រាជធានីភ្នំពេញ ៖ ខោជាង២ម៉ឺន ដែលក្រុមចោរជាសន្ដិសុខ បានបំពុលសន្ដិសុខដូចគ្នាយាមនៅរោងចក្រកាត់ដេររ៉ូសីុងហ្គាមេន លួចយកទៅនោះ ត្រូវបាននគរបាលការិយាល័យព្រហ្មទណ្ឌកម្រិតធ្ងន់នៃស្នងការដ្ឋានរាជធានីភ្នំពេញ សហការជាមួយនគរបាលខណ្ឌទួលគោក ស្រាវជ្រាវរកឃើញ និងឃាត់ខ្លួនបានជនសង្ស័យ៣នាក់ ព្រមទាំងដកហូតខោចំនួន៦បាវធំៗ ។
រាជធានីភ្នំពេញ ៖ ខោជាង២ម៉ឺន ដែលក្រុមចោរជាសន្ដិសុខ បានបំពុលសន្ដិសុខដូចគ្នាយាមនៅរោងចក្រកាត់ដេររ៉ូសីុងហ្គាមេន លួចយកទៅនោះ ត្រូវបាននគរបាលការិយាល័យព្រហ្មទណ្ឌកម្រិតធ្ងន់នៃស្នងការដ្ឋានរាជធានីភ្នំពេញ សហការជាមួយនគរបាលខណ្ឌទួលគោក ស្រាវជ្រាវរកឃើញ និងឃាត់ខ្លួនបានជនសង្ស័យ៣នាក់ ព្រមទាំងដកហូតខោចំនួន៦បាវធំៗ ។
ការឃាត់ខ្លួនជនសង្ស័យនេះ ធ្វើឡើងកាលពីវេលាម៉ោង១០យប់ថ្ងៃទី១៤ កញ្ញា នៅចំណុចផ្សារហេងលីផ្ទះលេខ១០C ផ្លូវលេខ២៧១ សង្កាត់ទឹកល្អក់ទី៣ ខណ្ឌទួលគោក ខណៈពេលជនទាំងនោះរៀបខោដាក់ក្នុងបាវបន្លំធ្វើជាគីបខោអាវជជុះ ប្រុងនាំចេញទៅក្រុងប៉ោយប៉ែត ហើយបន្តទៅប្រទេសថៃ ។ ទោះបីជាយ៉ាងណា ក្រុមជនដៃដល់និងអ្នកទិញពុំទាន់ត្រូវសមត្ថកិច្ចចាប់ខ្លួនបាននៅឡើយទេ គឺឃាត់ខ្លួនបានតែអ្នកសីុឈ្នួលច្រកដែលគាស់ចេញពីឡាំងច្រកចូលក្នុងបាវគីបតែប៉ុណ្ណោះ ។ ជនសង្ស័យដែលត្រូវឃាត់ខ្លួនមាន ១-ឈ្មោះផែ សុធី ភេទប្រុស អាយុ៤២ឆ្នាំ ស្នាក់នៅផ្ទះជួលម្តុំសំណង់១២ សង្កាត់ទឹកល្អក់ទី៣ខណ្ឌទួលគោក ។
២-គូ គឿន ភេទប្រុស អាយុ៣៩ឆ្នាំ ជាអ្នករត់ម៉ូតូឌុប មានទីលំនៅភូមិឫស្សី សង្កាត់ស្ទឹងមានជ័យ ខណ្ឌមានជ័យ ។ ៣-ឈ្មោះគឿន ចិត្រា ភេទប្រុស អាយុ២៣ឆ្នាំ ជាសិស្ស មានទីលំនៅភូមិកណ្តោល ឃុំព្រែករំដេង ស្រុកមេសាង ខេត្តព្រៃវែង ។ បន្ទាប់ពីឃាត់ខ្លួនសមត្ថកិច្ចក៏ឈានទៅដកហូតបានខោចំនួន៦បាវធំ និង២ថង់ ព្រមទាំងដកហូតបានសម្បកកេសចំនួន២៩២ ។ តាមមន្ត្រីនគរបាលព្រហ្មទណ្ឌបានឱ្យដឹងថា បន្ទាប់ពីក្រុមចោរដែលជាសន្តិសុខបំពុលសន្តិសុខគ្នាឯង ហើយធ្វើសកម្មភាពចូលលួចខោក្នុងរោងចក្ររ៉ូស៊ីងហ្គាមេន ដែលស្ថិតនៅក្នុងសង្កាត់ទួលសង្កែ ខណ្ឌឫស្សីកែវ សមត្ថកិច្ចនគរបាលព្រហ្មទណ្ឌបានធ្វើការស្រាវជ្រាវហើយរកឃើញខោទាំងនេះត្រូវក្រុមចោរលួចយកទៅលក់ឱ្យអាជីវករនៅផ្សារហេង លី ។ ជាមួយនឹងការរកឃើញនេះ ក៏បានឃាត់ខ្លួនជនសង្ស័យចំនួន៣នាក់ដែលកំពុងរៀបចំច្រកខោទាំងនោះក្នុងបាវដើម្បីនាំចេញ តែពុំទាន់ដឹងថា មានចំនួនប៉ុន្មានទេ ។
