ខេត្តស្វាយរៀង ៖ បុរសម្នាក់រងរបួសធ្ងន់ដួលសន្លប់នៅក្នុងថ្លុកឈាម បន្ទាប់ពីត្រូវជនស្រវឹងខួបម្នាក់កាប់ប្រហារចំនួន៤កាំបិតផ្គាក់ ដោយ២កាំបិតពុះពីលើក្បាលផុងលលាដ៍ ១កាំបិតដាច់ខ្ទង់ច្រមុុះ និង១កាបិតទៀតដាច់បបូរមាត់ ហើយមិនអស់ចិត្តជនបង្កយកព្រនង់វាយដងខ្លួន៤ព្រនង់ទៀត ។ ហេតុការណ៍នេះកើតឡើងកាលពី៧និង៣០នាទីយប់ថ្ងៃទី០១ សីហា ស្ថិតក្នុងភូមិប្ញស្សីអម ឃុំខ្សែត្រ ស្រុកកំពង់រោទ៍ ។
បើតាមសមត្ថកិច្ចនគរបាលឱ្យដឹងថា ជនរងគ្រោះឈ្មោះ សុខ តុលា អាយុ៣៥ឆ្នាំ មានទីលំនៅភូមិកើតហេតុ រងរបួសធ្ងន់ ចំណែកជនសង្ស័យឈ្មោះ ណៃ អុល ភេទប្រុស អាយុ៤៥ឆ្នាំ អតីតទាហានរំសាយ ។ ប្រភពបន្តថា មុនពេលកើតហេតុ ជនរងគ្រោះកំពុងដើរតាមផ្លូវលំ មកពីធ្វើស្រែត្រឡប់ទៅផ្ទះវិញ ពេលដើរមកដល់មុខផ្ទះជនសង្ស័យ ក៏ត្រូវជននោះស្ទាក់កាប់ប្រហារចំនួន៤កាំបិត ដួលសន្លប់ក្នុងថ្លុកឈាម ដោយមិនដឹងមូលហេតុ ។
ក្រោយពីកើតហេតុ ជនសង្ស័យត្រូវសមត្ថកិច្ចឃាត់ខ្លួនភ្លាមៗ រីឯជនរងគ្រោះសមត្ថកិច្ចហៅរថយន្តសាមុយដឹកបញ្ជូនសង្គ្រោះនៅមន្ទីរពេទ្យខេត្ត តែស្ថានភាពធ្ងន់ធ្ងរ ក៏បញ្ជូនបន្តទៅមន្ទីរពេទ្យរាជធានីភ្នំពេញ ៕
ចែករំលែកព័តមាននេះ