ខេត្តកំពត ៖ ធនាគារជាតិនៃកម្ពុជា ផ្សព្វផ្សាយប្រាក់រៀល ប្រព័ន្ធបាគង និងខេអេចហ្សូអរ ដល់អាជ្ញាធរ កងកំលាំងមានសមត្ថកិច្ច លោកគ្រូ-អ្នកគ្រូ សិស្សានុសិស្ស និងប្រជាពលរដ្ឋនៅខេត្តកំពត ដើម្បីជំរុញបង្កើនការទូទាត់តាមបច្ចេកវិទ្យាហិរញ្ញវត្ថុ និងការប្រើប្រាស់ប្រាក់រៀល នៅលើទីផ្សារឱ្យកាន់តែទូលាយ ក្នុងគោលដៅលើកកម្ពស់ហិរញ្ញវត្ថុប្រកបដោយបរិយាបន្ន ។

ឯកឧត្តម យឹម លាត ទេសាភិបាលរងធនាគារជាតិនៃកម្ពុជា លើកឡើងនៅក្នុងសិក្ខាសាលាផ្សព្វផ្សាយស្តីពី “ប្រាក់រៀល ប្រព័ន្ធបាគង និងខេអេចយ្យអរ” នៅខេត្តកំពត ថ្ងៃទី៣ ខែវិច្ឆិកា ឆ្នាំ២០២៦ នេះថា ជុំវិញការងារលើកកម្ពស់ប្រាក់រៀលនេះ រាជរដ្ឋាភិ- បាល និងធនាគារជាតិនៃកម្ពុជា បានដាក់ចេញនូវគោលនយោបាយជាច្រើន ដោយក្នុងនោះការលើកកម្ពស់ប្រាក់រៀល បានចាត់ទុកជា ការងារអាទិភាពមួយ ហើយចាប់តាំងពីដើមទសវត្សរ៍ឆ្នាំ២០០០មក ស្របពេលដែលស្ថានភាពម៉ាក្រូសេដ្ឋកិច្ចមានលំនឹងល្អប្រសើរ ក្រោយកម្ពុជាទទួលបានសុខសន្តិភាពពេញលេញនៅចុងឆ្នាំ១៩៩៨ ជាលទ្ធផល, និន្នាការនៃការប្រើប្រាស់ប្រាក់រៀល ក៏មានការកើន ឡើងជាលំដាប់ផងដែរ ។

ឯកឧត្តម បន្តថា ការលើកកម្ពស់ការប្រើប្រាស់ប្រាក់រៀល មិនមែនជាកិច្ចការរបស់ធនាគារជាតិនៃកម្ពុជាតែមួយនោះទេ ប៉ុន្តែ ទាមទារឱ្យមានការចូលរួមពីក្រសួង-ស្ថាប័ន វិស័យឯកជន គ្រឹះស្ថានធនាគារនិងហិរញ្ញវត្ថុ សហគ្រាស អាជីវករ គ្រឹះស្ថានអប់រំ និង ប្រជាពលរដ្ឋគ្រប់រូប ។ ជាក់ស្តែងយើងទាំងអស់គ្នាអាចចាប់ផ្តើមពីសកម្មភាពងាយៗក្នុងជីវភាពប្រចាំថ្ងៃដូចជា៖ អាជីវករនិងសហគ្រាស បង្ហាញតម្លៃទំនិញ និងសេវាជាប្រាក់រៀល និងប្រើប្រាស់គណនីទទួលការទូទាត់ជាប្រាក់រៀល, ក្រុមហ៊ុននិងនិយោជក ពង្រីកការបើក ប្រាក់បៀវត្សជាប្រាក់រៀលជូនបុគ្គលិក, ប្រជាពលរដ្ឋបើកគណនីសន្សំ និងទូទាត់ជាប្រាក់រៀលតាមលទ្ធភាព ជាពិសេសតាមរយៈ KHQR និងប្រព័ន្ធទូទាត់ឌីជីថល និងសិស្សានុសិស្សនិងយុវជន ចាប់ផ្តើមស្គាល់តម្លៃប្រាក់រៀល និងបង្កើតទម្លាប់ប្រើ ប្រាស់ប្រាក់រៀល ក្នុងជីវភាពប្រចាំថ្ងៃ ។

