រាជធានីភ្នំពេញ ៖ បុរសកំណាចម្នាក់គ្រាន់តែខឹងស្រីសេ្នហ៍អង្គុយលេងបៀជាមួយអ្នកជិតខាង ក៏ស្ទុះទៅចាប់វាយ៣ដៃចំកណ្ដាលមុខបណ្ដាលឱ្យប៉ោងមុខភ្លាមៗ ហើយមិនអស់ចិត្តហៅចូលក្នុងបន្ទប់កាប់មួយកាំបិតបុ័ងតោចំដើមដៃខាងឆ្វេងរយះដេរអស់៥ថ្នេរ រួចឃុំនាងទុកក្នុងបន្ទប់ ។ ករណីនេះបង្កឱ្យមានភាពភ្ញាក់ផ្អើល ឡើងកាលពីវេលាម៉ោង១០និង១០នាទីយប់ថ្ងៃទី២៧ កក្កដា នៅផ្ទះជួលអត់លេខមួយកន្លែង ស្ថិតក្នុងភូមិសេប៉េសេ សង្កាត់ទឹកថ្លា ខណ្ឌសែនសុខ ។
បុរសចិត្ដសាហាវនេះឈ្មោះ អឹក សំអាង អាយុ ២៩ឆ្នាំ ជាពេទ្យទាហាន ស្នាក់នៅក្នុងសង្កាត់ចោមចៅ ខណ្ឌពោធិ៍សែនជ័យ ។ ចំណែកនារីរងគ្រោះឈ្មោះ ភីន អឿន អាយុ៣០ឆ្នាំ ជាកម្មការិនីរោងចក្រកាត់ដេរ ស្នាក់នៅផ្ទះជួល ។ តាមស្ត្រីរងគ្រោះជាសង្សារបានរៀបរាប់ប្រាប់សមត្ថកិច្ចថា រូបនាងនិងប្រុសកំណាចខាងលើបានទាក់ទងគ្នារយៈពេល៣ខែមកហើយ តែមិនទាន់ឈានដល់ថ្នាក់ប្ដីប្រពន្ធរួមរស់នៅផ្ទះជាមួយគ្នានៅឡើយទេ ។ ជារៀងរាល់ថ្ងៃបុរសរូបនេះ តែងតែមកលេងផ្ទះជួលរបស់នាងហើយរករឿងពីបញ្ហានេះបញ្ហានោះ ថែមទាំងបិទសិទ្ធិសេរីភាពរបស់នាងដោយមិនឱ្យនិយាយលេងជាមួយអ្នកជិតខាង ឬទៅលេងបៀកម្សាន្ដនៅផ្ទះអ្នកជិតខាងជាដាច់ខាត បើទោះបីជានាងព្យាយាមអង្វរកសុំកុំឱ្យបិទសិទ្ធិសេរីភាពរបស់នាង ក៏គេមិនព្រមស្ដាប់សម្ដីរបស់នាងដែរ ។
ស្រ្ដីរងគ្រោះរៀបរាប់ទៀតថា លុះនៅយប់កើតហេតុខាងលើរូបនាងបានលេងបៀនៅផ្ទះជួលរបស់អ្នកជិតខាង ឯបុរសរូបនេះខណៈត្រឡប់មកពីធ្វើការ ក៏មកលេងផ្ទះរបស់នាងដូចរាល់ដងដែរ ហើយដោយឃើញនាងកំពុងអង្គុយលេងបៀជាមួយអ្នកជិតខាង ក៏ស្ទុះមកវាយនាងចំកណ្ដាលមុខ៣ដៃបណ្ដាលឱ្យប៉ោងមុខ ។ មិនតែប៉ុណ្ណោះ ដោយមិនអស់ចិត្ត ក៏ហៅនាងឱ្យចូលទៅក្នុងបន្ទប់ រួចទាញយកកាំបិតបុ័ងតោមកកាប់ចំដើមដៃខាងឆ្វេងបណ្ដាលឱ្យរយះហូរឈាមសស្រាក់ និងចាក់សោឃុំទុកក្នុងបន្ទប់ទៀត ធ្វើឱ្យនាងទ្រាំមិនបានក៏ស្រែកហៅឱ្យអ្នកជិតខាងជួយ ។ ពេលនោះ ក៏បង្កឱ្យមានការភ្ញាក់ផ្អើលដល់សមត្ថកិច្ចចុះមកធ្វើការអន្តរាគមន៍ចាប់វាយខ្នោះជនកំណាចក្រៀកបណ្ដើរយកទៅឃុំខ្លួន និងសាកសួរនៅប៉ុស្ដិ៍នគរបាលរដ្ឋបាលទឹកថ្លា ។ ចំណែកនារីរងគ្រោះត្រូវបានប្រជាពលរដ្ឋដឹកយកទៅព្យាបាលរបួសនៅមន្ទីរពេទ្យព្រះកុសុមៈ ។
តាមអ្នកជិតខាងបានឱ្យដឹងថា ជារៀងរាល់ថ្ងៃគេតែងសង្កេតឃើញបុរសរូបនេះមកលេងផ្ទះជួលរបស់ស្ត្រីរងគ្រោះ ហើយតែងតែរករឿងដោយសារតែការប្រចណ្ឌនិងវាយតប់ស្ត្រីរងគ្រោះស្ទើររាល់ថ្ងៃ ធ្វើឱ្យប៉ះពាល់ដល់ដំណេកអ្នកជិតខាងយ៉ាងខ្លាំង តែគ្មានអ្នកជិតខាងណាហ៊ាននិយាយប៉ះពាល់លើគេទេ បានត្រឹមតែនាំគ្នាឈរមើលប៉ុណ្ណោះ ព្រោះបុរសរូបនេះតែងតែគំរាមស្ត្រីរងគ្រោះមិនឱ្យរាប់អានអ្នកជិតខាងជាដាច់ខាត ។ ដោយសារឃើញទង្វើដ៏កំណាចទៅលើស្រ្ដីរងគ្រោះ ទើបអ្នកភូមិទូរស័ព្ទប្ដឹងទៅសមត្ថកិច្ចឱ្យមកជួយអន្ដរាគមន៍នៅកន្លែងកើតហេតុ ។
ប្រមាណ១០នាទីក្រោយមក មន្ត្រីនគរបាលប៉ុស្តិ៍រដ្ឋបាលទឹកថ្លាមួយរូបមកដល់ហើយចូលទៅរំដោះយកស្ត្រីរងគ្រោះពីកណ្តាប់ដៃបុរសរូបនេះ និងឃាត់ខ្លួនបុរសកំណាចនេះយកទៅសាកសួរនៅប៉ុស្តិ៍នគរបាលរដ្ឋបាលទឹកថ្លាដើម្បីកសាងសំណុំរឿងបញ្ចូនទៅតុលាការ ៕
ចែករំលែកព័តមាននេះ