កាលពីថ្ងៃទី១៦ តុលា នៅទីក្រុងមីទ្បង់ ប្រទេសអីុតាលី សម្តេចតេជោនាយករដ្ឋមន្ត្រី បានទទួលជួបនាយករដ្ឋមន្ត្រីថៃ លោកប្រាយុទ្ធ ចាន់អូចា ហើយនៅថ្ងៃបន្ទាប់ គឺថ្ងៃទី១៧ តុលា បានជួបជាមួយលោកជំទាវ ជូលីប៊ីស្សប រដ្ឋមន្ត្រីការបរទេសអូស្ត្រាលី ។ ក្នុងជំនួប ជាមួយសមភាគីថៃ សម្តេចតេជោនាយករដ្ឋមន្ត្រីបានសម្តែងការអបអរសាទរចំពោះការតែងតាំងលោកប្រាយុទ្ធ ចាន់់អូចា ជានាយករដ្ឋមន្ត្រីនៃប្រទេសថៃ ។
លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានឱ្យដឹងថា ជំនួបទ្វេភាគីនេះ បានធ្វើនៅក្រៅកិច្ចប្រជុំកំពូលអាស៊ី-អឺរ៉ុបលើកទី១០ ។ លោកប្រាយុទ្ធ ចាន់អូចា បានថ្លែងអំណរគុណ សម្តេចតេជោនាយករដ្ឋមន្ត្រី ដែលបានគាំទ្រនិងយល់ចំពោះសភាពការណ៍នៅក្នុងប្រទេសថៃ ។ លោកប្រាយុទ្ធ បានចាត់ទុកថា ការគាំទ្ររបស់សម្តេច គឺដូចជាគំនិតដែលកំពុងត្រូវការ នេះហើយជាមិត្តភាពពិត ។ កន្លងមក ថ្វីដ្បិតប្រទេសថៃឆ្លងកាត់អន្តរកាល ប៉ុន្តែកម្ពុជាមិនបានផ្តល់នូវអ្វីនាំឱ្យមានបញ្ហាទេ ។ កម្ពុជាក៏មិនឱ្យបញ្ហាដែលសេសសល់រវាងប្រទេសទាំង២នេះ មានជាបញ្ហាធ្វើឱ្យប៉ះពាល់ដល់កិច្ចសហប្រតិបត្តិការលើវិស័យផ្សេងៗទៀតដែរ ។ លោកប្រាយុទ្ធ បានស្នើសុំចង់បង្កើតតំបន់សេដ្ឋកិច្ចពិសេសនៅតាមព្រំប្រទល់កម្ពុជា-ថៃ ជាពិសេសមានគម្រោងបង្កើតរោងចក្រខ្នាតតូចមួយចំនួន ដើម្បីបង្កើតការងារ ។ លោកចង់បង្កើតមជ្ឈមណ្ឌលពាណិជ្ជកម្មមួយនៅតាមព្រំប្រទល់ ដើម្បីទិញកសិផលខ្មែរ សម្រាប់កែច្នៃលក់បន្តទៀត ។
លោករដ្ឋមន្ត្រីប្រតិភូអមនាយករដ្ឋមន្ត្រីមានប្រសាសន៍បន្តថា សម្រាប់កិច្ចសហប្រតិបត្តិការទ្វេភាគី គឺភាគីទាំង២បានឯកភាពធ្វើយ៉ាងណាទប់ស្កាត់ការទៅកាប់ឈើខុសច្បាប់ ។ កន្លងទៅ កម្ពុជាបានចាប់ជនជាតិថៃដែលយកលុយក្លែងក្លាយមកធ្វើចរាចរណ៍នៅកម្ពុជា ។ ទិសដៅសំខាន់ គឺត្រូវស្វែងរកឱ្យឃើញថា លុយក្លែងក្លាយនេះ ចេញមកពីណា ដើម្បីសហការគ្នានៅលើបញ្ហានេះ ។ លោកប្រាយុទ្ធ បានថ្លែងអំណរគុណសម្តេចតេជោនាយករដ្ឋមន្ត្រី ដែលកន្លងមក រាជរដ្ឋាភិបាលកម្ពុជាបានដោះលែងជនជាតិថៃ ដែលការដោះលែងនេះ គឺបានជួយដល់រដ្ឋាភិបាលថៃ ។ សម្តេចតេជោនាយករដ្ឋមន្ត្រី បានស្នើឱ្យថៃបង្កើតគណៈកម្មការដើម្បីជជែកនិងចរចាពីតំបន់ត្រួតគ្នា