ខេត្ដក្រចេះ ៖ ស្ត្រីក្មេងសរសៃខ្ចីវ័យ២៣ឆ្នាំម្នាក់ បានរងរបួសធ្ងន់ដោយសារគ្រាប់កាំភ្លើង នៅពេលកំពុងអង្គុយបំបៅដោះកូនអាយុជាងពីរខែនៅលើផ្ទះ ខណៈមានការផ្ទុះអាវុធជាច្រើនគ្រាប់ក្នុងប្រតិបត្តិការបង្ក្រាបរថយន្តដឹកឈើប្រណីត១គ្រឿងនៅពាក់កណ្តាលអធ្រាត្រ ។
ការផ្ទុះអាវុធជាច្រើនគ្រាប់ក្នុងប្រតិបត្តិការ បង្ក្រាបរថយន្តដឹកឈើ១គ្រឿងនេះមានការដឹកនាំពីលោកព្រះរាជអាជ្ញាអមសាលាដំបូងខេត្ត ដែលអ្នកស្រុកនឹកស្មានថាជាសង្គ្រាមមួយ ដោយសារស្នូរគ្រាប់កាំភ្លើងលាន់ឮរំពងនាវេលាពាក់កណ្តាលអធ្រាត្រឈានចូលថ្ងៃទី២៥ កក្កដា ។ ករណីនេះត្រូវបានគេចាត់ទុកថា ជាករណីផ្ទុះអាវុធលើកទី៣ហើយនៅស្រុកស្នួល ពេលមានការចុះបង្ក្រាបបទល្មើសដឹកជញ្ជូនឈើរបស់លោក ទី សុវិនថាល់ ព្រះរាជអាជ្ញាអមសាលាដំបូងខេត្ត ។
ហេតុការណ៍ផ្ទុះអាវុធជាច្រើនគ្រាប់នេះបានកើតឡើងនៅចំណុចទីប្រជុំជនឃុំស្វាយជ្រះ ស្រុកស្នួល ជាប់នឹងផ្លូវជាតិលេខ៧ បង្កឱ្យស្ត្រីម្នាក់រងរបួសដោយសារគ្រាប់កាំភ្លើងទាំងមិនដឹងខ្លួន ។លោកអនុសេនីយ៍ទោ ជា ជាន នាយប៉ុស្តិ៍រដ្ឋបាលឃុំស្វាយជ្រះ បានឱ្យដឹងថា ស្ត្រីរងគ្រោះឈ្មោះ ហ៊ាល រី អាយុ២៣ឆ្នាំ មានទីលំនៅឃុំស្វាយជ្រះ ស្រុកស្នួល មានកូន២នាក់ (ស្រីម្នាក់) និងជាស្ត្រីសរសៃខ្ចី ព្រោះទើបតែសម្រាលបានកូនប្រុសម្នាក់ទៀតអាយុជិត២ខែ ។ លោកនាយប៉ុស្តិ៍បានបញ្ជាក់ថា នៅយប់កើតហេតុ ស្ត្រីរងគ្រោះបានងើបអង្គុយបំបៅដោះកូននៅលើផ្ទះ ដែលមានទីតាំងជិតកន្លែងកើតហេតុចម្ងាយជាង១៥ម៉ែត្រ ចំណែកក្រុមគ្រួសារមានចំនួន៧នាក់ទៀតក៏កំពុងលង់លក់ក្នុងដំណេកនៅលើផ្ទះដែរ ។ ស្រ្ដីកូនខ្ចីរូបនេះបានត្រូវគ្រាប់កាំភ្លើងចំកំភួនដៃខាងស្តាំធ្លាយចេញមកស្មាខាងឆ្វេងបណ្តាលឱ្យរងរបួសធ្ងន់ ។
