រាជធានីភ្នំពេញ ៖ អគ្គិភ័យដ៏ធំមួយ បានលេបត្របាក់លំនៅឋានតូចៗសង់ជាប់គ្នារដឹកលើផ្ទៃដីជាអតីតស្រះទឹកដ៏ធំមួយកន្លែង ស្ថិតក្នុងភូមិទ្រា២ ក្រុមទី២ សង្កាត់ស្ទឹងមានជ័យ ខណ្ឌមានជ័យ ក្នុងរយៈពេលប្រមាណ២ម៉ោង កាលពីវេលាម៉ោង១០និង៤៥នាទីព្រឹកថ្ងៃទី២៧ កក្កដា ឆេះម៉ត់គ្មានសល់ ប៉ុន្តែសំណាងល្អមិនមានមនុស្សណាម្នាក់រងគ្រោះក្នុងហេតុការណ៍នេះទេ ។
រាជធានីភ្នំពេញ ៖ អគ្គិភ័យដ៏ធំមួយ បានលេបត្របាក់លំនៅឋានតូចៗសង់ជាប់គ្នារដឹកលើផ្ទៃដីជាអតីតស្រះទឹកដ៏ធំមួយកន្លែង ស្ថិតក្នុងភូមិទ្រា២ ក្រុមទី២ សង្កាត់ស្ទឹងមានជ័យ ខណ្ឌមានជ័យ ក្នុងរយៈពេលប្រមាណ២ម៉ោង កាលពីវេលាម៉ោង១០និង៤៥នាទីព្រឹកថ្ងៃទី២៧ កក្កដា ឆេះម៉ត់គ្មានសល់ ប៉ុន្តែសំណាងល្អមិនមានមនុស្សណាម្នាក់រងគ្រោះក្នុងហេតុការណ៍នេះទេ ។
ទាក់ទិននឹងគ្រោះមហន្តរាយខាងលើនេះ ប្រភពព័ត៌មានពីកន្លែងកើតហេតុបានឱ្យដឹងថា ដំបូងគេឃើញផ្សែងខ្មៅខ្មួលខ្មាញ់ហុយចេញពីផ្ទះមួយខ្នងធ្វើអំពីឈើប្រក់សង្ក័សី ជញ្ជាំងឥដ្ឋ និងបង្កឱ្យមានការភ្ញាក់ផ្អើលយ៉ាងខ្លាំង ។ ប៉ុន្តែដោយសារអណ្តាតភ្លើងបានឆាបឆេះឡើងសន្ធោសន្ធៅទៅហើយនោះ ទើបអ្នកស្រុកមិនមានលទ្ធភាពបាញ់ទឹកពន្លត់អណ្តាតភ្លើងបានឡើយបានត្រឹមតែនាំគ្នាស្រែកស្លន់ស្លោរ ជញ្ចូនយកទ្រព្យសម្បត្តិកំប៉ិកកំប៉ុកចេញពីក្នុងផ្ទះរៀងៗខ្លួនទាំងព្រលឹងចុងសក់គ្រប់ៗគ្នា ។ ដោយសារលំនៅឋានសង់ជាប់គ្នារដឹកអត់រៀបរយ ព្រះអគ្គីបានឆាបឆេះយ៉ាងសន្ធោសន្ធៅរាលដាលដល់លំនៅឋានផ្សេងៗទៀតយ៉ាងលឿនសរុបអស់៣៥ខ្នង ទើបអណ្តាតភ្លើងរលត់សូន្យសុងទៅវិញ ដោយសារបានរថយន្ដទឹកជួយចុងក្រោយ ។
សូមបញ្ជាក់ថា លំនៅឋានដែលត្រូវភ្លើងឆេះអស់ទាំង៣៥ខ្នងខាងលើនេះ ជាប្រភេទសំណង់មិនរៀបរយត្រឹមត្រូវតាមបទដ្ឋានបច្ចេកទេសឡើយ ហើយជាសំណង់ធ្វើអំពីឈើប្រក់សង្ក័សីស្ទើរទាំងអស់ ទើបអណ្តាតភ្លើងងាយក្នុងការឆាបឆេះ ។ ម្យ៉ាងទៀត ដោយសារក្នុងពេលកើតហេតុនោះ ខ្យល់បានបោកបក់យ៉ាងខ្លាំង ផងបង្កឱ្យអណ្តាតភ្លើងកាន់តែងាយឆេះរាលដាលយ៉ាងលឿនរហ័សបំផុត ។ អ្វីជាការកត់សម្គាល់ក្នុងហេតុការណ៍ខាងលើនេះ គឺអ្នកស្រុកនៅកន្លែងកើតហេតុបានរិះគន់ដល់កងកម្លាំងសមត្ថកិច្ចនគរបាលនៃការិយាល័យពន្លត់ និងបង្ការគ្រោះអគ្គិភ័យរាជធានីភ្នំពេញថា ពេលមកដល់កន្លែងកើតហេតុភា្លមៗ នៅត្រេងត្រាងមិនប្រញាប់បាញ់ពន្លត់តាំងពីការឆេះឡើងតិចតួចនោះទេ ទុកបណ្តោយឱ្យអណ្តាតភ្លើងឆាបឆេះសន្ធោសន្ធៅរាលដាលធ្ងន់ធ្ងរ ។
