រាជធានីភ្នំពេញ ៖ ខណ្ឌមានជ័យ ជាឈ្មោះខណ្ឌចាស់ តែត្រូវផ្លាស់ប្តូរទីតាំងចេញពីទីកន្លែងចាស់មកទីតាំងថ្មីនៅក្នុងភូមិសាស្ត្រតំបន់អភិវឌ្ឍន៍លើផ្ទៃដីបឹងទំពុន និងបឹងជើងឯក ស្ថិតក្នុងភូមិសាស្ត្រសង្កាត់លេខ៣ គឺសង្កាត់បឹងទំពុន សង្កាត់ចាក់អង្រែលើ សង្កាត់ចាក់អង្រែក្រោម បានដំណើរការសេវាសាធារណៈជូនប្រជាពលរដ្ឋរយៈពេលជាងមួយខែកន្លងមកហើយ ក្នុងនោះក៏មានមន្ត្រីរាជការក្នុងសាលាខណ្ឌមួយចំនួន ក៏ដូចជាប្រជាពលរដ្ឋផងដែរ បានរិះគន់អាជ្ញាធរខណ្ឌមានជ័យថា មិនបានអនុវត្តន៍កិច្ចការរដ្ឋបាលផ្សេងៗតាមច្រកចេញចូលតែម្តង ។
ប្រភពបានទម្លាយឱ្យដឹងទៀតថា បន្ទាប់ពីលោកពេជ្រ កែវមុនី បានចូលកាន់ជាតំណែងអភិបាលខណ្ឌមានជ័យមក គេសង្កេតឃើញមន្ត្រីចាស់ៗមួយក្រុម និងមន្ត្រីថ្មីដែលកាន់ភារកិច្ចជាមួយគ្នា និងពេជ្រ កែវមុនី បាននិងកំពុងបែងចែកជាក្រុម ជាបក្ស ជាពួក បំពេញកិច្ចការងាររដ្ឋបាលជូនប្រជាពលរដ្ឋ ក្នុងគោលបំណងរកផលប្រយោជន៍រៀងៗខ្លួន ជាហេតុធ្វើឱ្យការសុំបញ្ជាក់លិខិតស្នាមរដ្ឋបាលផ្សេងៗដែលប្រជាពលរដ្ឋសុំប្រថាប់ត្រាពីអាជ្ញាធរខណ្ឌ ត្រូវចំណាយសេវាកម្មផ្សេងៗអស់ជាច្រើនខុសពីការគ្រប់គ្រងរបស់អាជ្ញាធរខណ្ឌមានជ័យចាស់ ។ ផ្តើមចេញពីបាតុភាពបែបនេះ ត្រូវបានប្រជាពលរដ្ឋរិះគន់ថា អាជ្ញាធរខណ្ឌមានជ័យ កំពុងបង្កើតអំពើពុករលួយនៅក្នុងផ្ទៃក្នុង និងមិនបានអនុវត្តន៍តាមគោលការណ៍ច្រកចេញចូលតែមួយរបស់រាជរដ្ឋាភិបាល ។
ជុំវិញបាតុភាពខាងលើនេះ លោកពេជ្រ កែវមុនី អភិបាលខណ្ឌមានជ័យ បានបកស្រាយប្រាប់អ្នកយកព័ត៌មានកោះសន្តិភាពតាមទូរស័ព្ទថា ខណ្ឌមានជ័យ ជាឈ្មោះខណ្ឌចាស់ តែត្រូវរើផ្លាស់ពីទីតាំងចាស់មកតែខ្លួនប៉ុណ្ណោះ ដូច្នេះបញ្ហាច្រកចេញចូលតែមួយ លោកទទួលស្គាល់ថា មិនទាន់បានអនុវត្តន៍ត្រឹមត្រូវមែន ព្រោះមិនទាន់មានទីតាំងបំពេញការងារច្បាស់លាស់ ។ ហើយបញ្ហានេះ លោកក៏បានធ្វើរបាយការណ៍ជំរាបទៅក្រសួងមហាផ្ទៃរួចរាល់ដែរ ដូច្នេះរង់ចាំពេលសាងសង់អគារថ្មីនៅដើមឆ្នាំ២០១៥ គឺនឹងមានច្រកចេញចូលជាមួយគ្នានោះតែម្តង ។ ទោះបីជាយ៉ាងណាក៏ដោយ ប្រជាពលរដ្ឋ ក៏ដូចជាមន្ត្រីក្នុងសាលាខណ្ឌមានជ័យមួយចំនួន បានខ្សឹបប្រាប់កោះសន្តិភាពថា នេះជាឱកាសមួយដែលមន្ត្រីខិលខូចកំពុងខ្វែងដៃ ខ្វែងជើងប្រមូលផលប្រយោជន៍ខុសច្បាប់៕
ចែករំលែកព័តមាននេះ