រាជធានីភ្នំពេញ ៖ បន្ទាប់ពីបើកដំណើរការអាជីវកម្មលើវិស័យធានារ៉ាប់រងអាយុជីវិតនៅកម្ពុជា ជាង២ឆ្នាំកន្លងមកនេះ ក្រុមហ៊ុនធានារ៉ាប់រងអាយុជីវិត Manulife Cambodia បានដាក់សម្ភោធបើកឱ្យប្រើប្រាស់ជាផ្លូវការនូវមជ្ឈមណ្ឌលបណ្ដុះបណ្ដាលទីប្រឹក្សាធានារ៉ាប់រងអាយុជីវិត ក្នុងគោលបំណងផ្សព្វផ្សាយពង្រីកការបណ្ដុះបណ្ដាលផ្នែកធនធានមនុស្ស និងអភិវឌ្ឍន៍វិស័យធានារ៉ាប់រងអាយុជីវិតនៅក្នុងប្រទេសកម្ពុជា ។ មជ្ឈមណ្ឌលបណ្ដុះបណ្ដាលនេះស្ថិតនៅអគារ «C» នៃមជ្ឈមណ្ឌលភ្នំពេញ សង្កាត់ទន្លេបាសាក់ ខណ្ឌចំការមន ត្រូវបានសម្ភោធជាផ្លូវការនៅព្រឹកថ្ងៃទី២១ តុលា ២០១៤ ដោយមានការចូលរួមជាអធិបតីពីសំណាក់លោកម៉ី វ៉ាន់ អគ្គនាយកនៃអគ្គនាយកដ្ឋានឧស្សាហកម្មហិរញ្ញវត្ថុនៃក្រសួងសេដ្ឋកិច្ច និងហិរញ្ញវត្ថុ លោក Indren Naidoo អនុប្រធានជាន់ខ្ពស់ និងអគ្គនាយកប្រចាំតំបន់ទទួលបន្ទុកប្រទេសកម្ពុជា ថៃ និងវៀតណាម នៃក្រុមហ៊ុន Manulife Asia ព្រមទាំងលោក Robert Elliott អគ្គនាយកប្រតិបត្តិនិងនាយកចាត់ការទូទៅ នៃក្រុមហ៊ុន Manulife Cambodia ។
លោក Robert Elliott បានមានប្រសាសន៍ថា Manulife ជាក្រុមហ៊ុនមួយដែលតែងតែផ្ដោតការយកចិត្តទុកដាក់ ចំពោះការអភិវឌ្ឍ និងការបណ្ដុះបណ្ដាលធនធានមនុស្សនៅគ្រប់ទីផ្សារដែលខ្លួនកំពុងប្រតិបត្តិការ ។ ការបង្កើតនូវមជ្ឈមណ្ឌលបណ្ដុះបណ្ដាលទីប្រឹក្សា ធានារ៉ាប់រងអាយុជីវិត នាពេលនេះ មានគោលបំណងសំខាន់ពីរ ទីមួយផ្ដល់ជូនយុវជនកម្ពុជា នូវចំណេះដឹងដ៏សមស្របមួយប្រកបដោយបទដ្ឋានអន្តរជាតិអំពីវិស័យធានារ៉ាប់រង អាយុជីវិត ពីព្រោះថា វិស័យនេះ ជាវិស័យដ៏ថ្មីសន្លាងមួយសម្រាប់ប្រជាជនកម្ពុជា ។ គោលបំណងមួយទៀតនោះ គឺចង់ឱ្យប្រជាជនកម្ពុជា ទទួលបាននូវជំនាញដ៏ច្បាស់លាស់សម្រាប់អាជីពការងាររបស់ខ្លួន ក្នុងការផ្ដល់ជូនប្រជាជនទូទាំងប្រទេស នូវការសម្រេចចិត្តដ៏ត្រឹមត្រូវក្នុងការការពារអនាគតហិរញ្ញវត្ថុរបស់ក្រុមគ្រួសារនីមួយៗ ។
