ទាហានសហរដ្ឋអាមេរិកមួយក្រុមដែលមកពីឆ្មាំជាតិក្នុងរដ្ឋ Idaho បានបើកសិក្ខាសាលាហ្វឹកហ្វឺនផ្នែកពេទ្យមួយ រយៈពេលមួយសប្តាហ៍កាលពីពេលថ្មីៗនេះ សំរាប់សមាជិកមួយចំនួននៃកងយោធពលខេមរភូមិន្ទ។ ក្រុមទាំងសងខាងបានចែករំលែកបច្ចេកទេសមួយចំនួន នៅក្នុងការផ្លាស់ប្តូរខ្លឹមសារមេរៀនក្នុងលំហាត់ឆ្លើយតបផ្នែកពេទ្យនៅជួរមុខ ក្នុងរាជធានីភ្នំពេញ។
ក្រោមការចូលរួមឧបត្ថម្ភដោយកងទ័ពជើងគោកសហរដ្ឋអាមេរិកប្រចាំនៅតំបន់ប៉ាស៊ីហ្វិក កម្មវិធីនេះមានប្រធានបទជាច្រើន ដែលរួមមានការវាយតម្លៃអ្នកជំងឺ ការជួយស្រោចស្រង់ជីវិតជាមូលដ្ឋាន ការគ្រប់គ្រងផ្លូវដង្ហើម ការព្យាបាលសុក (Shock) ការព្យាបាលការរលាកភ្លើង និងប្រតិបត្តិការក្នុងករណីដែលមានស្លាប់និងរបួសច្រើន។
កម្មវិធីនេះបង្ហាញឱ្យឃើញការប្តេជ្ញាចិត្តជាបន្តរបស់សហរដ្ឋអាមេរិក ក្នុងការជួយកងយោធពលខេមរភូមិន្ទឱ្យចេះពង្រឹងសមត្ថភាពរបស់ខ្លួន ក្នុងការធ្វើការជួយសង្គ្រោះនៅជួរមុខ។ ឆ្នាំនេះគឺជាឆ្នាំទីបីជាប់គ្នាមកហើយ ដែលក្រុមទាំងពីរបានជួបគ្នា ដើម្បីធ្វើការផ្លាស់ប្តូរផ្នែកពេទ្យ និងជាឆ្នាំទី៥នៃភាពជាដៃគូជាមួយគ្នា។ ឆ្មាំជាតិក្នុងរដ្ឋ Idaho បានបង្កើតទំនាក់ទំនងនេះជាមួយសមភាគីកម្ពុជា ជាផ្នែកមួយនៃកម្មវិធីនៃភាពជាដៃគូនៃរដ្ឋដែលមានឆ្មាំជាតិរបស់យោធាសហរដ្ឋអាមេរិក ដែលផ្គូរឆ្មាំជាតិនៃរដ្ឋនីមួយៗក្នុងសហរដ្ឋអាមេរិកជាមួយនឹងយោធានៃប្រទេសមួយទៀត។ ឆ្មាំជាតិនៃសហរដ្ឋអាមេរិក នៅពេលនេះមានភាពជាដៃគូជាបន្តជាមួយប្រទេសចំនួន៦៥។
កម្មវិធីនៃភាពជាដៃគូនៃរដ្ឋដែលមានឆ្មាំជាតិរបស់សហរដ្ឋអាមេរិកបានផ្តល់ឱកាសឱ្យមានការធ្វើការផ្លាស់ប្តូរគ្នាជាបន្ត ហើយបាននាំឱ្យមានមិត្តភាពជ្រាលជ្រៅ និងចំណងទាក់ទងរឹងមាំ រវាងយោធាសហរដ្ឋអាមេរិក និងយោធានៃប្រទេសកម្ពុជា។ ដោយផ្អែកលើឯកទេសរបស់ផ្នែកយោធា និងផ្នែកស៊ីវិល ការទាក់ទងជាមួយសហគមន៍នៅរដ្ឋ Idaho និងការមានការទាក់ទងជាបន្តយូរទៅមុខ ឆ្មាំជាតិនៅរដ្ឋ Idaho បានកសាងទំនាក់ទំនងស្ថិតស្ថេរ ជាបុគ្គល និងក្នុងអាជីពជំនាញជាមួយសមាជិកនៃកងយោធពលខេមរភូមិន្ទ៕
ចែករំលែកព័តមាននេះ