រាជធានីភ្នំពេញ ៖ បន្ទាប់ពីមានបាតុភាពជាច្រើន និងមានការស្តីបន្ទោសលើអាជ្ញាធរខណ្ឌច្បារអំពៅអំពីបញ្ហាមិនអើពើទប់ស្កាត់លើរថយន្តប្រកបអាជីវកម្មដឹកដីខ្សាច់ក្នុងភូមិសាស្ត្ររបស់ខ្លួន នៅព្រឹកថ្ងៃទី២ កញ្ញា ២០១៤ លោកណុប ផា អភិបាលរងខណ្ឌច្បារអំពៅជំនួសមុខលោកអៀង ស៊ីផាន អភិបាលខណ្ឌច្បារអំពៅបានបើកប្រតិបត្តិការចាប់រថយន្តដឹកខ្សាច់ទាំងនោះដើម្បីត្រួតពិនិត្យច្បាប់អាជីវកម្ម។
ប្រតិបត្តិការរបស់អាជ្ញាធរខណ្ឌច្បារអំពៅបានធ្វើឡើងនៅលើកំណាត់ផ្លូវជាតិលេខ១ ក្នុងសង្កាត់ចំនួន៤ ដែលមានរថយន្តដឹកខ្សាច់ធុនធំជាច្រើនគ្រឿងបានធ្វើដំណើរឆ្លងកាត់ ។ លោក ណុប ផា បានឲ្យដឹងថា ក្រោយពីមើលឃើញជាក់ស្តែងអំពីសកម្មភាពដឹកជញ្ជូនខ្សាច់ដែលធ្វើឲ្យប៉ះពាល់សណ្តាប់ធ្នាប់សាធារណ: និងតបតាមការណែនាំរបស់លោកអភិបាលរាជធានីភ្នំពេញផងនោះ លោកអភិបាលខណ្ឌ ក្នុងនាមប្រធានគណ:បញ្ជាការឯកភាព បានបើកយុទ្ធនាការទប់ស្កាត់បញ្ហាទាំងនេះកុំឲ្យបន្តកើតឡើង ។
លោក ណុប ផា បានបញ្ជាក់ថា រថយន្តដឹកខ្សាច់ចំនួន៩គ្រឿងត្រូវបានអាជ្ញាធរចាប់ឃាត់ដើម្បីត្រួតពិនិត្យមើលពីលិខិតស្នាម និងពិនិត្យពីលក្ខណ:បច្ចេកទេសរបស់រថយន្ត ដូចជាស្ថានភាពកង់ ស្ថានភាពនៃការដឹកជញ្ជូន ព្រមទាំងស្ថានភាពអ្នកបើកបរជាដើម ។ លោកបានបន្តថា ក្រោយពីចាប់ឃាត់រថយន្តទាំង៩គ្រឿង និងពិនិត្យជាក់ស្តែងរួចមក នៅមានបញ្ហាខ្វះចន្លោះនោះ ក្រុមការងារបានធ្វើកិច្ចសន្យាជាមួយម្ចាស់រថយន្តទាំងនោះ និងធ្វើការណែនាំឲ្យពួកគេរៀបចំការដឹកជញ្ជូនលើកក្រោយ តាមលក្ខណ:បច្ចេកទេសត្រឹមត្រូវ និងមានការត្រួតពិនិត្យយ៉ាងជាក់លាក់មុនពេលធ្វើដំណើរចេញ ។
ដោយឡែកបើសិននៅតាមផ្លូវមានឃើញខ្សាច់ជ្រុះរប៉ាត់រប៉ាយ ឬស្រកហូរហៀរតាមដងផ្លូវក៏ដូចជាខូចខាតផ្លូវនោះ គឺម្ចាស់រថយន្តត្រូវមានការទទួលខុសត្រូវដោយខ្លូនឯង ទាំងការសំអាតផ្លូវ និងជួសជុលផ្លូវ ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