ស្របជាមួយកំហឹងពុះកញ្ជ្រោលនេះ អ្នករងគ្រោះម្នាក់ៗបានស្ទុះរកដុតកម្ទេចរថយន្ដដឹកទឹកចោល ទើបក្រុមពន្លត់អគ្គិភ័យស្ទុះស្ទាបាញ់ពន្លត់ភ្លើង ។
ស្ថិតក្នុងស្ថានភាពស្លន់ស្លោរខាងលើនេះ សមត្ថកិច្ចចម្រុះក្នុងរាជធានីភ្នំពេញ ក៏ដូចជាអាជ្ងាធរមូលដ្ឋានបានដាក់កម្លាំងរាប់រយនាក់ចុះអន្តរាគមន៍ដល់កន្លែងកើតហេតុ ដើម្បីរក្សាសណ្ដាប់ធ្នាប់ ឆ្លើយតបការចោទប្រកាន់ពីប្រជាពលរដ្ឋ ។ ចៅសង្កាត់ស្ទឹងមានជ័យ លោក សេង សាញ់ មានប្រសាសន៍ថា ដោយសារតែស្ថានភាពផ្លូវតូចចង្អៀត មិនមានច្រកសម្រាប់រថយន្តពន្លត់អគ្គិភ័យចូលបាញ់ទឹកពន្លត់បានតាមសម្រួលទេ ទើបអណ្តាតភ្លើងឆេះរាលដាលដល់លំនៅឋានឆាប់រហ័សបែបនេះ ។ លោកនិយាយថា ឆេះអស់ផ្ទះចំនួន៣៥ខ្នង គឺស្មើនឹង៦០គ្រួសារ ។
លោកវរសេនីយ៍ឯក នេត វន្ថា នាយការិយាល័យនគរបាលពន្លត់ និងបង្ការគ្រោះមហន្តរាយអគ្គិភ័យបានរៀបរាប់ថា ក្នុងឧប្បតិ្តហេតុខាងលើនេះ កម្លាំងរបស់លោកមិនមានចេតនាណាមួយមិនចង់ជួយសង្គ្រោះប្រជាពលរដ្ឋដូចមតិមួយចំនួនចោទប្រកាន់នោះទេ ។ លោកនិយាយថា ដោយសារតំបន់នោះស្មុគស្មាញផ្នែកប្រព័ន្ធច្រកចេញចូលសម្រាប់រថយន្ដបាញ់ទឹកពន្លត់ភ្លើង ។ ទោះជាយ៉ាងនេះក្តី កម្លាំងសមត្ថកិច្ចបានប្រើប្រាស់បច្ចេកទេសក្នុងការសង្គ្រោះ ដោយបាញ់ទឹកពន្លត់ភ្លើងរហូតប្រើប្រាស់ទឹកអស់ជាង៥០រថយន្ដ ។ លោក នេត វន្ថា មានប្រសាសន៍ថា សម្រាប់រយៈពេល៧ខែ ឆ្នាំ២០១៤នេះ នៅរាជធានីភ្នំពេញ មានគ្រោះអគ្គិភ័យកើតឡើងចំនួន៤៩ករណីរួមទាំងលើកចុងក្រោយនេះ ។
ក្នុងនោះដែរ គ្រោះអគ្គិភ័យកន្លងមក បានសម្លាប់មនុស្ស៣នាក់និងរបួស៣នាក់ ។ លោកប្រធានការិយាល័យក៏បានអំពាវនាវដល់ប្រជាពលរដ្ឋទាំងអស់ឱ្យចូលរួមប្រុងប្រយ័ត្នបញ្ហាគ្រោះអគ្គិភ័យនេះឱ្យបានគ្រប់ៗគ្នា គឺដូចជាត្រូវមានឧបករណ៍បាញ់ពន្លត់អគ្គិភ័យនៅតាមលំនៅឋានជាដើម ដើម្បីបង្ការអគ្គិភ័យជាយថាហេតុ ។ ទាក់ទិននឹងមូលហេតុនៃគ្រោះអគ្គិភ័យនេះ មិនត្រូវបានដឹងភ្លាមៗទេ ដោយក្រុមមន្ដ្រីឱ្យដឹងថា រង់ចាំធ្វើការស្រាវជ្រាវសិន ដើម្បីរកមូលហេតុដែលបង្កពិតប្រាកដ ៕
ចែករំលែកព័តមាននេះ