មន្ត្រីនគរបាលដដែលឱ្យដឹងទៀតថា ជនដៃដល់ដែលធ្វើសកម្មភាពលួចខោនោះពុំទាន់ចាប់បាននៅឡើយទេ គឺចាប់បានតែកម្មករជួយច្រកញាត់ដាក់បាវតែប៉ុណ្ណោះ ។ ទោះជាយ៉ាងណា នគរបាលពុំទាន់ផ្តល់ព័ត៌មានជាផ្លូវការនៅឡើយទេជុំវិញការឃាត់ខ្លួនជនសង្ស័យនេះ ។ គួរបញ្ជាក់ថា តាមការអះអាងថា ខោចំនួន២៥.០០០ ដែលគិតជាទឹកប្រាក់មានតម្លៃជិត១លានដុល្លារ ខ្លះថាជិត២លានដុល្លារត្រូវបានក្រុមសន្តិសុខ៤នាក់ ឃុបឃិតគ្នាដាក់ថ្នាំសណ្ដំសន្តិសុខចំនួន៦នាក់ ដោយដាក់ក្នុងកាហ្វេទឹកដោះគោឱ្យផឹកបណ្តាលឱ្យសន្លប់ស្តូកស្តឹងនិងមានការភ្ញាក់ផ្អើលកាលពីវេលាម៉ោង២និង៤០នាទីរំលងអធ្រាត្រឈានចូលថ្ងៃទី១៣ កញ្ញា នៅក្នុងរោងចក្រ ហើយសន្តិសុខរងគ្រោះទាំង៦នាក់ត្រូវបានបញ្ជូនទៅកាន់មន្ទីរព្យាបាលឯកជនមួយ ។
ជនដៃដល់ដែលដាក់ថ្នាំបំពុលសន្តិសុខគ្នាឯងនោះត្រូវសមត្ថកិច្ចឱ្យដឹងថា ១-ឈ្មោះអ៊ុង រដ្ឋា ភេទប្រុស អាយុ២៦ឆ្នាំ ២-ឈ្មោះមាស សាគុណ ភេទប្រុស អាយុ២៩ឆ្នាំ ៣-ឈ្មោះ សេង សុឃន ភេទប្រុស អាយុ២០ឆ្នាំ និង៤-ឈ្មោះ ប៉ែន ឡុង ភេទប្រុស អាយុ៣០ឆ្នាំ ។ បន្ទាប់ពីធ្វើសកម្មភាពលួចបានហើយ ក្រុមសន្តិសុខជាចោរនោះក៏យកទៅលក់ ប៉ុន្តែបានតែ១ថ្ងៃក៏ត្រូវកម្លាំងសមត្ថកិច្ចស្រាវជ្រាវដកហូតត្រឡប់មកវិញ ។ មិនទាន់មានការវាយតម្លៃថា តើការលួចនេះមានបណ្ដាញជាប្រព័ន្ធបែបណានោះទេ តែពិតជាគួរឱ្យចាប់អារម្មណ៍ផងដែរ ដែលទំនិញខោអាវគីបរបស់អាជីវករខ្មែរត្រូវគយថៃច្រកខ្លងលឹកចាប់បានកន្លងមកដោយចោទថា នាំចូលដោយគេចពន្ធនិងរំលោភកម្មសិទ្ធិបញ្ញា ជាពិសេសខោអាវ និងទំនិញដែលមានម៉ាកល្បីៗ ។ វាហាក់ដូចជាមានច្រកតែមួយ គឺប្ដូរខោដែលលួចបានគាស់ពីកេសច្រកដាក់បាវខោអាវជជុះដូចខោអាវគីបដើម្បីនាំចេញទៅប្រទេសថៃតាមច្រកប៉ោយប៉ែត ។
តាមព័ត៌មានចុងក្រោយបានឱ្យដឹងថា ចំនួនខោដែលចាប់បានមកវិញមានចំនួន៧.១៦៧ ក្នុងចំនួនខោ២៥.០០០ ។ ចំពោះអ្នកដែលចាប់ខ្លួន៣នាក់គឺ២នាក់គ្រាន់តែជាអ្នកសីុឈ្នួលមិនដឹងថាគេលួចមកពីណានោះទេ តែម្នាក់ជាអ្នកទទួលផលពីចោរកម្មនេះ ៕
ចែករំលែកព័តមាននេះ