ខេត្តបន្ទាយមានជ័យ ៖ ជនសង្ស័យម្នាក់ត្រូវកម្លាំងសមត្ថកិច្ចតាមស្ទាក់ចាប់បានភ្លាមៗ បន្ទាប់ពីលួចកាច់សោ.កម៉ូតូម៉ាកហុងដាឌ្រីម សេ១២៥ មួយគ្រឿងបានសម្រេចកាលពីវេលាម៉ោង៥ និង៣០នាទីព្រឹក ថ្ងៃទី៣១ កក្កដា ២០១៤ ត្រង់ចំណុចផ្សារមង្គលបូរី ស្ថិតក្នុងភូមិ-ឃុំឫស្សីក្រោក ស្រុកមង្គលបូរី ។
លោក រស់ សំបូរ មេបញ្ជាការកងរាជអាវុធហត្ថស្រុកមង្គលបូរីបានប្រាប់ប្រាប់ឱ្យដឹងថា ជនសង្ស័យលួចកាច់សោ.កម៉ូតូឈ្មោះ សា សិលា ភេទប្រុសអាយុ២៣ឆ្នាំ មានទីលំនៅភូមិភ្នំធំជើង ឃុំអូរប្រាសាទ ស្រុកមង្គលបូរី ។ ជននេះបានធ្វើសកម្មភាពកាច់សោ.កម៉ូតូ១គ្រឿងម៉ាកហុងដាសេ១២៥ ស៊េរីឆ្នាំ២០០៥ បិតតែមឡើងឆ្នាំ២០១១ ព៌ណខ្មៅ ស្លាកលេខបន្ទាយមានជ័យ 1E-2815 របស់ជនរងគ្រោះឈ្មោះឡាច ចាយ ភេទស្រី អាយុ៣៦ឆ្នាំ រស់នៅភូមិអន្លង់មានទ្រព្យ ឃុំឫស្សីក្រោក ស្រុកមង្គលបូរី ខណៈពេលដែលជនរងគ្រោះជិះម៉ូតូចេញពីផ្ទះយកមកទុកនៅខាងកើតផ្សារនៅវេលាម៉ោង៥ព្រឹក ថ្ងៃទី៣១ កក្កដា ហើយចូលក្នុងផ្សារដើរទិញបន្លែ លុះត្រឡប់មកកន្លែងទុកម៉ូតូវិញ មិនឃើញក៏ស្រែកឆោរឡោថាបាត់ម៉ូតូ ។
លោកបានបន្តថា ភ្លាមៗនោះសមត្ថកិច្ចកងរាជអាវុថហត្ថ និងនគរបាលមូលដ្ឋានបានចុះអន្តរាគមន៍តាមស្ទាក់ចាប់ជនសង្ស័យបាននៅវេលាម៉ោង៦ព្រឹកថ្ងៃដដែល នៅចំណុចមុខសាលាបឋមសិក្សាឫស្សីក្រោក ក្នុងភូមិ-ឃុំកើតហេតុ ស្របពេលម៉ូតូនោះរលត់ ហើយជនសង្ស័យបានយកឱ្យជាងជួសជុល ៕
ចែករំលែកព័តមាននេះ