រាជធានីភ្នំពេញ ៖ ថ្វីដ្បិតតែទំហំពាណិជ្ជកម្មកម្ពុជាហ្វីលីពីននៅមានកម្រិតទាបនៅឡើយ ប៉ុន្តែប្រទេសហ្វីលីពីនគាំទ្រក្នុងការបង្កើនគុណភាពអង្ករកម្ពុជាសម្រាប់ការនាំចេញអំឡុងពេលដែលកម្ពុជាមានសក្តានុពលលើដំណាំស្រូវ ។
ការគាំទ្រនោះត្រូវបានលើកឡើងដោយលោក NOE-A Wong ឯកអគ្គរដ្ឋទូតហ្វីលីពីនប្រចាំកម្ពុជាដែលត្រូវបញ្ចប់អាណត្តិក្នុងឱកាសដែលលោកចូលសម្តែងការគួរសមនិងជម្រាបលាលោកឧបនាយករដ្ឋមន្ត្រីបណ្ឌិតសភាចារ្យ សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីកាលពីរសៀលថ្ងៃទី១៥ កញ្ញា នៅទីស្តីការគណៈរដ្ឋមន្ត្រី ។
ក្នុងជំនួបពិភាក្សានោះលោក NOE-A Wong បានលើកឡើងថា កម្ពុជាមានសក្តានុពលលើដំណាំស្រូវ ដូច្នេះកម្ពុជានឹងមានអង្ករសម្រាប់ការនាំចេញច្រើន ប៉ុន្តែដើម្បីទទួលបានការគាំទ្រពីទី ផ្សារអន្តរជាតិគប្បីត្រូវបង្កើនគុណភាពអង្ករ ។ លោកបញ្ជាក់ថា ប្រទេសហ្វីលីពីនសូមគាំទ្រចំពោះការបង្កើនគុណភាពអង្ករ ខណៈដែលហ្វីលីពីនក៏នឹងជម្រុញអ្នកវិនិយោគកាន់តែច្រើនមកកម្ពុជា ដើម្បីបណ្តាក់ទុនវិនិយោគលើវិស័យកសិកម្មសំខាន់រោងចក្រម៉ាស៊ីនកិនស្រូវ ។ ទាក់ទងវិស័យទេសចរណ៍លោក NOE-A Wong បានអះអាងថា ក្នុងពេលឆាប់ៗខាងមុខនេះ ហ្វីលីពីននឹងមានជើងហោះហើរដោយត្រង់ពីទីក្រុងម៉ានីលមកទីក្រុងភ្នំពេញ បន្ទាប់ពីជើងហោះហើរ ដោយត្រង់ពីទីក្រុងម៉ានីលមកខេត្តសៀមរាបដែលចាប់ផ្តើមតាំងពីឆ្នាំ២០១២បានដំណើរការប្រកបដោយជោគជ័យ ។ លោកបញ្ជាក់ថាការបង្កើតឲ្យមានការហោះហើរដោយ ត្រង់នេះវានឹងជួយដល់ការងារពាណិជ្ជកម្មនិងទេសចរណ៍ផងដែរ ។
លោក NOE-A Wong បានថ្លែងអំណរគុណផងដែរចំពោះរាជរដ្ឋាភិបាលកម្ពុជា ប្រជាពលរដ្ឋកម្ពុជាដែលជួយជ្រោមជ្រែង និងសហការក្នុងបេសកកម្មការទូតរយៈពេល៦ឆ្នាំរបស់លោកនៅកម្ពុជាឲ្យទទួលបានជោគជ័យ ។ លោកសន្យាថានឹងខិតខំធ្វើយ៉ាងណាឲ្យកិច្ចសហការរវាងប្រទេសទាំងពីរកាន់តែរឹងមាំបន្ថែមទៀត ៕
ចែករំលែកព័តមាននេះ