រាជធានីភ្នំពេញ ៖ លោកជំទាវបណ្ឌិត ជា សិរី ទេសាភិបាល ធនាគារជាតិ នៃកម្ពុជា បានចាត់ទុកស្ត្រីដើរតួនាទីស្នូលក្នុងសេដ្ឋកិច្ចនៅក្នុងសង្គមកម្ពុជាដោយរាប់បញ្ចូលតាំងពីការគ្រប់គ្រងហិរញ្ញវត្ថុគ្រួសារ រហូតដល់ការប្រកបអាជីវកម្ម និង ការចូលរួមក្នុងវិស័យកសិកម្ម និង ពាណិជ្ជកម្ម ផងដែរ ។ ថ្លែងក្នុង «សិក្ខាសាលា និងកិច្ចពិភាក្សាស្តីពី បរិយាបន្នហិរញ្ញវត្ថុសម្រាប់ស្ត្រីនៅកម្ពុជា» នៅសណ្ឋាគារ ហៃយ៉ាត់ រីជិនស៊ី ភ្នំពេញ កាលពីព្រឹកថ្ងៃទី ២៧ ខែតុលា ឆ្នាំ ២០២៦ លោកជំទាវបណ្ឌិត បានមានប្រសាសន៍ថា «ដើម្បីរក្សា និងពង្រឹងការចូលរួមចំណែកទាំងនេះ ស្ត្រីចាំបាច់ត្រូវមានលទ្ធភាពទទួលបានសេវាហិរញ្ញវត្ថុ ដែលសមស្របទៅនឹងតម្រូវការ និង គាំទ្រដល់សកម្មភាពសេដ្ឋកិច្ចរបស់ពួកគាត់ ។ ទោះជាយ៉ាងណា ការទទួលបានសេវាតែមួយមុខគឺមិនទាន់គ្រប់គ្រាន់នោះទេ ។ បរិយាបន្នហិរញ្ញវត្ថុដែលមានអត្ថន័យគ្រប់គ្រាន់ ទាមទារឱ្យស្ត្រីអាចប្រើប្រាស់សេវាទាំងនេះ ដោយមានប្រសិទ្ធភាព មានលទ្ធភាពធ្វើការសម្រេចចិត្តផ្នែកហិរញ្ញវត្ថុដោយផ្អែកលើព័ត៌មានច្បាស់លាស់ ចេះគ្រប់គ្រងហានិភ័យហិរញ្ញវត្ថុ និង បង្កើតនូវសុខុមាលភាពហិរញ្ញវត្ថុឱ្យកាន់តែរឹងមាំសម្រាប់ខ្លួនឯង និងគ្រួសារ» ។
លោកជំទាវបណ្ឌិត បានបន្តថា តម្រូវការហិរញ្ញវត្ថុរបស់ស្ត្រីមានភាពខុសៗគ្នា ទៅតាមកម្រិតប្រាក់ចំណូល មុខរបរ ទីតាំង ភូមិសាស្ត្រ និង ស្ថានភាពរស់នៅ ។ ស្ត្រីជាសហគ្រិនអាចនឹងត្រូវការប្រភពទុន និងការគាំទ្រអាជីវកម្មដែលសមស្រប ខណៈដែលស្ត្រីជាកសិករ អាចនឹងត្រូវការឥណទានតាមរដូវកាល សេវាសន្សំ និង សេវាធានារ៉ាប់រងលើការធ្វើកសិកម្ម ។ ចំណែកស្ត្រីនៅតំបន់ជនបទ ស្ត្រីនៅក្នុងសេដ្ឋកិច្ចក្រៅប្រព័ន្ធ និង ស្ត្រីមានពិការភាព អាចជួបប្រទះនូវឧបសគ្គបន្ថែមផ្សេងៗ ដូចនេះ គោលនយោបាយ និង សេវាហិរញ្ញវត្ថុចាំបាច់ ត្រូវតែឆ្លើយតបទៅនឹងតម្រូវការចម្រុះរបស់ស្ត្រី ។