លោកបន្តថា ការដាក់ឱ្យប្រើប្រាស់នូវមជ្ឈមណ្ឌលបណ្ដុះបណ្ដាលទីប្រឹក្សាធានារ៉ាប់រងអាយុជីវិតនេះ ក៏បានឆ្លុះបញ្ចាំងពីការតាំងចិត្តដ៏រឹងមាំរបស់ក្រុមហ៊ុន Manulife ចំពោះការយកចិត្តទុកដាក់ចំពោះអតិថិជនកម្ពុជា ក្នុងការផ្ដល់ការប្រឹក្សាផ្នែកហិរញ្ញវត្ថុដែលប្រកបទៅដោយគុណភាពតាមរយៈទីប្រឹក្សាធានារ៉ាប់រងដែលទទួលបាននូវការបណ្ដុះបណ្ដាលដ៏ម៉ត់ចត់ និងត្រឹមត្រូវ ។
លោកម៉ី វ៉ាន់ អគ្គនាយកនៃអគ្គនាយកដ្ឋានឧស្សាហកម្មហិរញ្ញវត្ថុនៃក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា ក្នុងនាមជាបញ្ញត្តិករធានារ៉ាប់រង យើងមានមោទនភាព និងក្តីសោមនស្សរីករាយដែលបានឃើញការរីកចម្រើនជាបន្តបន្ទាប់ ក្នុងការពង្រឹងនិងពង្រីកអាជីវកម្មរបស់ខ្លួននៅក្នុងប្រទេសកម្ពុជា ។ យើងក៏សូមកោតសរសើរដោយស្មោះចំពោះក្រុមហ៊ុន Manulife ដែលបាននាំមកនូវបទពិសោធន៍ជំនាញ១២៥ឆ្នាំមកប្រទេសកម្ពុជា ជាពិសេសផ្ដល់ការបណ្ដុះបណ្ដាលយុវជនកម្ពុជា ឱ្យមានជំនាញមួយពិតប្រាកដទាក់ទងនឹងវិស័យធានារ៉ាប់រងអាយុជីវិត និងរួមចំណែករៀបចំផ្ដល់នូវសំណាញ់សុវត្ថិភាពសង្គមជាមួយរាជរដ្ឋាភិបាលកម្ពុជា ។
លោក Indren Naidoo អនុប្រធានជាន់ខ្ពស់ និងអគ្គនាយកប្រចាំតំបន់នៃក្រុមហ៊ុន Manulife ទទួលបន្ទុកប្រចាំកម្ពុជា ថៃ និងវៀតណាម បានបញ្ជាក់ថា ប្រជាជនកម្ពុជា ជាប្រជាជនដែលមានសក្តានុពលមានការយកចិត្តទុកដាក់និងឆាប់ចាប់បានលឿននូវការបណ្ដុះបណ្ដាល ។ ក្រុមហ៊ុន Manulife រីករាយនឹងផ្ដល់ជូនដល់ពួកគាត់នូវការបណ្ដុះបណ្ដាលដ៏ពេញលេញមួយនិងក្លាយជាទីប្រឹក្សាធានារ៉ាប់រងអាយុជីវិតអាជីព ។
គួរបញ្ជាក់ថា ចាប់តាំងពីឆ្នាំ២០១២ មក ក្រុមហ៊ុន Manulife Cambodia បានធ្វើការបណ្ដុះបណ្ដាល និងអភិវឌ្ឍទីប្រឹក្សាជំនាញផ្នែកធានារ៉ាប់រងអាយុជីវិតបានរាប់ពាន់នាក់ ដែលជំនាញនេះ បានជួយឱ្យពួកគាត់យល់កាន់តែច្បាស់ទាក់ទងនឹងការជួយក្រុមគ្រួសាររបស់គាត់ក៏ដូចជាប្រជាជកម្ពុជាទាំងមូលក្នុងការការពារហិរញ្ញវត្ថុអនាគត ៕
ចែករំលែកព័តមាននេះ