដើម្បីពុទ្ធបរិស័ទធ្វើបុណ្យទាន និងម្យា៉ងវិញទៀតបាននៅជិតប្រាសាទស្រួលមើលថែ ផង ។ លើសពីនេះទៅទៀត ពុទ្ធបរិស័ទជិតឆ្ងាយក្តី ពេលចង់មកធ្វើបុណ្យទាននៅវត្ត និងបានទស្សនាប្រាសាទបុរាណមួយនេះផងដែរ ។ចំពោះការដាក់ឈ្មោះវត្តថា «វត្តប្រាសាទស្រីលក្ខណ៍» គឺដោយសារស្រឡាញ់ឈ្មោះនេះ ។
វត្តប្រាសាទស្រីលក្ខណ៍ កសាងជាង៤ឆ្នាំមកហើយ តែនៅមិនទាន់មានអ្វីជាដុំកំភួនទេ គឺទើបតែបានចាក់គ្រឹះ និងចាក់សសរសាលាឆាន់ប៉ុណ្ណោះ នៅលើដីដែលបានទិញពីប្រជាពលរដ្ឋជាប់នឹងបរិវេណប្រាសាទក្នុងតម្លៃ៤ពាន់ដុល្លារ ។ បុព្វជិតដដែលរំឭកថា កាលពីព្រះអង្គពុំទាន់បួស នាឆ្នាំរោងទឹកឡើងខ្លាំង មានជនខិលខូចប្រដាប់ដោយកាំភ្លើង បើកកាណូតទៅដល់ជើងប្រាសាទ ។ ទឹកលិចពាក់កណ្តាលប្រាសាទ ហើយជនទាំងនោះបានកាយថ្មពីលើកំពូលប្រាសាទទម្លាក់ចូលទៅក្នុងទឹក ។
ពួកគេកាយយកចម្លាក់ផ្តែ ដែលធ្វើពីថ្មភក់នៅលើខ្លោងទ្វារប្រាសាទ ប៉ុន្តែយកមិនបានឡើយ បានត្រឹមតែធ្វើឱ្យខូចខាតកំពូលប្រាសាទអស់មួយចំនួនធំប៉ុណ្ណោះ ។ ពេលនោះព្រះអង្គជាអ្នកសំណាក់ធម៌ និងសម្រាន្តនៅមាត់ស្រះមុខវត្ត មិនហ៊ានទៅជិតជនទុច្ចរិតទាំងនោះទេ ។ព្រះសង្ឃ និងពុទ្ធបរិស័ទចំណុះជើងវត្ត «ប្រាសាទស្រីលក្ខណ៍» បានអំពាវនាវដល់សប្បុរសជននានា សូមជួយកសាងវត្តផង ព្រោះនៅមានការខ្វះខាតខ្លាំងណាស់ ។ ការចូលរួមជួយកសាងវត្តឱ្យរីកចម្រើនក៏ដូចជាជួយអភិរក្សប្រាសាទបុរាណនៅទីនោះដែរ៕
ចែករំលែកព័តមាននេះ