បើតាមប្រភពព័ត៌មានពីកន្លែងកើតហេតុបានឱ្យដឹងថា កាលពីវេលាពាក់កណ្តាលអធ្រាត្រនាថ្ងៃកើតហេតុនោះ មានការផ្ទុះអាវុធខ្លីជាច្រើនគ្រាប់ផ្អើលអ្នកភូមិក្នុងប្រតិបត្ដិការបង្ក្រាបរថយន្តសាំយ៉ុងដឹកឈើប្រណីតប្រភេទធ្នង់១គ្រឿងរបស់សមត្ថកិច្ចក្រោមការដឹកនាំផ្ទាល់របស់លោក ទី សុវិនថាល់ ព្រះរាជអាជ្ញា និង លោក ហាក់ ហ៊ាន់ ព្រះរាជអាជ្ញាររង ។ ក្នុងស្ថានភាពតានតឹងដែលជាការប្រឈមមុខដាក់គ្នារវាងកម្លាំងសមត្ថកិច្ចនិងក្រុមឈ្មួញដឹកឈើបានឈានដល់ការផ្ទុះអាវុធជាច្រើនគ្រាប់រហូតបង្កឱ្យមានស្ត្រីអ្នកភូមិម្នាក់នៅក្បែរនោះរងរបួសធ្ងន់។ បន្ទាប់ពីមានការផ្ទុះអាវុធក្នុងកិច្ចប្រតិបត្ដិការបង្ក្រាបការដឹកជញ្ជូនឈើខុសច្បាប់នេះ រថយន្តសាំយ៉ុងដឹកឈើធ្នង់១គ្រឿង និងមនុស្ស២នាក់ ម្នាក់ជាអ្នកបើកបរ និងម្នាក់ទៀតជាព្រូរថយន្តត្រូវបាននាំខ្លួនភ្លាមៗទៅកាន់បញ្ជាការដ្ឋានកងរាជអាវុធហត្ថខេត្តទាំងយប់ ។
មន្ដ្រីសមត្ថកិច្ចបានបញ្ជាក់ថា កម្លាំងសមត្ថកិច្ចកំពុងស្រាវជ្រាវបន្តជុំវិញករណីនេះ ។ សេចក្តីរាយការណ៍បានឱ្យដឹងថា ការផ្ទុះអាវុធប្រៀបដូចសមរភូមិនេះត្រូវគេដឹងថា បានធ្វើឡើងពីក្រុមការងារបង្ក្រាបរបស់លោកព្រះរាជអាជ្ញាអមសាលាដំបូងខេត្ត ក្នុងអំឡុងពេលដែលរូបលោកទើបចូលមកកាន់តំណែងជាព្រះរាជអាជ្ញាមានរយៈពេល២ខែកន្លងមកនេះ ។ ទាក់ទិននឹងការបង្កឱ្យរងរបួសដល់ប្រជាពលរដ្ឋដោយការផ្ទុះអាវុធបង្ក្រាបបទល្មើសនេះ មន្ត្រីអង្គការសង្គមស៊ីវិល និងមហាជនបានស្នើឱ្យអាជ្ញាធរមានវិធានការបង្ក្រាបតាមមធ្យោបាយផ្សេងៗ ចៀងវាងការផ្ទុះអាវុធដែលនាំឱ្យប៉ះពាល់ដល់ពលរដ្ឋដែលគ្មានកំហុស ។
ស្រដៀងគ្នានេះដែរ ប្រធានសមាគមសិទ្ធិមនុស្សខេត្ត លោកស្រី ធីម ណារឹន បានឡើកឡើងថា អាជ្ញាធរគួរមានយន្តការបង្ក្រាបណាមួយផ្សេង ប្រសិនបើមិនចាំបាច់ក្នុងការផ្ទុះអាវុធទេនោះ ។ លោកស្រីបានបញ្ជាក់ថា បើពិនិត្យលើស្ថានភាពជាក់ស្តែង គឺអាជ្ញាធរពិតជាមានសមត្ថភាពក្នុងការបង្ក្រាបរថយន្តដឹកឈើខុសច្បាប់បានដោយងាយនិងដោយសន្តិវិធី ដែលមិនចាំបាច់ប្រើហិង្សាបែបនេះទេ ៕
ចែករំលែកព័តមាននេះ