ខេត្តបន្ទាយមានជ័យ ៖ មន្ត្រីនគរបាលសណ្តាប់ធ្នាប់សាធារណៈក្រុងប៉ោយប៉ែត ដឹកនាំដោយលោកអនុសេនីយ៍ឯកសៅ សារឿន នាយផ្នែក បានដឹកនាំកម្លាំងក្រោមឱវាទចុះរៀបចំសណ្តាប់ធ្នាប់សាធារណៈតាមដងផ្លូវជាតិលេខ៥ ក្នុងទីប្រជុំជន រហូតដល់ចំណុចរង្វង់មូល មាត់ច្រកទ្វារអន្តរជាតិប៉ោយប៉ែត កាលពីព្រឹកថ្ងៃទី៣០ កក្កដា ២០១៤
ខេត្តបន្ទាយមានជ័យ ៖ មន្ត្រីនគរបាលសណ្តាប់ធ្នាប់សាធារណៈក្រុងប៉ោយប៉ែត ដឹកនាំដោយលោកអនុសេនីយ៍ឯកសៅ សារឿន នាយផ្នែក បានដឹកនាំកម្លាំងក្រោមឱវាទចុះរៀបចំសណ្តាប់ធ្នាប់សាធារណៈតាមដងផ្លូវជាតិលេខ៥ ក្នុងទីប្រជុំជន រហូតដល់ចំណុចរង្វង់មូល មាត់ច្រកទ្វារអន្តរជាតិប៉ោយប៉ែត កាលពីព្រឹកថ្ងៃទី៣០ កក្កដា ២០១៤ ។
លោកអនុសេនីយ៍ឯកសៅ សារឿន នាយផ្នែកនគរបាលសណ្តាប់ធ្នាប់ក្រុងប៉ោយប៉ែត បានឱ្យដឹងថា យោងតាមបទបញ្ជាយ៉ាងម៉ឹងម៉ាត់ពីលោកវរសេនីយ៍ត្រី អ៊ុំ សុផល អធិការក្រុងប៉ោយប៉ែត និងលោកឧត្តមសេនីយ៍ត្រី អាត់ ខែម ស្នងការខេត្តបន្ទាយមានជ័យ ទើបកម្លាំងនមន្ត្រីនគរបាលជំនាញរបស់លោកបានខិតខំយកចិត្តទុកដាក់ចុះរៀបចំសណ្តាប់ធ្នាប់សាធារណៈតាមដងផ្លូវជាតិក្នុងទីប្រជុំជនជូនដល់ប្រជាពលរដ្ឋឱ្យមានភាពងាយស្រួលក្នុងការធ្វើដំណើរ ប្រកបរបរចិញ្ចឹមជីវិតប្រចាំថ្ងៃ ។
លោកនាយផ្នែកបន្តថា ការចុះអនុវត្តរៀបចុះសណ្តាប់ធ្នាប់នាពេលនេះគឺ ១-សមត្ថកិច្ចជំនាញបានណែនាំដល់ក្រុមអាជីវករដែលលក់ដូរនៅតាមដងផ្លូវជាតិឱ្យមានរបៀបរៀបរយ និងមានសណ្តាប់ធា្នប់ កុំបោះចោលសំរាមពាសវាលពាលកាលតាមតែអំពើចិត្ត គឺត្រូវចាក់សំរាមដាក់ក្នុងធុងសំរាមឱ្យបានត្រឹមត្រូវ ,២-ចំពោះអ្នករត់ម៉ូតូឌុប ឬម៉ូតូកង់បី ត្រូវចតឱ្យបានត្រឹមត្រូវ និងមានសណ្តាប់ធ្នាប់ ,៣-ចំពោះរថយន្តតាក់ស៊ីតូច ធំ មិនត្រូវចតចាប់ម៉ូយឱ្យមានភាពរញ៉េរញ៉ៃនៅលើដងផ្លូវជាតិលេខ៥ នៅមាត់ច្រកទ្វារអន្តរជាតិប៉ោយប៉ែត ជាដាច់ខាត ចៀសវាងបាត់បង់សណ្តាប់ធ្នាប់ដែលបង្កគ្រោះថ្នាក់ផ្សេងៗដល់អាយុជីវិតពលរដ្ឋជាយថាហេតុ និងជាបញ្ហាធ្វើឱ្យប៉ះពាល់ដល់សតិអារម្មណ៍ភ្ញៀវជាតិនិងអន្តរជាតិ ដែលគេឆ្លងកាត់តាមច្រកប៉ោយប៉ែត មានការិះគន់ដល់ថ្នាក់ដឹកនាំ ។
ជាចុងបញ្ចប់លោកនាយផ្នែកបានអំពាវនាវដល់ប្រជាពលរដ្ឋទូទាំងក្រុងប៉ោយប៉ែត ឱ្យចេះចូលរួមធ្វើយ៉ាងណាជួយថែរក្សាហេដ្ឋារចនា សោភណ័ភាព និងចេះជួយសម្អាតនូវអនាម័យ បរិស្ថាន ក្រុងប៉ោយប៉ែត ឱ្យបានស្អាត ដើម្បីប្រលងប្រជែងទីក្រុងស្អាត សេវាល្អ ជាមួយនិងប្រទេសជិតខាង ឱ្យ ស្របទៅតាមយុទ្ឋសាស្ត្ររបស់ប្រមុខថ្នាក់ដឹកនាំ សម្រាប់ទៅថ្ងៃអនាគត ៕
ចែករំលែកព័តមាននេះ