ឯកឧត្តម យឹម លាត បន្តថា ក្រៅពីការប្រើប្រាស់ក្រដាសប្រាក់រៀលក្នុងជីវភាពប្រចាំថ្ងៃ បច្ចុប្បន្នធនាគារក៏អាចទូទាត់ជាប្រាក់ រៀល បានយ៉ាងងាយស្រួលតាមទូរស័ព្ទដៃ ដោយគ្រាន់តែស្កេន QR Code។ ភាពងាយស្រួលនេះត្រូវបានគាំទ្រ ដោយការអភិវឌ្ឍប្រព័ន្ធ ទូទាត់ឌីជីថល ជាពិសេសប្រព័ន្ធបាគង និងស្តង់ដា KHQR ។ ប្រព័ន្ធបាគង និងស្តង់ដា KHQR ដែលត្រូវបានធនាគារជាតិនៃកម្ពុជា ដាក់ឱ្យប្រើប្រាស់នៅឆ្នាំ២០២០ និងឆ្នាំ២០២២ បានរួមចំណែកធ្វើឱ្យការផ្ទេរប្រាក់ និងការទូទាត់ឆ្លងគ្រឹះស្ថានធនាគារ និងហិរញ្ញវត្ថុ កាន់តែងាយស្រួល ឆាប់រហ័ស និងចំណាយតិច ព្រមទាំងពង្រីកលទ្ធភាពទូទាត់ឆ្លងដែនជាមួយបណ្តាប្រទេសជាដៃគូ។

លើសពីនេះ ស្តង់ដា KHQR ក៏ត្រូវបានអភិវឌ្ឍជាបន្តបន្ទាប់ ដើម្បីសម្រួលដល់ការទូទាត់ឆ្លងធនាគារ ។ កន្លងមកអ្នកលក់មួយ ចំនួនត្រូវដាក់ស្លាក KHQR ច្រើន សម្រាប់គណនីធនាគារផ្សេងៗគ្នា និងសម្រាប់ការទូទាត់ជាប្រាក់រៀល ឬប្រាក់ដុល្លារអាមេរិក ។ ប៉ុន្តែបច្ចុប្បន្ន អ្នកលក់អាចប្រើស្លាក KHQR តែមួយ ដើម្បីទទួលការទូទាត់ពីធនាគារផ្សេងៗ ទាំងជាប្រាក់រៀល និងប្រាក់ដុល្លារ អាមេរិក។ ការអភិវឌ្ឍនេះជួយសម្រួលដល់អ្នកទិញ និងអ្នកលក់ ព្រមទាំងរួមចំណែកលើកកម្ពស់ការទូទាត់ជាប្រាក់រៀលតាមប្រព័ន្ធ ឌីជីថល ។ បញ្ហានេះ សូមឱ្យអាជ្ញាធរ កងកំលាំងមានសមត្ថកិច្ច លោកគ្រូ-អ្នកគ្រូ សិស្សានុសិស្ស ជាពិសេសប្រជាពលរដ្ឋនៅខេត្តកំពត ទាំងអស់ បង្កើនការទូទាត់តាមបច្ចេកវិទ្យាហិរញ្ញវត្ថុ និងការប្រើប្រាស់ប្រាក់រៀលនៅលើទីផ្សារឱ្យកាន់តែទូលាយ ដើម្បីរួមគ្នាលើកកម្ពស់ ហិរញ្ញវត្ថុប្រកបដោយបរិយាបន្ន ៕ អត្ថបទសហការ









ចែករំលែកព័តមាននេះ