លោកជំទាវបណ្ឌិត បានបន្ថែមថា លើសពីនេះ ការលើកកម្ពស់សុខុមាលភាពហិរញ្ញវត្ថុរបស់ស្ត្រី គឺជាកត្តាចាំបាច់ក្នុងការជួយឱ្យពួកគាត់អាចគ្រប់គ្រងហិរញ្ញវត្ថុរបស់ខ្លួនប្រកបដោយប្រសិទ្ធភាព ទប់ទល់នឹងវិបត្តិហិរញ្ញវត្ថុដែលអាចកើតមានដោយមិនបានរំពឹងទុក ចាប់យកឱកាសសេដ្ឋកិច្ច និង សម្រេចបាននូវសុវត្ថិភាពហិរញ្ញវត្ថុប្រកបដោយចីរភាពសម្រាប់ខ្លួនឯង និង គ្រួសារ ។ លោកជំទាវ បានបញ្ជាក់ថា ការសម្រេចបាននូវគោលដៅនេះ មិនត្រឹមតែតម្រូវឱ្យមានលទ្ធភាពទទួលបានសេវាហិរញ្ញវត្ថុប៉ុណ្ណោះទេ ប៉ុន្តែថែមទាំងតម្រូវឱ្យមានចំណេះដឹង ទំនុកចិត្ត និង សមត្ថភាពក្នុងការប្រើប្រាស់សេវាទាំងនោះប្រកបដោយប្រសិទ្ធភាព និង ការទទួលខុសត្រូវផងដែរ ។
លោកជំទាវបណ្ឌិត ជា សិរី បានឱ្យដឹងទៀតថា លើសពីនេះ បរិយាបន្នហិរញ្ញវត្ថុរបស់ស្ត្រីមិនត្រឹមតែជាបញ្ហា នៃឱកាសដែលទទួលបានស្មើគ្នាប៉ុណ្ណោះទេ ប៉ុន្តែក៏ជាការវិនិយោគលើភាពធន់ នៃសេដ្ឋកិច្ច និង ការអភិវឌ្ឍប្រកបដោយចីរភាពរបស់កម្ពុជាផងដែរ ។ នៅពេលដែលស្ត្រីអាចទទួលបានសេវាហិរញ្ញវត្ថុដែលសមស្រប និង អាចចាប់យកឱកាសសេដ្ឋកិច្ចបាន ពួកគាត់នឹងមានលទ្ធភាព និង សមត្ថភាពគ្រប់គ្រាន់ក្នុងការពង្រីកអាជីវកម្ម គាំទ្រគ្រួសារ និង ពង្រឹងសមត្ថភាពក្នុងការទប់ទល់នឹងវិបត្តិ និង ហានិភ័យហិរញ្ញវត្ថុដែលអាចកើតមានដោយមិនបានរំពឹងទុក ។
លោកជំទាវកិតិ្តបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី មានប្រសាសន៍ថា បរិយាបន្នហិរញ្ញវត្ថុជាអាទិភាពស្នូលមួយដែលត្រូវបានកំណត់នៅក្នុងផែនការយុទ្ធសាស្ត្រនារីរតនៈទី ៦។ សម្រាប់ក្រសួងកិច្ចការនារី បរិយាបន្នហិរញ្ញវត្ថុ មានអត្ថន័យលើសពីការដែលស្ត្រីគ្រាន់តែអាចបើកគណនីធនាគារ , ការទទួលបានឥណទាន ឬ ការប្រើប្រាស់សេវាទូទាត់ឌីជីថល ។ លោកជំទាវកិតិ្តបណ្ឌិត បានបន្តថា «អ្វីដែលសំខាន់ជាងនេះ តើស្ត្រី មានចំណេះដឹង