រាជធានីភ្នំពេញ ៖ សត្វព្រៃចំនួន២ប្រភេទគឺសត្វខ្លាឃ្មុំ ពណ៌ខ្មៅ មួយក្បាលដែលមានទម្ងន់ប្រហែលជិត១០គីឡូ និងសត្វកន្ធាយមួយក្បាលមានទម្ងន់១៧គីឡូ ត្រូវបានអង្គការអភិរក្សសត្វព្រៃវ៉ាយអេដ សហការរជាមួយនឹងកម្លាំងកងរាជអាវុធហត្ថ រួមជាមួយនឹងកម្លាំងនគរបាលមូលដ្ឋាន បានមករំដោះយកចេញពីផ្ទះវិឡាមួយកន្លែង។
ការមករំដោះយកសត្វព្រៃដែលហាមឃាត់ទាំងពីរប្រភេទរបស់អង្គការអភិសក្សសត្វព្រៃនេះបានធ្វើឡើងកាលពីវេលាម៉ោង៩ព្រឹកថ្ងៃទី០១ សីហា នៅវីឡាដីឡូតិ៍លេខ២៣ ផ្លូវ៣៥២ សង្កាត់បឹងកេងកងទី១ ខណ្ឌចំការមន។
តាមប្រភពព័ត៌មានពីមន្ត្រីនគរបាលម្នាក់ប្រាប់ឱ្យដឹងថា ដោយមានការស៊ើបអង្កេតរបស់អង្គការអភិរក្សសត្វព្រៃវ៉ាយអេដ ទើបបានដឹងថានៅក្នុងផ្ទះវីឡាមួយនេះបានរក្សាទុកសត្វព្រៃទាំង២ប្រភេទនេះ និងបានយកទៅរក្សាទុក។
ប្រភពដដែលប្រាប់បន្តទៀតថា ផ្ទះវីឡាមួយនេះគឺត្រូវបានម្ចាស់គេជួលឱ្យជនជាតិចិនស្នាក់នៅ ដែលមានដីឡូត៍ដ៏ធំទូលាយ ហើយសត្វព្រៃទាំងពីរប្រភេទនេះគឺបានដាក់ចិញ្ចឹមក្នុងទ្រង់និងកន្លែងយ៉ាងត្រឹមត្រូវ ។ ការចុះមករំដោះសត្វព្រៃទាំងពីរប្រភេទរបស់អង្គការវ៉ាយអេដនាពេលនេះ ក៏បានធ្វើការឆែកឆេរគ្រប់កន្លែងក្នុងផ្ទះយ៉ាងយូរ រហូតដល់ម៉ោងជាង១២ថ្ងៃត្រង់ តែមិនបានរកឃើញមានសត្វព្រៃប្រភេទណាផ្សេងទៀតនិងបញ្ជាក់ថាមានការជួញដូរឡើយ ដោយគ្រាន់តែបានឃាត់ខ្លួនបុរសជនជាតិចិនម្នាក់និងជនជាតិខ្មែរម្នាក់យកទៅសួរនាំរួចក៏ដោះលែងវិញផងដែរ ៕
ចែករំលែកព័តមាននេះ