ដែលកន្លងមកភាគីទាំង២មិនបានចរចាគ្នាទេ ដោយសារស្ថានការណ៍នៅប្រទេសថៃ ។ ដោយទ្បែក គណៈកម្មការនេះនឹងពង្រឹងកិច្ចសហប្រតិបត្តិការទ្វេភាគី ហើយប្រើប្រាស់យន្តការដែលមានស្រាប់រវាងប្រទេសទាំង២ ដែលយន្តការនោះ បានបង្កើតរួចមកហើយ មានគណៈកម្មការចម្រុះព្រំដែន គណៈកម្មការចម្រុះរវាងរដ្ឋមន្ត្រីការបរទេសទាំង២ និងគណៈកម្មការខេត្តរវាងខេត្ត ។
យន្តការទាំងអស់ដែលមានស្រាប់ត្រូវប្រើប្រាស់ឱ្យមានដំណើរការទ្បើងវិញ ដើម្បីពង្រឹងនិងពង្រីកកិច្ចសហប្រតិបត្តិការទ្វេភាគី ។ សម្តេចតេជោនាយករដ្ឋមន្ត្រី ក៏បានអញ្ជើញលោកប្រាយុទ្ធ ចាន់អូចា មកធ្វើទស្សនកិច្ចនៅព្រះរាជាណាចក្រកម្ពុជា នាពេលខាងមុខ ហើយលោកនាយករដ្ឋមន្ត្រីថៃ បានទទួលដោយរីករាយនិងទទួលយកការអញ្ជើញនេះ ។ ដោយទ្បែក សម្តេចអគ្គមហាសេនាបតីតេជោ ហ៊ុន សែន បានអនុញ្ញាតឱ្យលោកជំទាវ ជូលីប៊ីស្សប រដ្ឋមន្ត្រីការបរទេសអូស្ត្រាលី ចូលជួបសម្តែងការគួរសម និងពិភាក្សាការងារនៅថ្ងៃទី១៧ តុលា ។ ក្នុងជំនួបដ៏មានសារសំខាន់នេះ លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានឱ្យដឹងថា រវាងប្រទេសកម្ពុជានិងប្រទេសអូស្ត្រាលី គឺមានកិច្ចសហប្រតិបត្តិការជាច្រើនទាំងកន្លងមក ក៏ដូចជាបច្ចុប្បន្ននេះ ។ ការពិភាក្សានេះ គឺឆ្លុះបញ្ចាំងទៅលើបញ្ហាជនភៀសខ្លួន ហើយភាគីទាំង២បានឯកភាពគ្នានៅក្នុងការអនុវត្តកិច្ចព្រមព្រៀង ។
ចំពោះបញ្ហាជនភៀសខ្លួននេះ គឺជាកាតព្វកិច្ចរបស់ប្រទេសកម្ពុជា ដោយសារកម្ពុជាជារដ្ឋភាគីនៃអនុសញ្ញាអង្គការសហប្រជាជាតិ ស្តីពីជនភៀសខ្លួន ។ កាលពីទសវត្សរ៍ឆ្នាំ៧០ ឆ្នាំ៨០ និងឆ្នាំ៩០ កមុ្ពុជាមានប្រជាពលរដ្ឋចេញពីប្រទេសច្រើនទៅរស់នៅប្រទេសក្រៅ ។ ដូច្នេះដោយសារកម្ពុជាជារដ្ឋភាគីនៃអនុសញ្ញាអង្គការសហប្រជាជាតិ យើងមានកាតព្វកិច្ចនេះ ។ ប៉ុន្តែទន្ទឹមនឹងនេះ កម្ពុជាមានលក្ខខណ្ឌផងដែរថា ជនភៀសខ្លួនដែលចង់មកប្រទេសកម្ពុជា ទាល់តែមានលក្ខណៈស្ម័គ្រចិត្ត ។ សម្តេចតេជោនាយករដ្ឋមន្ត្រី និងរដ្ឋមន្ត្រីការបរទេសអូស្ត្រាលី បានផ្លាស់ប្តូរមតិគ្នាពីបញ្ហាតំបន់ក៏ដូចជាបញ្ហាអន្តរជាតិមួយចំនួន រួមទាំងបញ្ហាជំងឺឆ្លងអេបូទ្បាផងដែរ ៕
ចែករំលែកព័តមាននេះ