ឱកាស ផលិតផល និង សេវាហិរញ្ញវត្ថុសមស្រប ព្រមទាំងមានសិទ្ធិ និង ភាពអង់អាចក្នុងការសម្រេចចិត្ត ដើម្បីប្រើ ប្រាស់ហិរញ្ញវត្ថុក្នុងការលើកកម្ពស់ជីវភាព, ការពង្រីកអាជីវកម្ម, ការបង្កើតទ្រព្យសម្បត្តិ, ការបង្កើនភាពធន់របស់គ្រួសារចំពោះវិបត្តិសេដ្ឋកិច្ច និង រៀបចំផែនការអនាគតរបស់ខ្លួនដោយមានទំនុកចិត្តដែរ ឬទេ ?»។
លោកជំទាវកិតិ្តបណ្ឌិត បានបញ្ជាក់ថា គោលដៅរបស់ក្រសួង មិនត្រឹមតែនាំស្ត្រីឱ្យចូលទៅក្នុងប្រព័ន្ធហិរញ្ញវត្ថុប៉ុណ្ណោះទេ ប៉ុន្តែត្រូវធ្វើឱ្យប្រព័ន្ធហិរញ្ញវត្ថុអាចឆ្លើយតប និងបម្រើស្ត្រីឱ្យបានកាន់តែប្រសើរ» មានន័យថា គឺត្រូវបន្តដំណើរ ពីការទទួលបានសេវាហិរញ្ញវត្ថុ ឆ្ពោះទៅបរិយាបន្នហិរញ្ញវត្ថុប្រកបដោយអត្ថន័យ និង ឈានទៅរកការពង្រឹងភាពអង់អាចផ្នែកសេដ្ឋកិច្ចរបស់ស្ត្រី និងក្រុមគ្រួសាររបស់ពួកគេ ។
យោងតាមរបាយការណ៍ប្រចាំឆ្នាំរបស់ធនាគារជាតិ នៃកម្ពុជា (២០២៥) នៅក្នុងវិស័យធនាគារ ចំនួនស្ត្រីដែលបានប្រើប្រាស់សេវាឥណទានមានប្រមាណ ៥៣% និង ចំនួនស្ត្រីដែលមានប្រាក់បញ្ញើមានប្រមាណ ៥១% ។ ចំណែកនៅក្នុងវិស័យមីក្រូហិរញ្ញវត្ថុ ចំនួនស្ត្រីដែលបានប្រើប្រាស់សេវាឥណទានមានប្រមាណ ៦៧% និងចំនួនស្ត្រីដែលមានប្រាក់បញ្ញើមានប្រមាណ ៦៤% ។ ទោះបីជាតួលេខទាំងនេះ បង្ហាញពីការចូលរួមយ៉ាងសកម្មរបស់ស្ត្រីយ៉ាងណាក៏ដោយ យើងក៏ត្រូវធានាផងដែរថា ពួកគាត់អាចទទួលបានផលិតផលដែលសមស្របសម្រាប់ប្រើប្រាស់សេវាហិរញ្ញវត្ថុប្រកបដោយសុវត្ថិភាព និង សម្រេចបានលទ្ធផលហិរញ្ញវត្ថុវិជ្ជមានផងដែរ ។ បច្ចុប្បន្ន ធនាគារជាតិ នៃកម្ពុជា និងក្រសួង-ស្ថាប័នពាក់ព័ន្ធកំពុងរៀបចំ «យុទ្ធសាស្ត្រជាតិស្តីពីបរិយាបន្នហិរញ្ញវត្ថុ ២០២៦-២០៣០» ដោយចាត់ទុកបរិយាបន្នហិរញ្ញវត្ថុសម្រាប់ស្ត្រីជាអាទិភាពសំខាន់មួយ ដើម្បីឆ្លើយតបទៅនឹងតម្រូវការហិរញ្ញវត្ថុចម្រុះរបស់ស្ត្រី ៕ អត្ថបទសហការ
ចែករំលែកព័តមាននេះ