ខេត្តព្រះវិហារ ៖ មូលនិធិ សប្បុរសធម៌ ដែលកើតចេញពីមហាគ្រួសារ វីតាល់-មីជាតិ គ្រប់ជាន់ថ្នាក់ និង សមាគមអតីត និស្សិតជប៉ុន…
ខេត្តព្រះវិហារ ៖ មូលនិធិ សប្បុរសធម៌ ដែលកើតចេញពីមហាគ្រួសារ វីតាល់-មីជាតិ គ្រប់ជាន់ថ្នាក់ និង សមាគមអតីត និស្សិតជប៉ុន មកពីសាកលវិទ្យាល័យ ណាហ្គោយ៉ា ប្រចាំប្រទេសកម្ពុជា និងមូលនិធិ ២៥រៀលរបស់វីតាល់ បាននាំយកអំណោយ ៤០០ឈុត ដោយក្នុងមួយឈុតៗ មានតង់. អង្រឹង. មុង .ភួយ. ក្រម៉ា. ដែកកេស អំពូលបំភ្លឺ .ទឹកដោះគោជូរ .អាហារក្រៀម .សាប៊ូកក់សក់ .ទឹកវីតាល់ និងមីជាតិ ឧបត្ថម្ភជូនដល់ ជូនជនភៀសសឹក ៤០០គ្រួសារ មកពីស្រុកជាំក្សាន្ត ខេត្តព្រះវិហារ ។
ពិធីប្រគល់ និងទទួលអំណោយខាងលើនេះ បានធ្វើឡើងនៅវត្តពើងអង្គកាម ហៅវត្ត (បាក់កាំ) ឃុំឈានមុខ ស្រុកត្បែងមានជ័យ ខេត្តព្រះវិហារ ដឹកនាំដោយលោក ជុនហៀង ថាវសិទ្ធិ ប្រធានទីផ្សារ អភិវឌ្ឍន៍ផលិតផល តំណាងដ៏ខ្ពង់ខ្ពស់ លោកជំទាវ ជឹង សុគន្ធាវី នាយិកាប្រតិបត្តិ ក្រុមហ៊ុនវីតាល់ និងមីជាតិ និងវត្តមាន កញ្ញា ជា សៀវម៉ី តំណាងសមាគម អតីតនិស្សិតជប៉ុន មកពីសាកលវិទ្យាល័យណាហ្គោយ៉ា និងអ្នកស្ម័គ្រចិត្ត ជាបុគ្គលិកការិយាល័យកណ្តាល ក្រុមហ៊ុនវីតាល់-មីជាតិ ជាច្រើនទៀត ។
សូមបញ្ជាក់ថា នេះជាលើកទី២ ហើយសំរាប់កម្មវិធីសប្បុរសធម៌ “ខ្មែរដើម្បីខ្មែរ” ដោយលើកទី ១ បាននាំស្បៀងអាហារ និងសម្ភារ ចាំបាច់ប្រចាំថ្ងៃ ចែកជូនជនភៀសសឹក ១០០០ គ្រួសារ
នៅស្រុកអូរជ្រៅ ខេត្តបន្ទាយមានជ័យកាលពីថ្ងៃទី ២៨ កក្កដា កន្លងមកនេះ ។
ក្នុងពិធីសំណេះសំណាល លោក ជុនហៀង ថាវសិទ្ធិ បានសម្តែងនូវកតញ្ញូតាធម៌ដ៏ជ្រាលជ្រៅ និងរំលឹកគុណចំពោះបងប្អូនទ័ពជ័រមុខ គ្រប់លំដាប់ថ្នាក់ និងសូមចូលរួមរំលែកទុក្ខចំពោះវីរៈកងទ័ពកម្ពុជា ដែលបានធ្វើពលិកម្ម យ៉ាងធំធេង និងខិតខំពុះពារជំនះគ្រប់ឧបសគ្គ ក្នុងស្មារតីក្លៀវក្លា ដើម្បីបុព្វហេតុការពារជាតិ មាតុភូមិកម្ពុជា ។
លោកថា ពិតជាមានអារម្មណ៍ក្ដុកក្ដួលជាពន់ពេក ក្រោយពីបានទទួលដំណឹងដ៏រន្ធត់នៃការផ្ទុះអាវុធជាច្រើនថ្ងៃជាប់ៗគ្នារវាងកម្ពុជា និងថៃ ដែលតម្រូវឱ្យមានការជម្លៀសប្រជាពលរដ្ឋជាបន្ទាន់ជាច្រើនគ្រួសារមកកាន់ទីទួល និងតំបន់សុវត្ថិភាពនាពេលនេះ ។
បើតាមលោក ជុនហៀង ថាវសិទ្ធិ ក្នុងនាមឈាមជ័រខ្មែរតែមួយ និងជាប្រជាជាតិ ដែលជ្រកក្រោមទង់ជាតិតែមួយ នៃព្រះរាជាណាចក្រកម្ពុជា វីតាល់ និងមីជាតិ ពិតជាមិនអាចមើលរំលងនូវសេចក្ដីត្រូវការ និងកង្វះខាតនានាដែលបងប្អូនប្រជាពលរដ្ឋគ្រប់គ្នានៅទីនេះ កំពុងជួបប្រទះនោះទេ ។តួយ៉ាងដោយទទួលបានសេចក្ដីណែនាំ និងការអនុញ្ញាតដ៏ខ្ពង់ខ្ពស់ពីលោកជំទាវ ជឹង សុគន្ធាវី នាយិកាប្រតិបត្តិ វីតាល់ និងមីជាតិ មានឱកាសចុះមកសាកសួរសុខទុក្ខបងប្អូនភៀសសឹកប្រមាណ៤០០ គ្រួសារ នៃមូលដ្ឋានស្រុកត្បែងមានជ័យ ខេត្តព្រះវិហារនេះ ។
ក្នុងស្ថានភាពបណ្ដោះអាសន្ននេះ វីតាល់ សូមចូលរួមផ្ដល់ជាកម្លាំងចិត្ត និងលើកទឹកចិត្តដល់បងប្អូនប្រជាពលរដ្ឋទាំងអស់បន្តរក្សានូវស្មារតីវិជ្ជមាន ថែទាំសុខភាពឱ្យបានល្អ ហើយយើងទាំងអស់គ្នាជឿជាក់យ៉ាងមុតមាំថា ក្រោមការដឹកនាំប្រកបដោយភាពឈ្លាសវៃនៃរាជរដ្ឋាភិបាលកម្ពុជា ដឹកនាំដោយ សម្តេចតេជោ-ធិបតី ដើម្បីឈានទៅកាន់សុខសន្តិភាពពេញលេញសម្រាប់ប្រជាជាតិយើងទាំងអស់គ្នារស់នៅក្នុងភាពសុខសាន្ត ៕ អត្ថបទសហការ
ចែករំលែកព័តមាននេះ