ខេត្តបាត់ដំបង ៖ បងថ្លៃប្រុសកំហូចម្នាក់ ខណៈប្រពន្ធនិងអ្នកផ្ទះទាំងអស់ជាប់រវល់ទៅបោះបាយបិណ្ឌនៅវត្ត បានឆ្លៀតឱកាសប្រើល្បិចហៅប្អូនថ្លៃស្រីឱ្យមកកោសខ្យល់ ។ ដោយឃើញជាពេលវេលាស្ងាត់មនុស្ស ក៏ចាប់នាងបម្រុងរំលោភ តែនាងបានស្ទុះរើបម្រះ រត់ចុះពីលើផ្ទះ តែត្រូវបងថ្លៃគម្រក់រូបនេះ តាមចាប់ដល់ក្រោមផ្ទះ ហើយរំលោភនាងរហូតបានសម្រេច ។ ក្រោយកើតហេតុ នារីរងគ្រោះបានរៀបរាប់ប្រាប់ម្តាយ និងប្តឹងនគរបាលឱ្យចាប់ខ្លួនជនកំហូចនេះតែម្តង ។
ហេតុការណ៍នេះ បានកើតទ្បើងកាលពីវេលាម៉ោង៤និង៣០នាទីទៀបភ្លឺ ថ្ងៃទី១៧ កញ្ញា ស្ថិតនៅក្នុងភូមិដំណាក់សីលា ឃុំតាគ្រៃ ស្រុកកំរៀង ។ សមត្ថកិច្ចបានឱ្យដឹងថា ជនល្មោភកាមនេះ ឈ្មោះ ដួង គីមលី អាយុ៣០ឆ្នាំ ចំណែកនារីរងគ្រោះ អាយុ២៣ឆ្នាំ ។ សមត្ថកិច្ចបន្តថា នៅវេលាទៀបភ្លឺ ខណៈដែលឪពុកម្តាយ បងប្អូន និងប្រពន្ធបុរសរូបនេះ នាំគ្នាទៅបោះបាយបិណ្ឌនៅវត្ត ដោយឃើញសភាពស្ងាត់បែបនេះ ជាឱកាសល្អ ទើបជននេះធ្វើពុតជាខ្យល់ រួចហៅប្អូនថ្លៃមកកោសខ្យល់ឱ្យ តែនាងប្រកែកថា ជាប់រវល់ ។ បន្ទាប់ពីហៅច្រើនលើក ច្រើនសាពេក នាងទ្រាំមិនបានក៏ទៅកោសខ្យល់ឱ្យនៅក្នុងបន្ទប់ក្បែរគ្នា ។ លុះចូលទៅដល់មិនទាន់ទាំងកោសខ្យល់ផង ជនកំហូចរូបនេះ ក៏ចាប់ឱបនាង គ្រានោះនាងក៏ស្ទុះរត់ចុះពីលើផ្ទះ តែត្រូវជនអប្រិយនេះរត់តាមចាប់គំរាម រួចរំលោភរហូតបានសម្រេច ។
លុះពេលម្តាយមកពីបោះបាយបិណ្ឌវិញ នាងបានរៀបរាប់ប្រាប់ពីហេតុការណ៍នេះ ហើយម្តាយក៏រត់ទៅដាក់ពាក្យបណ្តឹងសមត្ថកិច្ចឱ្យចាប់ខ្លួនតែម្តង ។ សមត្ថកិច្ចបញ្ជាក់ថា ពេលនេះជនល្មោភកាមរូបនេះ ត្រូវបានកម្លាំងនគរបាលនៃអធិការដ្ឋានស្រុកកំរៀង ចាប់ខ្លួននិងកសាងសំណុំរឿងបញ្ជូនទៅអយ្យការអមសាលាដំបូងខេត្ត ចាត់ការតាមនីតិវិធី ៕
ចែករំលែកព័តមាននេះ